SecondLife-n Lila Eguzkia topatu nuenekoa

Duela aste batzuk jarri nuen SecondLife-n ordenagailuan, eta osteratxo bat egitea erabaki nuen. Erregistroaren ondoren, sartu nintzen, eta ertz biribilduko avatar femenino batekin topo egin nuen: LILA EGUZKIA, izena zuen pantailan ikusten zenez. Kontxo, hau zortea, sartu eta zer topatuko lehenbiziko gauza, euskaldun bat! "Kaixo, euskalduna zara?", idatzi nion, eta bidali nion mezua. Zeinu arraro batzuekin erantzun zidan, zoaz pikutara esanez bezala, nire akzesoa blokeatu zuen, ez dakit, halako zeozer. Ze, klaro, nirekin barik loro erraldoi batekin zegoen berriketan edo ligatzen edo ez dakit zertan, halako zeozertan. Lila Eguzkiarekin minutu galdu ondoren, beste lau galdu nituen noraezean, eta deskonektatu nintzen.

Gero konturatu nintzen zer zen Lila Eguzkia hura: SecondLife-n erabiltzaile bat sortzen duzunean, avatar izen bat aukeratu behar duzu aukera sorta itxi batean eta, garai hartako deitura-sorta hartan, euskarazkoa zen bat: Eguzkia. Gaur egunean, izena emateko orrian deitura aurkitzeko aukeretan ez dago Eguzkia gehiago, baina bai Etchegaray (Ezpeletako kardinala bidali ote du Vatikanoak Secondlife kristautzera?). Egia esan, ez dakit nola doan izenen kontu hau, baina Eguzkia berriz ikusiz gero SecondLife-n, ez egin neuk bezala, euskalduna izango denik pentsatu.

Ez naiz harrezkero SecondLife-ra itzuli. Baina tira, hurrengo itzultzen banaiz, baditut pista batzuk bederen, benetako euskaldunekin topo egiteko.

• Gaur8-k artista euskaldun bat aurkitu du, eta artikulu bat dedikatu dio kontuari, SecondLife-n dauden bi komunitate aipatuz: Euskaldunak eta Euskarians.
• Ana Malagon ere ba omen dabil
• Euskal Etxearen helbidea hauxe omen da.
• Iban Zalduak ere egin du inkurtsioa, hala nola Jospeh Conraden Kurtz kapitainak Ilunbeen Bihotzean, birtualki edo literarioki, Philip K. Dick-en topo egiteko.

Tira ba, horra pista batzuk. Neuk, bitartean, gustua aurkitu beharko diot halako ingurune batean mugitzeari, ez baitiot oraingoz grazia edo erakarmen berezirik ikusten, 3D mundu horretan denbora emateari. Askoz erakargarriagoak egiten zaizkit 3D inguruneak errealak direnean, Google Earth-en mendi ibilbide bat ikuskatu dezakegunean bezala.

Baina neure eszeptizismotik ere, use dut ondo dagoela euskaldunek ere bidea egitea inguru horretan, ondo dagoela Internet eta teknologikoak libreki erabiltzea nork bere afizio, esplorazio eta burutazioak aurrera eroateko, lehen pertsonan, ala bigarren bizitza avatartar batean. Gora Bigarren Bizitza!