Teknologia albisteak
3

Web 2.0 interneten bigarren iraultza, mahaingurua

Erabiltzailearen aurpegia
mikel - Andoaindik
2006-11-01 : 07:11

Iparraldea Andoainen jardunaldien barruan, azaroaren 2an, azkeneko egunean interneti buruzko mahaingurua izango da Bastero Kulturunean: Joxe Aranzabal, Jakes Larre, Iban Arantzabal, Maite Goñi...

Internet iraultza hizpide izango da Bastero kulturunean. Azaroaren 2an, ostegunarekin, arratsaldeko 19:00etan hasita, internet munduko adituak teknologi berrien azken aplikazioez jardungo dira. Eskura dauden tresna nagusiak eta horien aplikazioak azalduko dituzte ondorengoek:
Joxe Aranzabal (Mondragon unibertsitatea), Iban Arantzabal (Goiena), Jakes Larre (EKE) eta Maite Goñi (Jakintza ikastola). Entzuleek ere parte hartzeko aukera izango dute.

Erantzunak

Sustatu
2006-11-01 : 10:51

Eskerrik asko mahaiguruaren berri Sustatun emateagatik. Horren harira, iradokizun txiki bat: ekitaldiak nola joan diren ere gustatzen zaie jakitea Sustatuko irakurleei.



Ez bakarrik iragarpenen berri jakitea gure albistegian, baizik eta ondoren, zer esan den, nor egon den, ze galdera geratu diren airean eta zein erantzun diren datu jakingarriekin...



Zuenaren kasuan ere, gaia Internet bera izanda, are gehiago: gustura irakurriko dugu ondorengo kronika hemen. Antolatzaileok animatzen bazarete, bidali kronika hori ere.



Eskerrik asko aldez aurretik

Sustatu
2006-11-02 : 09:21

Gorka Julio Teketen-ek ekitaldi honetara hurbiltzeko gonbita egiten du, internetzaleon tabernan zertxobait hartzeko edo. Era berean, Tagzanian markatu du non den Bastero Kulturunea, mahaingurua izango den lekua.


Nekane Goikoetxea, Andoaingo Udala
2006-11-03 : 15:15

30 bat lagun elkartu ginen atzo Bastero Kulturgunean. Publikoa bi multzotan banatuko nuke: bipuntuzeroren olatuan surfeatzen dabiltzanen kuadrilla eta herritarrak, batez ere ikastetxeetako jendea.



Hasteko, antolatzaileen aldetik autokritika egin beharko genuke baliabideak eskasak izan zirelako. Oinarrizko tresnak falta izan ziren (flasha edota mikroak) eta harritzekoa bada ere Bastero bezalako eraikin berri batek ez du wi-firik, beraz, interneterako konexioak ere erren... Joxe, Iban, Maite eta Jakesen laguntzaz saihestu genituen zailtasunak, 2.0 jarrera erakutsi baitzuten laurok.



Zailtasunen harira aipatu nahiko nuke administrazioa zein urruti dagoen 2.0 jarrera horretatik. Kasu onentsuenean informazioa ematen du baina nekez komunikazioa. Zentzu horretan aurreko erantzunaren kritika nirea egiten dut eta horretara dator kronikatxo hau.



Alderdi positiboak aipatu nahiko nituzke ondoren:



1) Web 2.0 "Iparraldea Andoainen" egitasmoaren barruan? Bai. Egitasmo honen helburua ipar-hego zubigintza egitea da. Ikuspegia ere garrantzitsua da guretzat, iparraldearen irudi gaurkotua eman nahi baitugu. Oso lan interesgarriak egiten ari dira. Egitasmoaren hirugarren urtea dugu hau eta bi berrikuntza nagusi txertatu dizkiogu; bata, andoaindarrak ere iparraldera eramatea eta, bestea, ohiko kultur jarduerez gain (kantua, dantza, literatura...) hizkuntza eta hizkuntza-komunitatea propio lantzea. Web 2.0 kontzeptua ikusten dut trukaketan eta euskal blogosferaren eraikitzean.



2) Herritarrekiko helburuak bete ditugu. Web 2.0 iraultza bat da, rol aldaketa (irakasle/ikasle, komunikatzaile-antolatzaile/kontsumitzaile), berdintasun eta eskuzabaltasun ariketa, kultura berria. Modu ulergarrian azaldu zaie herritarrei zer den 2.0 eta balorazio positiboak jaso ditugu beraien aldetik, gustatu zaie. Denok egingo dugu hobera kultura berriari eusten badiogu. Adibide praktiko bat: asko aurreratuko genuke Andoainen ikastetxeek zenbait egitasmo partekatuko balituzkete, alde batera utzita lehia gorria. Ideia iraultzailea da.



3) Web 2.0 kontzeptua sozializatzeak duen garrantziaz jabetu gara. Uste dut bete-betean asmatu genuela atzoko laukotearekin (Joxe, Iban, Jakes, Maite). Bipuntuzeroren olatuan surfeatzen dabiltzanak egiten dutena bezain inportantea da jendea itsasoan murgilaraztea. Andoaindartutako debarra naizenez lagako didazue lizentziarekin jarraitzen...Orain 15 urte pijoen kirola zen surfa, gaur egun euskal rok taldeetako kantariak ikusten ditugu taula besapean dutela. Izan ere, ederra da itsasoa. Lortuko al dugu gauza bera teknologia berriekin?



Bukatzeko, barkatu hainbeste luzatu izana baina batzuk 30 orriko aktekin lan egiten ohituta gaude. Erantzunak nahiko nituzke...





Nekane G.

Erantzun

Twitter ikonoa  Facebook ikonoa  Sartu

Publizitatea

Jarraitu sustatu.eus

E-postaz, mezuz mezu:

E-postaz, eguneko buletina:

  • rss ikonoa

»» Aukera gehiago