MySpace: hantxe dago gaur euskal musika gazte (ia) guztia
Munduko webgune handienetakoa da MySpace. Lagun eta kontaktu-sareen gainean eraikitako webgune horietako bat da, musikaren mundura lerratu da gehienbat. Eta izugarrizko arrakasta du horretan. Euskal Herriko ia musika gazte guztia bertan dago. NewsCorp konpainiaren jabetza da MySpace, Rupert Murdoch nagusi eta Jose Maria Aznar kontseilari duen enpresarena.
Sare sozialen eran hazitako webgunea da MySpace. Beharbada Friendster izan zen era horretako lehena, baina audientzia masiboa lortu zuen lehena MySpace izan zen, bereziki Estatu Batuetan. Gero etorri ziren Bebo eta Facebook. Proiektu lokalagoak ere arrakastarekin ari dira, adibidez Tuenti Espainian: Euskal Herriko Unibertsitatean ibilitako milaka lagun daude han emanda, estatistikei jaramon egiten badiegu.
Niri apur bat arrotza egin zait MySpace. Ez dut ulertzen ondo bere funtzionamendua, diseinuaren aldetik orri askok duten itxura atzera botatzekoak egiten zait, eta Messenger bidez komunikatzen den belaunalditik aparte samar nago: dexente zaharragoa naiz.
Kristo guztia dago
Hala ere, MySpace-ren garrantzia gero eta handiagoa ebidentea egiten zait azken aldi honetan. Gazteen lokaletarako kontzertuen afitxetan, zuribeltz itxura fanzineroa dutenetan ere, gero eta MySpace gehiago ikusten dut Euskal Herriko kaleetan. Halako taldea, nongoa, estiloa eta MySpace-ko helbidea. Gose taldearen kontzertu bat iragartzen ikusi nuen, adibidez, URL honekin: www.myspace.com/gosegose Nik ez ditut ezagutzen, baina hantxe entzun ahal izan dut beren musika.
Eta Gose, bezala, beste hainbat:
- Kokein
- Berri Txarrak
- RIP (bueno, hau zaletu batzuek egindakoa da, punk talde mitikoaren omenez)
- El desván del Macho: Euskal Herrian erdaraz egiten den musika ere bai, noski, eszenara itzuli diren hauek bezala
- Deabruak Teilatuetan- Atzo bisitatu nituenean en linea ahora abisatzen dit ikono batek ñir-ñir eginez. Ez dakit haiekin zuzenean txat egiteko aukera ematen didan horrek, suposatzen dut baietz.
- Petti
- Jone kantautore gaztea
- Zea Mays
- Anestesia
Eta beste hainbat, zoaz horien edozein orritara, eta haien lagunetan nabigatzen ibili. Kristo guztia dago.
Objektu soziala: musika
Gehienetan, musika entzuteko aukerarekin. Jogailu majoa dauka, eta kantuen ondoan download botoia ikusten da musika jaisteko. Hala ere, horretarako kontua izan behar da bertan, eta erregistratu, eta orduan ere, kantu batzuk jaitsi ahal izango dituzu baina beste batzuk ez: Zea Mays-enak baietz ematen du, baina Anestesiarenak ez, adibidez.
Azkenean, uste dut hori dela kakoa, musika. Iazko uztailean teknologo finlandiar bat izan zen Euskal Herrian, Jaiku zerbitzuaren sortzaile Jyri Engestrom. Sare sozialen tipologiaz eta funtzionamenduaz hitz egin zigun, bereziki, sare sozial batek objektu sozial jakin behar duela muinean funtzionatzeko, ez dela bakarrik sozializazio hutsa. Eta MySpace-ren kasuan objektu sozial hori musika dela aipatu zuen.
Uste dut arrazoia zuela Engestromek. Tipo azkarra. Handik gutxira, Googleri saldu zion Jaiku.
