Teknologia albisteak
5

EH 06 tailerra: Euskal Herrirako dominioa Interneten

Erabiltzailearen aurpegia
Nazio Garapenerako Biltzarra
2006-10-26 : 17:10

Datorren urriaren 28 eta 29an Nazio Garapenerako Biltzarrak antolatuta EH’ 06 NAZIO EZTABAIDA ospatuko da Burlatan, urtero legez Euskal Herria nazioa dela pensatzen dugunon artean gure herriaren egoeraz hausnartu eta adostasunezko aurrera urratsak proposatzeko asmoz. Lan-tailer bat honako hau izango da: Euskal Herrirako dominio propioa Interneten.

Urriaren 29ko deialdia NAZIO EZTABAIDA GUNEA osatzen duten 400 kideei soilik egiten bazaie ere, Urriaren 28an HERRITARRON TOPAKETAK antolatu ditugu, parte hartu nahi duen ororentzat irekiak direnak. Egun horretarako egitarau zabala antolatu dugu, herri eragileen azoka, laburmetrai ezberdinen emanaldia, tailerrak...

Tailerretariko bat EUSKAL HERRIRAKO DOMINIO PROPIOA INTERNETEN izango da, herritarrekin batera dominioa eskuratzeko bideak, aukerak, oztopoak... zeintzuk izan daitezkeen aztertzeko asmoz. Gaiarekin izan dezakezun interesagatik bertan parte hartzera gonbidatu nahi zintugun.

Urriaren 28ko egitarau osoa honakoa duzu:

URRIAK 28: HERRITARRON TOPAKETAK

  • 15:00-15:30 HASIERA EKITALDIA. Burlatako Kultur Etxeko Hallean
  • 16:00-21:00 Zinema. Kultur Etxean. 16:00-16:30 Palestina, hesien zirrikitutik Auditorioan. 16:35-18:45 Nomadak.tx. Auditorioan. 19:00-20:05 Ezkaba. Areto txikian. 20:30-21:45 Sanfermines 78 Areto txikian
  • 15:30-21:00 Jendarte Azoka. Karpan
  • 16:00-18:30 TAILER TXIKIAK (2 txandetan): Kultur Etxean

1. txandan: 16:00-17:00

a) Euskal Curriculuma: Aplikaziorako herri estrategia

b) Gazteriaren Biltzarra 06: Edukien eztabaida

c) Euskal Herriko migrazio eta aniztasun bilgune nazionala eta diagnostiko nazionala

2.txandan: 17:15-18:30

d) Eskolak euskaldundu behar du: aldarrikapenetik konpromisoetara

e) Auzolana eta Nazio elkartasuna: Herri estrategian indar berriak biltzen

f) Euskal Herrirako domeinu propioa Interneten

  • 19:00-21:00 TAILER NAGUSIA: Kultur Etxeko auditorioan

Hego Afrikako Eskubideen Karta: Hego Afrikako gonbidatuekin.

  • 22:00 AMAIERA

HAURTZAINDEGI ZERBITZUA. Izanen da 15:00tatik 21:00ak bitarte.

URRIAK 29: OSOKO BILKURA

Internet eta Info 7 irratiaren bidez jarraitzeko aukera izanen du nahi duen orok.

Besterik ez gure aldetik, Burlatan elkar ikusiko dugulakoan agurtzen zaitugu. Mila esker zure arretagatik.

Erantzunak

Unai
2006-10-26 : 20:22

Batzuek gauzak azkarregi egin nahi dituzte:



-Sustatura sartzen diren %30ak bakarrik daukate konfiguratuta nabigatzailea euskaraz.



-Azken orduko albistegi bat badago, ni elmundo.es webgunera joaten naiz. Euskaraz ez dago vilaweb.cat edo e-noticies.com/ moduko ezer.



-Euskarazko irrati garrantzitsuenaren (Euskadi Irratia) webgunea penagarria da.



