Teknologia albisteak

500 familia kalera aterako dira Beasainen

Alkartasuna Lizeo Ikastolako Guraso Elkartea

2008-05-26 : 10:05

Beasaingo herriak eta herritarrek sortutako Alkartasuna Lizeoa ikastola ikastetxe publiko bihurtu zen orain 12 urte, ezinbesteko baldintza batekin: Alkartasuna Lizeoa ikastolaren nortasuna, hezkuntza proiektua eta kokapena mantentzea, garatzea eta indartzea. Hezkuntza Sailak ezinbesteko baldintza hori onartu eta hitzartu egin zuen orduko guraso eta irakasleekin Alkartasuna Lizeoa ikastola ikastetxe publiko bihurtzeko. Baina emandako hitza jan du Hezkuntza Sailak.

1) 12 urte hauetan Hezkuntza Sailak Beasaingo herriarekin hitzartutakoaren aurka jokatu du, behin eta berriro, etengabe, egoera mutur-muturreraino eramateraino: besteak beste, 12 urtetan ez da ikastetxearen oinarrizko berrikuntza eta egokitzapenik egin (ikasgelak falta dira, eraikuntzak oinarrizko segurtasun arauak ez ditu betetzen, jangela gainezka dago, oinarrizko azpiegiturak falta dira...). Hori guztia gutxi balitz eta harrigarria badirudi ere, Hezkuntza Sailak bere oinarrizko betebeharrei uko eginez, gurasook 12 urte geroago gure patrikatik ordaindu ditugu 2 urteko haurren ikasgelak eta jangela egokitzeko obrak, ildo beretik, ordaintzen ari gara gela horien gastu guztiak: alokairua, argindarra, berogailua, telefonoa... Horrez gain, Beasaingo 17 familiari beraien 2 urteko haurrak Alkartasuna Lizeoan eskolaratzea ukatu die Hezkutza Sailak (konpondu nahi ez duen toki arazoa dela eta).

2) Gurasoak, Alkartasuna Lizeoaren behar eta egoeraz hitz egiteko, Hezkuntza Sailari ahoz eta idatziz, behin eta berriro, elkartzea eskatu diogun arren (Beasaingo alkateak ere deitu du gure izenean), bilera egitea ukatu egin digute...

3)Eta soka luze horren azken korapiloa etorri da orain: dekretu bat argitaratzeko mehatxua egin digu Hezkuntza Sailak, Alkartasuna Lizeoaren hezkuntza proiektua desagertaraziko duena, batetik, Lizeo Alkartasunaren hezkuntza proeiktuari Derrigorrezko Bigarren Hezkuntza (DBH) osoa (12-16 urte) kendu egingo litzaioke dekretuz Beasaingo gainontzeko ikastetxe publikoekin uztartzeko eta, bestetik, Haur Hezkuntza (HE) eta Lehen Hezkuntza (LH) osoa (2-12 urte) Beasaingo gainontzeko ikastetxe publikoekin uztartzea proposatu du Hezkuntza Sailak.

Egoera horren aurrean Alkartasuna Lizeoko Guraso Elkarteak:

1.- Guraso guztiei egoeraren berri ematea erabaki du batetik, eta, bestetik, Hezkuntza Sailaren asmoen aldeko eta aurkako sinadurak eskatzea.

Gurasoen % 85 Hezkuntza Sailaren asmoen aurka azaldu da.

2.- Alkartasuna Lizeoko Guraso Elkarteak maiatzaren 27an arratsaldeko 18:00etan Beasaingo Institutura joateko deia egin nahi die guraso guztiei (500 familia), bertan elkartuko baitira Hezkuntza Saileko arduradun guztiak Alkartasuna Lizeoaren etorkizunaz hitz egiteko.

ALKARTASUNA LIZEOKO GURASO ELKARTEA

Erantzunak

Galtzagorri

2008-05-27 : 01:17

Nire uste apalean idatzi horretan jasotako adierazpen askok ez dute zer ikusirik errealitatearekin (ez administrazioak era orokorrean EAE osorako planteaturikoarekin eta ezta ere Beasainerako hitzegindako Hezkuntza antolaketarekin). Hala ere, argi eta garbi dago oso oso zaila dela informazio zuhurra eskuratu ahal izatea eskola/ikastola horretan darabilkizuen giro nahasian, eta itxuraz, propio ari zarete postura hortan izua zabaldu asmoz eta barne kohesioa mantendu nahiean. Jarraitu demagogia lanetan.

Alkartasuna Lizeoko Guraso Elkartea

2008-05-27 : 10:36

Galtzagorri beti deabrua edo etsaia izan ohi da euskaldunontzat. Zure adierazpenei erantzunez:

"Argi eta garbi dago oso oso zaila dela informazio zuhurra eskuratu ahal izatea eskola/ikastola horretan darabilkizuen giro nahasian"

Egoeraren berri emateko Lizeo Alkartasunako Guraso Elkarteak bilerak egin ditu guraso guztiekin maiatzaren 19an eta 20an. Bilera horietan, Hezkuntza Sailaren bi ordezkari izan dira: Jose Luis Marañon (EAEko Eskola Maparen zuzendaria) eta Manu Uribe-Etxeberria (Gizpuzkoako ikastetxeen zuzendaria). Beraz, Lizeo Alkartasunako gurasoek Hezkuntza Sailaren informazioa zuzen-zuzenean jasotzeko eta kontrastatzeko aukera izan dute.