Murdoch eta Aznar
MySpace bera salmenta milioitsu batekin notizia izan zen 2005. urtean. Rupert Murdoch hedabideen jauntxo eta nagusi ezagunaren konpainiak, News Corporationek, erosi zuen 580 milioi dolarretan. Batzuek esaten dute orain, prezioa merke irten zitzaiola, sare horren potentzialitatea ikusita. Murdochek negozioetan asmatzen duenik ezin da ukatu, baina eskuin-muturreko medioak sustatzen dituela ere leporatzen. Newscorp konpainiaren administrazio kontseiluan, Jose Maria Aznar Espainiako gobernuburu ohia dago. The Wall Street Journal ere erosi zuen, eta ondoren euskarari buruz han idatzitakoak ezagunak egin ziren. Hura sinatu zuen kazetariak jabetza ekonomikoaren eskusartzea ukatu zuen.
MySpace-n lerro editorialik ote dagoen ez dakit. Trafikoa bai, ikaragarria, eta eduki musikalak ere bai, bistan da. Euskal Herrian horrela bagabiltza, Kalifornian eragin txikiagoa ez dela suposatzen dut.
Zergatik?
Eta zergatik dago euskal musika MySpace-n? Nire lankide Jatsu Argarateri galdetu diot. Kokein taldeko bajista da, eta webgune bat badute domeinu propioarekin, kokein.com, baina hala ere, MySpace-n ere orria. "Denak gaudelako, taldeen arteko lagunak, konexioak, giroa mugitzen du horrek, eta batzuk daudenez, eta haien lagunak, azkenean denak gaude", erantzun dit Jatsuk. Baina sakonago jo izan nahi dut, eta galdetu diot: Aizu, baina, fondo beltz hori beharrezkoa da? "A, hori niri ez galdetu, MySpaceko orriaren gestioa beste batek darama taldean".
Erantzunak
Euskadi Gazteak badu ere myspace delako bat. www.gaztea.com/mareagaztea
Euskal taldeek ere badute bere lekua bertan. Gero eta gehiago gainera
MySpacerentzako promozio handia izan da aurten Espainian, gainera, RTVE telebista kate publikoak plataforma horren bidez bideratu izana Eurovision kantu-lehiaketarako hautagaitza aukeratzearen prozesua. Tranpa eta txorakeria mordo baten ondoren, azkenean bost kantu aukeratu dituzte internautek, horien artean, Arkaitz izeneko 20 urteko bizkaitar baten Un Olé abestia.
Parte hartu duten guztien estatistika bitxi batzuk argitaratu zituen Iturrik bere blogean duela egun batzuk.
Kantu definitiboa aukeratzeko, urrats gehiago daude orain, epaimahai profesional batek beste bost aukeratuko ditu, eta publikoaren bost hauekin batera, 10 horien artean lehia izango da TVE1 katean martxoaren 8an. Han aukeratuko omen da nor doan Serbiara (Belgraden da Eurovision, maiatzaren 24an).
eta Messenger bidez komunikatzen den belaunalditik aparte samar nago: dexente zaharragoa naiz.
Ez pentsa, messenger erabiltzaile gehienek zure adinekoak dira, 25-50 urte tartekoak, alegia. Ikus grafiko hau
Bapateko mezularitzan nagusi da Messenger, erabiltzaileeen %95arekin, oso-oso atzetik Skype (%11) eta azkenik Yahoo (%7,4) eta Google (%5,4).
(Iturria: La Sociedad de la Informacion en Espana 2007)
Myspace globalizazio onargarri baten eredu da. Baina gauza bera esan daiteke blog eta fotolog (beste hainbaten artean) bezala. Azken batean, gauza bakoitzaren erabileran datza kontua. Ezin da ukatu myspace atariari esker musika talde askok merke eman dezaketela ezagutara beraien musika. Harremanak egin ahal dituztela. Kontzertuak lotu. Aldi berean tresna oso baliagarria da kazetaritza edo komunikazio ikuspegitik. Talde askok beraien albiste zuzenenak bertan ematen dituzte eta bertatik jasotzen ditugu hainbatek albisteak. Orain esaterako modan dago disko osoa bertan jartzea argitaratu aurrez denek entzuteko eta gustuko dutenek erosteko. Nire ustez musika talde txiki eta ertainei begira tresna bikaina da. Atzean nor dagoen aztertzea eta garrantzia ematea beste gauza bat da.