-Jendeak euskarazko bideoak sartzen ditu YouTuben, baina azalpenak españolez ematen ditu. (http://www.youtube.com/watch?v=RkgUvzuMsh4)



Lehentasunak finkatu behar ditugu, ez alferreko lanetan ibili.

3ARRANO
2006-10-26 : 22:58

Izan ere, erabaki beharko dugu ea beti bezala itxura den axola zaiguna, hala mamia. Herri honetan ohitura hedatua da euskarazko izenak jartzea dendei, eta gero haietan aurreneko hitza erdaraz egitea... Edo Euskalzeozer estiloko izenak dituzten erakundeak sortu eta gero harrera ematen digunak euskaraz ez jakitea... Itxura.



Hori izango litzake .eus domeinua, itxura, baldin ez badugu mamia ere (eta batez ere) axola zaigula erabakitzen. Ez dugu sekula lortuko euskal domeinua, eta nik behintzat ez dut lor dezagun nahi baldin euskaldunok ez badugu euskarazko softwarea erabiltzen, interneten euskaraz egiten, nabigatzailea euskaraz jartzeko lan soila (klik batzuk besterik ez!) hartzen, Youtuben bideoen azalpenak euskaraz jartzeko lotsa (?) badugu...



Interneten euskarak oraindik presentzia xumea dauka, eta hori hobetu artean jai dugu.



Dena den, iruditzen zait domeinua eskuratzeko bideak zeintzuk izango diren aztertzea egin beharreko zerbait dela. Ziur nago tailer hauetatik ondorio interesgarriak aterako direla, baina lan asko egin beharko dugu. Denok.

p. gaztelumendi | bipuntuzero.org
2006-10-27 : 12:03

Kezka sortu du .eus dominioaren inguruko aferak. Eta hori berez, ez da txarra.
Kezka sortu du, eta aurrera goazen seinale.


Duela hilabete burutu genituen Euskal Herria 2.0 jardunaldiak Donostian, eta han besteak beste, dominioa eskuratzearekin batera, bestelako bide batzuk ere urratu beharrekoak zirela ikusi genuen.


Euskarazko edukiak, softwarearen lokalizazioa, nabigatzaileak... guzti hori mintzagai izan genuen. Eta bide horretan goaz. Konpromezu hori hartu genuen han.


Burlatako Nazio eztabaidak, aintzat hartu gura du hori ere, alegia, dominioaren afera lehentasun bezala jartzea datozen urteetan.


Euskal Herriarentzat, kulturarentzat, hizkuntzarentzat... gu guztiontzat duen garrantzia ikusita, lehentasun bezala jartzea gure egitekoetan.


Horretan ari gara, eta eztabaida tailer honek, oinarriak jarri gura ditu. Behar diren foro, tailer, mintegi eta toki guztietan hori bera eztabaidatzeko eta bideratzeko prest agertzen gara gu, auzolanean.


Sustatu
2006-10-27 : 12:37

Eskerrik asko tailerraren berri Sustatun emateagatik. Horren harira, iradokizun txiki bat: ekitaldiak nola joan diren ere gustatzen zaie jakitea Sustatuko irakurleei.


Ez bakarrik iragarpenen berri jakitea gure albistegian, baizik eta ondoren, zer esan den, nor egon den, ze galdera geratu diren airean eta zein erantzun diren datu jakingarriekin...


Kasu honetan, gaia interes bizikoa dela kontuan izanda, bereziki: .eus dominioaren aukera.


Antolatzaileok animatzen bazarete, bidali kronika hori ere.


Eskerrik asko aldez aurretik


Sustatu
2006-10-31 : 12:12

Ez digute oharrik bidali, baina kronika labur bat aurkitu dugu hemen.


Erantzun

Twitter ikonoa  Facebook ikonoa  Sartu

Publizitatea

Jarraitu sustatu.eus

E-postaz, mezuz mezu:

E-postaz, eguneko buletina:

  • rss ikonoa

»» Aukera gehiago