Teknologia albisteak
2

Sautrela, berriz ere

Erabiltzailearen aurpegia
SAUTRELAGILEOK - E.H.
2006-10-06 : 15:10

Larunbat honetan hasiko da Sautrela, berriz ere. 170. saioa izango da. 1999 urtean 13 ataletarako sortu zen literatura ikuskaria, beteranoenetakoa da gaur ETBren parrilan.

“Sautrela” 1999tik ETB-1en ikusgai den literatura eta letrei eskainitako saioak denboraldi berria abiatuko du larunbatean, urriak 7. Irakurleengana hurbildu asmoz, kritikaren atala irakurtzea zaletasun duten herritar anonimoei zabalduko diete aurten. Euskaraz idatzi -edo euskarara ekarritako- liburu baten gainean hausnarketa egingo du astero lagun batek. Astean-astean agertzen diren argitalpenen berri ere jasoko dute hemendik aurrera atal berri batean.

“Sautrela” irudi berriarekin dator. Izan ere, hemendik aitzinera ikurra izango du: matxinsaltoa. Eta programaren azala ere aldatu egingo da. Guille Sanchezek hartu du errealizadore kargua eta bera izan da saioari ukitu berezia eman diona. Osterantzean iazko lan taldeak jarraituko du: Hasier Etxeberria gidari lanetan, Eider Rodriguez eta Jon Artano erredakzioan eta Izaro Goenaga ekoizpen lanetan. Saioaren produktore eragilea Unai Ibarbia da. Saioaren hastapenetatik eten ez den babesa ematen jarraituko du Eroski Fundazioak.

Ohiko egiturari eutsiko diote. Horrela, bada, astero erreportaje mamitsu bat eta gonbidatu berezi bat izango dituzte eduki nagusi. Haatik, elkarrizketak egiteko, Artelekurekin batera, Donostian kokatutako beste gune bat erabiliko dute tarteka, Tabacalera.

Iaz bezala “Sautrela”ko pitxiei ahotsa jarriko die Martin Tejeria esatariak. Aurten, gainera, Mertxe Ezeiza ere arituko da eginbehar horretan. Eta, azkenaldian bezala, Aurelia Arkotxa eta Edorta Jimenez idazleek egingo dituzte eurek aukeratutako pasarte literarioen irakurketak.

Aurreneko programan Rikardo Arregi Diaz de Heredia poeta handia elkarrizketatuko du Hasier Etxeberriak. Arregi eta beste euskal idazle talde bat Eslovenian izan da Vilenican egin duten literatur jaialdian. Hango berri emango digu eta beste kontu mordo bat ere bai.
Lolitaren oihartzuna izeneko erreportajean, Nabokovek sortutako pertsonaia garrantzitsuenak izandako bilakaera eta eragina aztertuko dute Katixa Agirreren eskutik. Eta Aurelia Arkotxaren irakurketa ere izango dute.

Erantzunak

bejondeigula
2006-10-09 : 15:50

ETBk duen produktu interesgarrienetakoa eta telebista kultura hedatzeko erabili daitekenaren adibide garbia, Hitzetik Hortzerarekin batera. zorionak hor dabiltzanei.

ptx
2006-10-10 : 13:40

Pena da, baina Internet, Internet ez balitz bezala erabiltzen jarraitzen dugu.


Pena da, sautrelagileek, minutu erdiz albiste hau editatu izan balute... Sustatuko irakurleok bidenabar beraien webgunea sautrela.com ere bisitatuko genukeen.


Pena da, izan ere komunikazioaren inguruko profesionalek ateratzen diote zukurik kaskarrena copy/paste delakoari. Kopiatu eta kitto... Internetek eskaintzen dituen bestelako aukerei erreparatu barik.


Ba Sautrelakoek, saio txukuna egiteaz gain, web oso konpletoa ere badute. Literaturzaleontzat, erreferentzia dena.


Erantzun

Twitter ikonoa  Facebook ikonoa  Sartu

Publizitatea

Jarraitu sustatu.eus

E-postaz, mezuz mezu:

E-postaz, eguneko buletina:

  • rss ikonoa

»» Aukera gehiago