Euskal blogosfera ZingiZangoren mahai-inguruan

Gonbidatutako blogariak hauek izan ziren: Luistxo Fernandez eibartarra (LF), Haritz Rodriguez donostiarra (HR), Joxe Aranzabal arrasatearra (JA). Oso blogari emankorrak dira, eta horren adibide garbia da asko direla elikatzen dituzten blogak. Honako hauek, besteak beste:

Luistxo Fernandezek

http://eibar.org/blogak/luistxo/

http://www.mapamovil.net/

Haritz Rodriguezek:

http://www.gaur8.info/bitakorak/galaxia/

http://www.euskaltube.com/bloga/

Joxe Aranzabalek:

http://goiena.net/blogak/faroa

http://www.gizakom.blogspot.com/

Legazpiko mahai-inguruan hainbat adierazpen egin zituzten eta lerro hauetara horietako batzuk ekartzen saiatu gara. Gutxi gorabehera moldatu ditugu eta litekeena da, beharbada, hizlariak zerbaitekin ados ez egotea. Hala bada, akatsak non dauden esan eta zuzentzen saiatuko gara.

LF: “Izugarria da internetek eskaintzen dituen aukerak, ez dauka hondorik. Denetik topa dezakezu. Euskaraz zerbait, gaztelaniaz gehiago eta ingelesez ia dena. Jakin nahi baduzu, esate baterako, zer egin behar den balkoiko lorontzietan tomateak hazteko, seguru zerbait badagoela." "Gainera, norberak edukiak sortzeko aukera handiak ematen ditu. Adibide bat: filmeek normalean ez dute euskarazko azpititulurik; bada, horri buelta eman dakioke, norberak etxetik sortuz.” (www.manterola.org/azpitituluak)

HR: “Euskarak internet munduan bere lekutxoa egin du. Hala, blogosferaren munduan polo garrantzitsuak sortu dira azken urteetan: teketen.com, eibar.org, donostia… Tresna indartsuak ere landu dira, “elebila.com” esaterako. Baina, kontuan izan behar dugu aldaketa handiak datozela (web semantikoa, web 3.0…) eta gertu egon behar dugu horretarako”.

LF: “Ez goaz hain ondo. Blogetatik haruntzago pentsatu behar dugu eta neurri handiagoetara jo behar dugu eragin nahi badugu. Ikus-entzunezkoetan, bideoetan… lan gehiago egin behar dugu. Eskala handitan pentsatu behar dugu eta ausart jokatu.” “Internet munduan aurrera egiteko partidarik interesgarriena, partidarik handiena jokatu behar dugu” (Hori azaltzeko 1983. urtean John Badhan-ek zuzendu zuen “Wargames” filma ekarri zuen gogora)..

 

HR: “Blogak estigmatizatuta egon dira, gutxietsita, batere garrantzirik izango ez balute bezala; baina, gaur egun pentsakera hori gaindituta dago.

LF: “Blogen bitartez albiste sortzaile izan zaitezke, inoren bitartekaritzarik gabe. Lehen pertsona jakin batzuen esku zeuden gauzak orain norberak egin ditzake eta beste zirkuitu batzuk sortzen dira.” “Euskaraz gaur egun inoiz baino gehiago idazten da, inoiz baino idazletza handiagoa dago, idazten diren gauza asko tontakeriak baldin badira ere. Ez da egia gero eta gutxiago idazten denik. Hor daude “fotologak” (www.fotolog.com), ia gaztetxo guztiek eurena daukate.”  

JA: “Nire osasun egoera zela eta, mimoak behar nituen bloga sortu nuen garaian eta, eta oso baliagarria izan zitzaidan nire mina arintzeko.” “Etorkizun hurbilean ez dirudi blogen unibertsoa asko aldatuko denik. Hori bai, badirudi internet aparailu askotan integratuko dela eta, horren ondorioz, blogetara heltzeko erak ugarituko dira.”

 

HR: “Neri blogek eskaintzen didaten gertutasuna gustatzen zait. Zinemaldiarekin lotutako adibide bat jarriko dut: niretzat, aholku baliagarriagoak dira blog batean herritar arrunt batek film bati buruz egiten dituen kritikak, kritiko kontsakratu batek egiten dituenak baino. Lagun batek egingo lidakeen aholku gisa hartzen dut”

LF: “Gure herri honetan arazo larria daukagu: inork ez du hitzaldi edo mahai-inguru baten kronikarik idazten. Albistea da “guruak” datozela eta mahai-inguru bat egin behar dutela, baina “guruek” zer kontatzen duten ez da albistea”.

 

Luistxok esandakoa gogoan hartu genituen, eta kasu honetan, behintzat, esaldi batzuk jasotzea bidezkoa zela iruditu zitzaigun Zingizango.com-erako.