Beste kontu bat da myspace pertsonalena. Kutreak izan daitezke, nabigatzeko zailak, baina horrela ere ez dute erabilgarritasuna galtzen. Txat berriak dira. Ligoteo guneak...
Baina aipatzen dituzun abantaila horiek guztiak edozein blogetan aurki daitezkeen gauzak dira. Begira Danbaka.com webgunean taldeek dituzten blogak, euren kantak entzuteko aukerarekin. Nik ez daukat inolako problemarik taldeek Internet erabiltzearekin, erabat aldekoa naiz. Myspace da gustatzen ez zaidana, ez zertarako erabiltzen den.
Horra David Archuleta MySpace-n. American Idol telebista saio eta fenomenoan aurtengo faboritoetako bat da Artxuleta hau, Miamin jaioa duela 17 urte, orain Utah-n bizi dena.
Hemen eta hemen informazio gehiago.
Gose taldearen web orri ofiziala dago muyspacen, Aznar dabilen enpresa horretan. Alabaina Gose taldeko kantaria, Aznarrek itxitako Egunkariaren aldeko ekitaldietan.
Elgoibarren.net atarian MySpace-n tokia duten Elgoibarko eta Mendaroko taldeen zerrenda atera dute.
Pozten naiz Luistxok gai honen inguruko haria zabaldu izanaz, izan ere, aspalditik kezkatzen nauen gaia da hori, eta amarauna arakatuta, oso gutxi izan dira plataforma hori kolokan jarri duten komentarioak. Euskal Herriko http://www.arteleku.net/4.1/blog/mrbe/ (Auskal Muturreko Musika) blog interesgarria eta zirikatzailea da, izatekotan, nire ustez hausnarketarik azpimarragarrienak biltzen dituen bloga. Hain zuzen ere, blog horretan myspace zalantzan jarriz esan izan direnak biltzen saiatuko naiz hemen, gure ikuspegia nolabait islatzen laguntzeko.
Hasi aurretik argi utzi nahi dut ez dudala ezer pertsonala plataforma hori erabiltzen dutenen kontra. Bai, ordea, inertziaz eta gauzak bi aldiz planteatu eta kuestionatu gabe jardutearen kontra.
Hasteko, esan bezala, ez diot inori ukatuko myspace bezalako azpiegitura batek duen potentziala alde guztietatik: doakoa da, musika entzuteko-zabaltzeko aukera ematen du eta sareak sortzea ahalbidetzen du. Baina harrigarria irudituko zait beti ikustea nola multinazionalen kontrako diskurtsoa saltzen duen hainbat talde eta bakarlari sare horren barruan dauden.
Esan bezala, Aznar kontseilari duen Rupert Murdochen menpean dagoen plataforma da hori. Imajinatzen duzue Myspaceren ordez PP deituko balitz, eta bertan Fermin Muguruza bezalako baten espazioa topatzea??... ba.... bilatu myspacen... tatxaaaan.
Benetan, inork uste al du Murdoch eta abarrek musikarioi lagundu nahi digutela? Eta doakoa izan arren, uste al du inork horrek ez diela etekin ekonomikorik ematen Aznar eta abarrei?
Multinazionalen kontra gaude bai (edo hori saldu nahi dugu), baina multinazional batean sartzen garenean myspacen egotea defenditzeko erabiltzen dugun diskurtso berbera aplika dezakegu, ezta? hau da, artistarentzat ez du kostu ekonomikorik (irabazi handiak, ordea) eta jende askorengana heltzeko aukera ematen digu. Beraz, zergatik ez, multinazionalen eskutik, aurrera (en fin). Rage against the machine taldeak edo Manu Chaok hori egin izan dute azken urteotan. Ezkerreko diskurtsoa saldu multinazionalen barruan, aberasteko helburuarekin (oso ezkertiarra, ezta?).
Nahi baduzue, orain arte aipatutakoa azalekotzat jo dezakegu. Baina ikus dezagun multinazionalek edo, kasu honetan, myspacek nola jokatzen duen.
