Euskara-ezagutzaren eskakizuna kentzen GFAn
Gipuzkoako Foru Aldundian, euskara-ezagutzaren eskakizuna komeni denean ken daitekeen zerbait dela erakutsi dute. Esplikaziorik batere gabe, GFAk bere Administrazio Orokorreko Teknikariei euskara zertxobait gutxiago eskatuko die. Gora hizkuntza-planifikazioa!
Listo, egin dute berriz ere. GFAko lanpostu bati euskara-ezagutza leundu egin diote. Ez litzateke hain kritikagarria izango baldin eta lanpostu berdin bati eskakizun hori zorroztu izan baliote, edota beste nolabaiteko konpentsazioa egin izan balute. Baina ez da halakorik izan. Esplikaziorik batere gabe, GFAk bere Administrazio Orokorreko Teknikariei euskara zertxobait gutxiago eskatuko die. Gora hizkuntza-planifikazioa!
Datuak
Konkretuki, atzeratu egin diote lanpostu bati, berari dagokion euskara maila betetzeko epea.
Eskakizunaren aldaketa: (PDF bat)
(Lehengo derrigortasun-data: 2004/01/01; Data berria: 2007/12/31. Aldaketa derrigortasun-data atzeratzean datza beraz. Kontua da, gaurko egunean, 4. hizkuntza-eskakizuna nahitanahiezkoa izatetik ez izatera pasa dela. Hartara, posible izango da, oposizioa orain egiten ari baita, benetakoa baino bi maila gutxiagoko ezagutza duen norbait sartzea. Gainerako ezagutza meritu moduan baloratuko bada ere, ez da ezinbesteko baldintza izango).
Lan-eskaintzari buruzkoak: (beste PDF bat)
Erreparatu 6. orrialdeari, bertan adierazten baita eskainitako zein diren 12 plazei dagozkien hizkuntza-eskakizunak eta derrigortasun-datak.:
2. Plazak eta txandak.
Txanda librean:
* 4 plaza, 4. hizkuntz eskakizun derrigorrezkoa dutenak.
* Plaza 1, 4. hizkuntz eskakizuna duena, eta derrigortasun data 2007-12-31.
Ezgaitasuna duten pertsonentzat gordetako kupoa txanda librean:
* 2 plaza, 4. hizkuntz eskakizun derrigorrezkoa dutenak.
Barne sustapeneko txandan:
* 4 plaza, 4. hizkuntz eskakizun derrigorrezkoa dutenak.
* Plaza 1, 4. hizkuntz eskakizuna duena, eta derrigortasun data 2007-12-31.
Ezgaituentzat eta barne sustapenerako gordetako plazak betetzen ez badira, txanda librekoei erantsiko zaizkie.
Eskakizuna gutxitu berri dioten plaza txanda librean eskaintzen diren 4etako bat da.
Ondorioak
Lanpostuen ezaugarriak eta, beraz, horiek okupatzen dituzten lagunen betekizunak, denboran aldatzea logikoa da, zerbitzuaren premiek eta beharrek ez dutelako zertan beti berdinak izan. Nekez uler daiteke, ordea, zer zerbitzu-premiak esplika lezakeen horrelako aldaketa bat, are gutxiago legeak debekatzen duen une batean egindakoa.
Bai, debekatutako unean. Kontuan izan behar da 2006ko lan-eskaintza publikoan eskainitako lanpostua dela eta oposizioak abiatuta daudelarik ez dagoela eskainitako lanpostuen ezaugarriak aldatzerik haiek erabat bete artean. Logikoa da arauek hori galaraztea, lanpostu horietara aurkeztu direnei iruzur egitea bailitzateke bestela, segurtasun juridikoa bazterrera botatzea baita. Ezin al da konprometitutako eskaintza errespetatu eta, lanpostua bete ondoren, behar diren aldaketak egin?
Diputazioak hartutako erabakia, gainera, arriskutsua da foru-erakundearentzat berarentzat, zeren baliteke lanpostu horretara aurkeztu direnen artean haserrea piztea. Izan ere, oso probablea da. Zer gertatuko da baldin eta, aldaketa horren ondorioz, lehengo baldintzetan sartuko litzatekeen bat kanpoan gelditzen bada, beste norbaiten mesedetan? Alegia, euskara mailarik ematen ez zuen baten mesedetan?
Erantzunak
Diputatuen Kontseiluak 2006ko maiatzaren 2an onartutako Enplegu Publikorako Eskaintzako deialdian, administrazio orokorreko teknikari 12 plaza eskaini ziren:
- Txanda librean: 4 plaza, 4. hizkuntz eskakizuna derrigorrezkoa dutenak; plaza bat, 4. hizkuntz eskakizuna duena eta derrigortasun data 2007-12-31. Horrez gain, ezgaitasuna duten pertsonentzat gordetako kupoa dago txanda librean: 2 plaza, 4. hizkuntz eskakizun derrigorrezkoa dutenak.
- Barne sustapeneko txandan: 4 plaza, 4. hizkuntz eskakizuna derrigorrezkoa dutenak; plaza bat, 4. hizkuntz eskakizuna duena eta derrigortasun data 2007-12-31.
