Veleia: aurkikuntzak eta zalantzak
Artikuluak agertu dira asteburuan prentsan, Joaquin Gorrotxategi filologo eibartarra ez dela asko fio Veleiako euskara zaharrarekin... Iruña-Okan, Araban, Veleia herri erromatarrean agertutako euskarazko inskripzioez ari da Gorrotxategi. Ekainean azaleratu ziren, eta begi-bistan ulertzeko moduko euskaraz egoteagatik, eta kristautasunaren agerpen goiztiarrengatik deigarriak dira oso.
Vocento taldearen orrietan azaldu da Gorrotxategirena: iritzi artikulu bat dago, eta gero elkarrizketa bat, galdera osagarri hauekin.
Esan gabe, iradokitzen du tranpa egin duela norbaitek... Inskripzioak Veleian zehar erein izan balituzte bezala. Hala ulertu daiteke, behintzat.
Joseba Lakarra filologoa ere ez da asko fio, artikulu honetan azaltzen denez.
Eta bitartean, Veleian euskara gehiago agertzen dela esaten digute, baina euskara hori erakutsi gabe...
Aipatzen da Gorrotxategirenean eta azken artikulu honetan Henrike Knorr euskaltzainak datu berriak ere aipatu dituela duela gutxi. Eta ez dirudi Knorrek zalantzarik duenik batere, hor irakurtzen denagatik. Baina ez dut Knorren hitzen edo datuen erreferentzia zuzenik aurkitu. Duela aste batzuk hitzaldi bat eman zuen Donostian Knorrek eta han esango zituen? Ni joateko gogoarekin geratu nintzen... eta hurrengo egunetan egon nintzen erreferentzia bila Interneten, baina alferrik. Inork Knorrek esana edo beste zerbait argituko balu, nik behintzat eskertuko nioke.
Erantzunak kargatzen...