Ez da hausnarketa oso sakonik egin behar jakiteko myspace duten talde guztien bisita kopuruak kontrola ditzaketela. Horrek esan nahi du multinazionalek jakin ahal dutela zer den jendeak gehien entzuten duena, tendentziak norantz aldatzen diren..azken batean... azpijokoa egiten zaie. Batek esaten zidan noise (zarata) estiloak ez duela sekula arrakastarik izango eta ez duela zertan kezkatu, baina...gauza bera pentsatzen zuten punkyek duela 30 urte...egon ziur, multinazionalek inoiz ikusten badute noiseak dirua eman dezakeela noise argitaratuko dute.
Hasiera batean, myspacen izena emateko kontratu bat onartu behar zen (beste hainbat lekutan bezala). Kontratu horren arabera (inork irakurtzen ez duen kontratu horren arabera) bertan publikatzen zen musikaren jabe bihurtzen zen myspace. Artic Monkeys taldearen adibidea dugu hor: kantak myspacen zintzilikatu, izugarrizko arrakasta lortu, diskoa salgai jarri (The Beatlesen mailako taldeen kopuruak gaindituz) eta orduan Myspacek auzitara eraman, kantak, kontratua sinatu ondoren, myspacenak zirelako. Orain klausula hori aldatu badute ere, mozorrotu baino ez dute egin. Orain, antza, kantak ez dira myspacerenak, baina myspacek erabil ditzake bere zerbitzu guztietan; esaterako, myspacek zigilu bat sortzen badu, bertan sal ditzake zure kantak (imajinatu myspace volumen I bilduma egiten dutela eta bertan saltzen dutela zure kantaren bat. Ez pentsatu ezer eska ahal zaienik).
Laburbilduz, myspace, munduan dagoen musikaren %90aren jabe litzateke (bueno, ez, IZAN BADA). Erabiltzaile askok uste du aprobetxatzen ari direla myspacez...baina, argi izan eskaintzen dutena baino etekin handiagoa lortzen dutela.
Sare sozialaz ere goraipamenak irakurri ahal dira nonahi, baina orrialdeak arakatuz gero konturatuko gara komentario eta add gehienak interesatuak, artifizialak edo hutsalak direla, gune batetik bestera kopiatua autopropaganda egiteko asmoz, inolaz ere eztabaidarik sortzeko asmoz edo hausnarketarik plazaratzeko asmoz. Baina tira, horren errua ez dauka myspacek, baizik eta bere erabiltzaileek.
Hitz bitan, musika taldeen musika eta bideoei esker ari da dirutza lortzen myspace, izan ere, 250.000 erabiltzaile berri lortzen du egunean!!! egin kontu.
Talderen batekin benetako harremana izateko gogoa baino ez da behar, guztiok posta helbide bat dugulako.
Aiba dios!! Zelako tontokerixa esan duzu Ander!!! Ay ene ondiokan infantil mailan!!!!
Ta gainera gezurra, nahi duzunean bisitatu www.gose.info Gose Taldeen Web Ofiziala
Ala Ander, joan zuzen eta okertu ezkerretara...Mesedez..
Ba hauxe da gaurko berriak dakarrena:
Sony, Universal eta Warnerrekin hitzarmena sinatu du MySpacek
Agentziak
New York
Sony BMG, Universal Music eta Warner diskoetxeekin hitzarmena sinatu du MySpace sare sozialak, hala hainbat eratako musika zabalkunderako -streaming, MP3, dei tonuak...- nola kontzertuetako sarreren eta merchandising-eko produktuen salmentarako. Datorren astean aurkeztuko dute hitzarmena, eta baliteke EMI diskoetxea ere hitzarmenaren sinatzaileen artan izatea.
Akordiorako oztopo nagusietako bat Universal etxeak 2006an, egile eskubideak ez errespetatu izana leporatuz, MySpaceren aurka hasitako auzia zen, baina gai horren inguruan ere akordiotik hurbil dira egun bi aldeak.
Hitzarmen berriak iTunesen konkurrentzia izateko eta «belaunaldi berriko MTV» bihurtzeko bidean jarriko du MySpace, adituen ustez.
Pertsonalki nazkatu samarra nago myspace-ekin, denak oso antzekoak iruditzen zaizkit, kutre samarrak. Musikarekin ez, baina argazkiekin beteta daude Fotologak ere. Nire inguruan izugarri ugaritu dira, "mundu guztia dagoelako" hor.