Egile eskubideak eta musika herrikoia

Itxura denez, SGAEk 7826 Euro eskatzen ditu azken urteetako txistulari, txaranga eta abarren aktuazioengatik.

Barakaldoko Udalak dio zentzurik ez duela autorerik ez duten piezei dagozkien egile eskubideak eskatzen ibiltzea. Hemen oker dabil udala. Pieza horiek izango zituzten egileak, kontua da ezezagunak direla, eta erabiliaren erabiliaz Popular edo Herrikoia kategorian sartzen direla.

Baina, egia ote da SGAEn erregistratu gabe daudela?

Gauza bat entzun dut azkenaldian, eta egia bada gure folk musikari askoren irudia zikintzen dit.

Demagun Koldo Tankera folk musikari ezaguna dela. Koldok, baserri batean bizi den albokari zahar bati pieza zahar bat entzun dio, inoiz errejistratu gabea eta jatorri ezezagunekoa, baina inguruan pieza ezaguna dena.

Koldo musikariak piezari bere moldaketa egin eta bere hurrengo diskarako grabatu du, eta SGAEn errejistratzean Popular/Koldo Tankera moduan errejistratu du.

Kontatu didatena zuzena bada, egun horretatik aurrera, edonork (baita baserriko albokari zaharrak edo Barakaldoko txistulariek) pieza hori toki publikoan joz gero, SGAEri dagokiona ordaindu eta ordainaren zatia Koldo Tankerari etorriko zaio.

Egia da hau? Horrela da egoera pieza zaharrekin? Ez ote dago hori babesteko modurik, pieza zahar horiengatik egile eskubiderik eskatzeko aukerarik egon ez dadin, eta beste edozein musikarik Koldo Tankeraren bezala bere moldaketak modu librean egiteko aukera izan dezan?