Hezkuntza Sailak emadako informazioarekin, 487 familietatik, 378 familiak erabaki du Hezkuntza Sailaren asmoen aurka sinatzea. Familia bakar batek ez du Hezkuntza Sailak dituen asmoen alde sinatu.

Beraz, ezin esan daiteke Lizeo Alkartasunako gurasoak hartu duten erabakia informazio desitxuratu eta demagogikoan oinarrituta hartu dutenik. Hori gezurra da.

ALKARTASUNA LIZEOKO GURASO ELKARTEA

Galtzagorri

2008-05-27 : 14:13

Alkartasuna Lizeoko Guraso Elkarteari, Galtzagorrik.

2 gauzatxo:

- Aipatzen dezute (edo duzu, ez bai dut uste Alkartasuna Lizeoko Guraso Elkarteak erantzungo zidanik horrelako bizkortasunarekin) Lizeo Alkartasunako Guraso Elkarteak bilerak egin dituela guraso guztiekin... 127 guraso izan dira hain zuzen ere 2 bilera horietan parte hartu dutenak,

horrek zer esan nahi du besteei ez zitzaizkiela axola zeuon azalpenak?

zergatik diozu (edo diozute) bertan Hezkuntza Sailaren informazioa eskuratzeko aukera izan zela? Zergatik ez zenuten ba zeuon deialdian adierazi Administrazioa bilera horietan izango zela? Agian pentsatu zenuten bilera deituz luzatu zenuten "eskutitz-gonbidapenak" parte-hartzera gonbidatzen zuela?

-Siñadurei dagokionean demagogia berriro ere; lehen eskuratutako sinadurak (orain bi urte) noiz arteko iraungipena dute? Siñadura kentzerik ba al dago edota espreski eskatu behar da? Hezkuntza Sailak dituen asmoen alde zer sinadura eskatu du Administrazioak? Zuek kudeatu behar al dezute hori ere? Zein garantiekin? Ondo izan eta zaindu.

Alkartasuna Lizeoko Guraso Elkartea

2008-05-28 : 07:54

Prest gaude Hezkuntza Sailak nahi duen informazio guztia gurasoei helarazteko eta nahi izanez gero sinadurak nortario aurrean emateko. Prest al dago Hezkuntza Saila (eta zu zeu galtzagorri) gurasoek erabakitzen dutena onartzeko eta errespetatzeko???

ALKARTASUNA LIZEOKO GURASO ELKARTEA

Salbatore

2008-05-28 : 16:00

>

Lizeoko Guraso Elkartearen oharrak eta iritziak irakurrita ematen du hemen arazoa duten bakarrak zuek eta Hezkuntza Saila zaretela, are gehiago, Beasaingo eskola publiko (nahiago baduzue, ikastola publiko) bakarra zuek zaretela! Eta non daude beste ikastetxeak (Murumendi, Loinazpe, Institutua)? Eta irakasleak? Eta Beasaingo beste herritarrak? Eta inguruetako herrietakoak? Eta Udala?

Larunbateko Goierriko Hitza irakurri zuenak ere hala pentsa dezake (hor ere ikasle ohiren bat lanean? Ala alde guztietako informazioa kontrastatzeko astirik ez eta zuen testuetako zatiak beste gabe hartzen dituen profesional bat?); horri deitzen diot nik "objetibotasuna" (akaso, adiera honekin bai: alde bakarreko argumentuak jaso, egia oso eta bakar gisa hartu eta objetu edo xede bakarrarekin erabiltzea: izan dadila nik nahi bezala eta besteak hor konpon!).

Ni ere Beasaindarra naizenez, eskatuko nizueke zuen iritzia ematen duzuenean "Beasaingo herritar batzuk", "Beasaingo herritarron zati bat..." gisako esaldiak jarriko bazenituzte, bestela errealitatea manipulatu eta nire izenean ere hitz egin nahi duzuen susmoa utziko didazue.

Gainera, ziur nago gauza batzuetan arrazoi duzuela, beste batzuetan ez,...beti bezala! Zuen jokabidea ikusita argi ikusten ez dudana hau da: Beasaingo herritar guztientzako onena nahi duzue ala zuentzako onena iruditzen zaizuena?

Orain dela bi edo hiru bat urte bezala beste eskola eta Beasaindarren gainetik, zuena eta bakarrik zuena egiteko prest zaudete ala besteekin batera Beasaindar guztientzako eskola-mapa adostu bat eraikitzeko prest?

Ez nuke mesfidantzatik egindako galderekin bukatu nahi, mesfidantza eta kezka guztien gainetik inplikatutako guztiei nire animoak ematen dizkizuet: ea ba asmatzen duzuen denon artean Beasainek, hau da bertako herritar guztiek, merezi dugun giroa eta eskola publikoa(-ak) zein diren ADOSTEN! Beasaingo umeek eskertuko dute!

>

>