Teknofiloen albistegia
10

Mullet edo orrazkera abertzalearen arbuioa

Erabiltzailearen aurpegia
Sustatu
2008-01-25 : 09:01

Euskal orrazkerarik abertzaleena da seguraski: gainaldean motz baina lepoaldean ilea luze beherantz, alkandora gaineraino. Eta termino zehatzak deskribatzen du ingelesez: mullet (Wikipediako sarrerak "euskal separatisten" estetika ere aipatzen du). Baina, hara!, askorentzat (kanpotarrentzat bereziki) zaharkitutako estetika itsusi baten adierazgarria da, eta halaxe deskribatzen du zehatz Wheylonak, Donostiako blogari kaliforniarrak.

Ingelesezko bere eskoletan 22 urteko mutil galaia zeukan, baina xarma guztia galdu du inozo halakoak mullet batekin etorri denetik. Eta gainera, hain euskalduna ere ez da orrazkera hau. Spain eta Mullet terminoak aldi berean bilatu Flickr-en eta ikusi: penintsula osoa mullet-illaz josia dago (adibidekoa Valentziakoa da).

Erantzunak

eli
2008-01-25 : 11:33

Euskaraz "korkoi" edo "korrokoi" esan beharko litzaioke orrazkera horri, nire ustez. Mullet arrain horren ingelesezko izena da. Oso ohikoa da korkoia gure kaietan, ziurrenik kakajalea delako eta arrantzatuz gero berriz uretara botatzeko ohitura dagoelako (Bizkaian eta Gipuzkoan behintzat. Lapurdin jan egiten dute). Izen egokia da. Izan ere, korkoiak beltz du bizkarraren goiko partea, eta grisaxka aldeak, orrazkera hori daramatenek bezala.

eli
2008-01-25 : 12:43
John McArron
2008-01-25 : 13:29

Tristea, oso tristea da...

Luistxo
2008-01-25 : 13:31

Getarian lasuna esaten zaie. Joan den astean foka azaldu zen portuan eta lasunak jateari ekin zion lasai asko kameren aurrean.

eneko
2008-01-25 : 13:36

Donostian Kursaaleko zubian korkoiak arrantzatzen zituen batek harrapatutakoak egunero bidaltzen zituen Pariseko merkatuko arraindegi batera. Hortaz bizi zen tipoa!

Jabi
2008-01-25 : 13:42

Tira, badira mullet edo melenilla mota batzuk, batzuk estetika "ochenteroaren" baitan koka daitezke eta beste batzuk duela urte gutxi hedatutako bigarren olatu baten barruan, giro "modernitoetan" aski zabaldu dena.



Edozein modutan, "orrazkera borrokilla" hori ez da azken urteotako asmakizuna. Zinez harritu ninduen Eulalia Abaituak XIX. mende bukaeran Arratia aldean ateratako argazkiak ikusteak. Bertan, txapelaz barik burua kapelaz janzten zuten gizon zaharrak ageri ziren (aski adierazgarria txapelaren betikotasun eta jatortasuna barneratuta dutenen aurrean). Baina are gehiago harritu ninduen aititok kapela azpian orrazkera horixe zeramatela ikusteak. Ez ditut sarean aurkitu argazkiak baina Bilboko museo etnografikoak atera zuen liburu batean ikus daitezke.

mitxo
2008-01-25 : 23:05

Nik emakume heterosexual bezela hitz egingo det:

Nei gustatzen zait nola geratzen zaien mutilei "mullet" delako hori. Ez da hile luzea, ez da motza, "indefinizio" interesgarri bat da. .... eta mutiko gaztetxoei jartzen dietenean: ikaragarri politte daude! Modan baldin badago edo modaz pasata, nei bost!



Aupa mulletak! ;)



Bestetik, ondo dago hemen mutilak modu berezian juten badira. Garai hauetan denok modan egon behar degula ematen du, eta denok berdin. Europako lekuren batean jende multzo batek zerbait berezia eramaten badu... ondo.



Dublinen egon nintzen Urrian. Hango gazte-aterpetxeko harreran nengoela, aldizkari bat begiratzen hasi nintzen. Orrialde bat ireki eta hara!: Donostiko badia artikulu baten goikaldean. artiukulua Donostin bi urtez ingelesezko klaseak emandako iralndar batek sinatzen zun. Gure eguraldiari buruz hitz egiten zun (galernei buruz adibidez) eta beste gauz batzuei buruz. Beste argazki bat, "mullet" batena zen hain zuzen. Artilukuan esaten zuenez, gazte abertzaleek eramaten ohi dute hori.



Eta honek beste gauza bat gogora arazten dit: Dublinen mutil guztiek hilea zerora moztuta eramaten zuten. Denak hoollinganak edo rugbi jokalariak ematen zuten. Oso itsusi zeuden noski! Mutil guapo batzuk ikusi genituen, bai. Baino batzuk frantsesez hitz egiten zuten, eta besteei buruz, uste degu etorkin polakoak zirela. Eta dena, hile motz horri esker!



Markel
2008-01-27 : 22:16

Bai! Nik ere ikusi dut Arratiako aiton horren argazki hori, zirrara egiten du, hagitz polita da. Horrek orain dagoena moda kontua baino zerbait gehiago dela pentsarazten du. Polita da orrazkera hori tradizioz heldu zaigula ikustea (zinetan hala bada!).

Sustatu
2008-01-28 : 09:23

Oso interesgarria, Jabi. Inork badu liburu hori eta eskanerren bat eskura? Gustura argitaratuko genuke adibideren bat Sustatun. Mila esker aldez aurretik.


Sustatu
2008-01-29 : 16:31

Hemen hasitako truke interesgarriak, jarraipena izan du Sustatun:


Erantzun

Twitter ikonoa  Facebook ikonoa  Sartu