Teknologia albisteak
1

Teknofilo euskaldunak eta galestarrak

Erabiltzailearen aurpegia
Luistxo Fernandez - CodeSyntax
2006-05-18 : 09:05

Larunbatean, Biarritzek errugbi finala jokatuko du Caerddyden, Galesko hiriburuan, Stadiwm y Mileniwm zelaian. Eta igandean, futboleko Euskadi-Gales Bilbon. Tratua izan dut asteburuan Bilbora datorren galestar batekin Internet bidez azken asteotan, eta gauza interesgarriak ikasi ditut.

Rhys Wynne da ezagutu dudan morroia. Tagzania erabili du bere herrikideentzako toki batzuk markatzeko, galesez adierazi ere zer den hau eta zer den bestea Bilbon. Rhysi zor diogu, gainera, Tagzaniaren galeserazko bertsioa. Partidaren datarekin gorabeherak izan ondoren, azkenean badator. Esker onez, Tagzaniak enbaxadore izendatu du. Ez da Galesen eta euskal kirolarien asteburuko konexio bakarra San Mameskoa. Larunbatean, Caerdyddeko Stadiwm y Mileniwm zelaian jokatuko du Biarritzek Heineken kopako errugbi finala.

Rhysek kontatzen didanez, badira antzekotasunak Galesko eta Euskal Herriko teknofiloen artean. Hiztunen kopurua 600.000 lagunetan dago, baina benetan hitz egiten dutenak askoz gutxiago izango dira.

Blogosferari Rhithfro esaten zaio

Galeseraz ere badago blogosfera polit bat, Rhithfro esaten diote, Haran Birtuala, itzuliko genuke. Gaur egunean 100 bat blog egongo dira galeseraz, baina duela bi urte 5 eta 10 bitarteab izango ziren. Rhithfro horretan, 10 bat blogari egongo dira teknologian haitasuna dutenak, eta laguntzen jarduten dutenak. Horren adibidea da Blogger txantiloi batzuk prestatu dituztela galeserazko interfazea duen blog bat sortzeko Blogspot-en. Han dago Rhysen bloga eta futbolzale batzuek Bilboko partidara begira sortutakoa, Galestarrak gara. Ondoren, Eskoziako gaelikoz ere baliatu duten horren bertsio bat.

Nik idatzi izan diot 100 blog asko direla, baina beren blogosfera Bloggerren edo sakabanatuta ez balego, software propioarekin ibil daitezkeen komunitateetan egituratua balego ( Blogari.net eta Blogak.com aipatu dizkiot), 100dik 400era ere ziztu bizian igaroko zirela... Rhys tentatua egon da zerbait probatzera, eta Bitakora produktuaren ingelesezko bertsioarekin galeserazko blog bat sortu du, nonbait. Beste aukera batzuk ere eskura behar dituzte, diot nik: Wordpress softwarea galeseraz badagoela ematen du, behintzat Galesko blog ezagunenetako bat, Morfablog, ondo lokalizatua dagoela ematen du.

Teknofilo saiatuak, baina enpresak falta

Teknofilo galestar saiatu horietako batek, Aran Jones-ek, Blogiadur sortu du, agregatzaile bat. Eta nonbait Typepad (Movable Type sortu duen SixApart enpresarena) zerbitzuko kontuen bidez komunitate bat abiatzeko proposamena egin du, baina galestar gehienak Bloggerretik doaz oraingoz. Aran Jonesek beste zerbitzu bat ere sortu du, Sgwarnog , web bidezko posta galeseraz. 100dik gora harpidedun ditu, 2.25 euro ordaintzen hilean. Euskaraz hobeto gaude: Euskalerria.org badago doan horretarako, adibidez. Baina zera da kontua, hizkuntzaren elkarte bateko ( Cymuned , hemen ingelesez, eta hemen Euskal Herriaz ) liberatua dela Aran, eta beharbada baliabideak falta zaizkiola.

Rhys Wynnek esaten dit, falta zaizkien baliabide horiek enpresak direla, halako zerbitzuak egiteko gogo profesionala izan dezaketen ekimenak. Tagzaniaren sortzaileok, CodeSyntax-ek, inbidia ematen diogula esan dit Rhysek. Nik erantzun diot zorionez gure enpresa ez dagoela bakarrik.

Wikipedia eta beste

Bestalde, kontu batzuetan akaso hobeto daude galestarrak. Susmoa daukat galeserazko Wicipedia (hala idazten dute), euskaldunona baino hornituago dagoela, eta, hizkuntza prozesatzeko tresnetan, garapen libreak izatea dutela abantailatzat: Eurfa bezalako hiztegi libre bat, gaitasun informatikoekin morfologiarako, izatetik urruti gaude; nik ez dut ikusten inor biderik egiten hemen horretarako.

Ez dut uste asteburuan Bilbon izango naizenik, baina, tira, Rhys ikusten baduzue Kafe Antzokian edo, agurtu ezazue nire partetik. Futbolaren emaitzak berdin dit, Ivan Campok ala J.B. Toshackek irabaztea, bost axola horrek niri.

Erantzunak

patxi lurra
2006-05-20 : 22:18

Emoitza gitxienekoa izango da, partida bera ederra izango da San Mamesekoa.



Wikipediari jagokonez, momentuz, gauzak holan dagoz: Euskal Herria - 8.365 artikulu; Cymru 4.374.



Erantzun

Twitter ikonoa  Facebook ikonoa  Sartu