Eguberri hauetan, ateismo apur bat
Erreferentzia ateo pare bat Gabonetako egun doatsu hauetarako. Kalean da Edorta Jimenez idazlearen eta Joxe Arregi teologoaren eztabaida liburua (Jainkorik bai ala ez). Bi autoreek eztabaida publiko bat ere egin zuten duela egun batzuk, eta bideoak sarean jarrita daude hemen.
Jimenezekin topo egin nuen duela gutxi, eta teologoarekin izandako eztabaida hauen inguruan abisatu zidan bere artileria bi autoretan aurkitu duela batik bat:
- Michel Onfrayren Ateologia tratatua delakoa
- Richard Dawkins, the God Delusion liburua.
Onfrayren inguruan ezin dut asko esan, baina Dawkinsen liburua bikaina iruditu zait. Esan didate Txillardegik ere aipatzen duela Dawkinsen obra hau bere azken liburuan, Horretaz delakoan. Nolanahi ere, Dawkinsek badu beste plus bat: Interneten zeharo integratua dagoen egilea da (biologo darwinista bat, izatez).
Egun elizkoi hauetan argudiorik behar baduzu, horra:
Berak parte hartu duen dokumental eta eztabaida filmatu askotako pusketak ikus daitezke bideoan, askotan jogailuarekin osorik ikusteko moduan, eta beste batzuetan baita P2P sistemaren batekin osorik deskargatzeko aukerarekin. Eta beste hainbat gauza:
- Mundu osoko talde ateoen inguruko informazioa
- Eztabaidarako posta-zerrenda eta foroak
- Irakurgaien datubasea eta eztabaidagai arrazoituak
- Sare sozialak gunean bertan eta Facebook-en...
Nonbait ateismoa modan dago... best-sellerren zerrendetan ingelesezko munduan bederen. Beste autore interesgarri bat Christopher Hitchens da. Haren libururik ez dut irakurri, baina Ama Teresa Kalkutakoari hemen ematen dion errepasoa polita iruditu zait.
Erantzunak kargatzen...
