Teknologia albisteak
1

Ameriketako indigenen ordezkariak Euskal Herrian

Erabiltzailearen aurpegia
aldo - Garabide Kultur Elkartea
2008-10-10 : 18:10

Ameriketako hainbat herri indigenetako ordezkariak Euskal Herrian izango dira datorren asteburutik aurrera, Garabide Kultur Elkartek antolatutako Hizkuntza eta Herrien Arteko Bigarren Truke Programan.

Lau astez gure artean izango ditugu Guatemalako mayen ordezkariak, Ekuadorko kichwuak, Bolibiako kechwa, kayawalla eta aymarak, Txileko Wallmapu herriko maputxeak, Paraguatik datorren guaranien ordezkaria eta baita Magrebetik etortzekoa den amazigh herriaren ordezkaria ere.

Urriak 13 hasi eta azaroaren 7a bitarte oso programa zabala antolatu da. Ekitaldi gehienak Mondragon Unibertsitatean, Eskoriatzako Huhezi fakultatean egingo dira, baina lau aste horietan hogeitaka bisita aurreikusi dira, tartean Garabideri laguntza ematen dioten Oñatira, Azkoitira, Beasainera eta Eskoriatzako herrira bertara.

Euskalgintzaren esperientzia transmititzea

Garabide Elkarteak antolatzen duen programa honen helburua euskara eta euskal kulturaren garapenaren esperientziak erakustea da, hain zuzen, garapen bidean dauden herrietako hizkuntza komunitate minorizatuetako ordezkariei. Eurek ere, beren identitatearen mantentzeko eta hizkuntzen normalizaziorako non begiratu eta non ikasi izan dezaten.

Truke programa da ordea, alegia, herri indigenetako ordezkariek ekarriko diguten esperientzia ezagutu nahi dugu. Beren errealitatearen berri izan nahi dugu baita ere, eta herri hauen ekarpen eta hizkuntza errealitateak ezagutarazi nahi dizkiegu euskalgintzako eragileei, protagonisten eskutik beretik.

Lankidetzan oinarritutako hartu-emanak bultzatuko ditugu, bereziak diren eredu gizakoiagoetara bideratuko gaituen elkartrukatzean ikasiz eta irakatsiz.

Formazio saioak izango dira, hainbat elkarte, erakunde, udal, eskola eta komunikabidetara egindako bisitak, hitzaldiak, mahai inguruak, euskalgintzan lan handia egin duten pertsonaien testigantzak, eta abar, ondoko programan ikusten denez. Halaber, Euskal Herriaren ezagutza izan dezaten, jai giroko ekitaldi andana ere antolatu dugu.

Programan ikusten den bezala, asko dira bertan parte hartuko duten erakunde eta pertsonak. Hauen eta herri indigenen arteko zubi lana egingo du Garabide Elkarteak.

Hona programaren laburpena:

Urriak 13: Harrera; Oñatiko harrera eta prentsaurrekoa

Urriak 14: Euskaltzaindiara bisita; Ongi etorri jaia

Urriak 15: AEKra bisita

Urriak 17: Udako Euskal Unibertsitatera bisita / Ikastolei bisita. Arizmendi ikastola

Urriak 18: Iñaki Perurenari bisita

Urriak 19: Nafarroa Oinez

Urriak 20: Testigantza. Jesus Garmendia; Ikastolei bisita. Ikastolen elkartea.

Urriak 22: Goierri Telebistara bisita; Mahai ingurua Besainen

Urriak 23: Goiena Taldeari bisita

Urriak 24: Euskal Kultur Erakunderako bisita; Testigantza. Argitxu Noblia

Urriak 25: Zuberoako AEKra bisita; Xiberoko Bozara bisita

Urriak 27: Kataluniako errealitatea. Joan A. Argenter

Urriak 28: Zenbat Gara elkartera bisita; Testigantza. Xamar

Urriak 29: Jakin aldizkarira bisita; Testigantza. Joan Mari Torrealdai; Argia aldizkarira bisita; Testigantza. Pello Zubiria; Soziolinguistika Klusterrera bisita; Berriara bisita; Testigantza. Martxelo Otamendi

Urriak 30: Azkoitiko Udalera bisita. Euskara zerbitzua; Udalaren harrera; Euskal Telebistara bisita; Testigantza. Kike Amonarriz

Urriak 31: Elhuyar Fundazioara bisita; Eizie elkartera bisita / Ipuin kontaketa, mahaingurua eta afari multikulturala Eskoriatzan

Azaroak 3: Uemara bisita. Aulestira bisita; Kontseilura bisita; Testigantza. Xabier Mendiguren

Azaroak 4: Emunera bisita; Eusko Jaurlaitzako Kanpo Harremanak

Azaroak 5: Eusko Jaularitzara bisita. Hizkuntza Politika; AEDra bisita; Topaguneara bisita

Azaroak 7: Agur ekitaldia

Formazio saioak ia egunero: Euskal Herriko egoera linguistiko kulturala; Euskalgintzaren egituraketa; Hezkuntzako hizkuntza ereduak; Hizkuntza ekologia; Huheziko Hizkuntza Saila; soziolinguistika; hizkuntza bateratzeko pausu eta estrategiak; hedabide abertzaleak eta elebitasuna; gizarte motibazioa, militantzia; euskalgintzaren argi-ilunak; kooperatibak...

Ikasleekiko bilerak: bai Bigarren Hezkuntzako eta batxilergoko ikasleekin, Durangoko Ibaizabal Ikastolan, bai Huhezi fakultateko ikasleekin, baita Lehen Hezkuntzakoekin ere Arizmendi Ikastolan

Erantzunak

Sustatu
2008-10-11 : 23:20

Albiste honekin lotuta, irakurtzeko modukoa da Jon Sarasuak Argiaren Larrun aldizkarian publikatutako Hegonaldiko apunteak


Erantzun

Twitter ikonoa  Facebook ikonoa  Sartu

Publizitatea

Jarraitu sustatu.eus

E-postaz, mezuz mezu:

E-postaz, eguneko buletina:

  • rss ikonoa

»» Aukera gehiago