Labur esanda, 12 plaza dira: 10 plaza HE guztiz derrigorrekoaz; 2 plaza, HE derrigorrezkoaz, baina 2007-12-31 datan.
Enplegu Publikorako Eskaintzako deialdia onartu zenean, AOTeko 12 lanpostu zeuden hutsik, eta legeari jarraiki, horiek atera ziren deialdira, baina kontuan hartuta eskainitakoa «plazak» direla, ez lanpostu zehatz eta jakin batzuk.
Hori da, Enplegu Publikorako Eskaintzako deialdiaren bigarren oinarriak adierazten duen moduan, plazak Gipuzkoako Foru Aldundiko langileria unitariokoak dira eta, beraz, ez dute ematen lana toki edo departamentu jakin batean egiteko eskubiderik. EPEko hautaproba guztiak gainditzen dituen pertsona bakoitzak zein plaza zehatzetan lan egingo duen, dei egindako plaza horien hautapen prozesua amaitzerakoan hutsik daudenen arabera erabakiko da, hautagai bakoitzaren azken puntuazioan duen hurrenkera errespetatuz.
EPEren deialdia egin ostean, Gipuzkoako Foru Aldundiaren lanpostuen zerrendan bi aldaketa gertatu dira, AOT lanpostuei gagozkielarik:
- Alde batetik, Bide Azpiegituretarako Departamentuan beste bi administrazio orokorreko teknikari lanpostu sortu dira; bi berri horiek ere hautagaiei aukeran eman zaizkie, hau da, 12 lanpostu baino gehiago izan dituzte aukeran, baina kontuan hartuta ezin izango direla 12 karrerako funtzionario baino gehiago izendatu, Enplegu Publikorako Eskaintzaren oinarrietan adierazitakoari jarraiki (10. oinarriak dio, hitzez hitz: «Epaimahaiak ez ditu plaza deituak baino izangai gehiago proposatuko»).
- Bestetik, 2007ko otsailaren 13ko 10/2007 Foru Dekretuaren bitartez Gipuzkoako Foru Aldundiko Lanpostu Zerrendaren aldaketa onartu zen, goi mailako ekonomilari lanpostu bat sortzeko, administrazio orokorreko teknikari baten ordez.
Hain zuzen ere, derrigortasun data 2007-12-31an zuen AOT lanpostuetako bat desagertu zen, goi mailako ekonomilari lanpostua sortzeko. Jakina, EPEn eskainitako plazen hizkuntza eskakizunaren derrigortasun data beste AOT lanpostu bati aldatzea beharrezkoa gertatu zen, deialdian eskainitako plazen ezaugarriekin bat egiteko.
Horrela, aldaketa horrekin, EPEko deialdian eskainitako plazak eta bere ezaugarriak hasieran bezalaxe geratu dira.
Berriro ere: 12 AOT plazatatik, 10 plaza HE guztiz derrigorrekoaz; 2 plaza, HE derrigorrezkoaz, baina 2007-12-31 datan.
Hori al da «euskara-ezagutzaren eskakizuna kentzea»?
Amaia Altube
Funtzio Publikoko eta Zerbitzuetako zuzendari nagusia
Ez, ez da lehen aldia, izan ere. Duela 12 urte ere gauza bertsua egin zuten. Orduko eskaintza publikoko proba guztiak amaituta, sei izangai gelditu ziren exijitutako euskara-maila lortu ezik. Legeak zioen kaleratu eta zerrendako hgurrengoa sartu behar zutela. Horietako bosten kasuan zerrendan ez zegoen beste inor.
Seigarrenean, berriz, bazegoen maila ematen zuen bat. Gainera seigarren horren kasuan bazen beste irregulartasun handi bat: berez 4. eskakizuna zuen plaza bat 3. eskakizuna besterik ez balku bezala konbokatu zuten. Derrigortasuna indarrean sartu gabe zegoelarik, baina, 1. eskakizuna (izangaiak zuena, hain zuzen) nahikoa izan zen behin-behinean sartzeko. Galdetuta Diputazioari zer-zela eta eskaini zuen 4. perfila zuen plaza bat 3.a besterik ez balu bezala, hamabi urte hauetan Diputazioak ez du ezer adierazi, ez akatsa izan zen, ez entxufe hutsa. 'Silencio Administrativo'.
Hemezortzi hilabeteko epea zuten seiek, praktikaldia ebra, hain juxtu, lanpostuaren eskakizuna betetzeko. Sei horietatik inork ere ez zuen lortu. Batek zioen anaia hil zitzaiolako ezin izan zuela ikasi, besteak IVAPek ez ziolako klaserik eman nahi izan, beste batek nik ahal dakit zer...
Diputazioak kasu egin zien eta betiko finko izendatu. Horretan guztian aparteko lana egin zuen orduko Arartekoak, Xabier Markiegik, administrazioak euskalduntzeko planifikazio guztien aurka (Ai, Juanito, Juanito, noren esku utzi zenuen Ararteko kargua!)
Agian oraingo kasuan argigarria izan liteke lanpostu hori beterik dagoen jakitea, eta okupatzen duen langilearen egoera. Kirats piska bat badu horrek guztiak, izan ere.