Teknologia albisteak
3

Zenbat bisita ditu nire webguneak?

Erabiltzailearen aurpegia
Sustatu.com
2006-01-31 : 09:01

Webgune bat duen orori lehenago edo beranduago burura datorkio galdera hau. Orain Eusko Jaurlaritzan ere sortu zaie galdera, eta dirulaguntzetara aurkeztu diren guztiei datua eskatu diete.

Zehazki hau dio Jaurlaritzaren gutunak:

Diruz lagunduko diren atari eta webguneen kasuan erabiltzaile-kopurua neurtu ahal izateko modua eduki behar dute eta, aldi berean, ikusgai egongo da pantailan eskabidea egiteko epea bukatu orduko.

Ongi da. Maila batean normala da dirulaguntzen errendimendua kontrolatu nahi izatea, nahiz eta agian ez luke irizpide garrantzitsua izan behar, literatura hitzaldi eta Bisbalen kontzertuek audientzia bera ez duten moduan. Baina agian sektorearen diagnosiarekin edo beste zerbaitekin doa lotuta eskaera.

Baina arazoak kontagailu hori jartzeko momentuan sortzen dira. Zer kontatu behar da?

  • Zenbat bisita izan diren?
  • Zenbat pertsona sartu diren? (pertsona bat bi aldiz sartu da agian)
  • Zenbat web orri ikusi diren guztira? (pertsona batek bisita bakoitzean orri bat baino gehiago bisitatzen du normalean)
  • Zein epetan? egunean, hilero, astero...
  • Noiztik kontatuta? noiz jarri kontagailuak zeroan?
  • RSSak kontatu behar dira? Nola?

Uler dezakezuenez datu oso nahasiak atera daitezke, hamarnaka webgune, bakoitza bere sistemarekin. Zerbaitetarako balioko ote du datu nahaste horrek? Norbait izango ote da ondoriorik ateratzeko gai?

Zer jarri dute webguneek?

Sustatun estatistikak bistan

Aurtengoan Sustatu ez denez dirulaguntza deialdi horretan sartzen, ez dugu estatistikak erakusteko eskaerarik izan. Baina aspaldian uste dugu transparentzia komeni zaigula euskaldunoi, eta berriki guztiz ireki ditugu gure estatistikak.

Datuok ikusi ahal izateko lotura webgunearen sarreraren eskumako menuan aurkituko duzue, egunez-eguneko bisitak eta ikusitako orri kopurua. Hortik kanpo gelditzen dira RSS eta e-posta bidezko audientzia.

Erantzunak

Asier
2006-01-31 : 11:13

> Uler dezakezuenez datu oso nahasiak atera daitezke, hamarnaka webgune, bakoitza bere sistemarekin. Zerbaitetarako balioko ote du datu nahaste horrek?



Ziurrenik, tranposoenak diru gehiago lortzeko.

Sustatu.com
2006-01-31 : 12:01

Interneten ez da erraza jakitea webgune batek dituen bisitak.


Azken finean, aldagai asko erabiltzen ditu estatistika sistema batek tartean (bisitak, banakako bisitak, orrialde ikusiak, RSS irakugailuen bitartez egiten diren bisitak, banatutako KByteak , ...) eta neurtzeko tresna asko daude (Statcounter, Webalizer, Stattraq, ...).


Webgune baten ezarri tresna bat edo beste bat, eta emaitza ezberdinak lortuko ditugu. Ikusi zer gertatzen zaion Portugaleteko vud1-i.


Gainera, tresna bakoitza konfiguratu daiteke eta, adibidez, bisitari berriak orduero, orduerdiro, ... edo bost minutuka kontatzeko ipini.


Sustatun, hiru estatistika sistema ezarrita ditugu. Denbora gehien daramana Webalizer da, Bidasoamediak erabiltzen duen berdina.


Webalizerren arabera aurtengo urtarrilean, gaur arte, 128.886 bisita eta 297.252 orrialde ikusiak izan ditugu.


Eta Sustatuk 2005 urtean izan dituen datuak hauek dira:


  • Abenduan: 105.846 bisita 238.110 orrialde

  • Azaroan: 104.651 bisita eta 238.011 orrialde

  • Urrian: 100.119 bisita eta 223.663 orrialde

  • Irailean: 85.283 bisita eta 179.506 orrialde

  • Abuztuan: 65.000 bisita eta 127.676 orrialde

  • Uztailean: 73.726 bisita eta 164.817 orrialde

  • Ekainean: 61.717 bisita eta 170.572 orrialde

  • Maiatzean: 60.738 bisita eta 148.712 orrialde

  • Apirilean: 69.156 bisita eta 154.308 orrialde

  • Martxoan: 71.885 bisita eta 169.205 orrialde

  • Otsailean: 56.439 bisita eta 156.491 orrialde

  • Urtarrilean: 58.548 bisita eta 155.449 orrialde

Beraz, Webalizerren arabera, bataz beste Sustatuk egunero 9.588 orrialde eta 4.157 bisita izan ditu azken hilabetean.


Eta guztira, ia miloi bat bisita eta 2,3 miloi orrialde ikusiak 2005 urtean.


Baina, Webalizerrek RSS irakurgailuek egiten dituzten bisitak kontatu egiten ditu, bai norbanako irakurgailuak (Bloglines, Feednes, Feedreader, Firefox-ena, PDA irakurgailua,...) , bai beste webguneek Sustatuko titularrak eskaintzeko egiten dituzten bisitak. Jende askok irakurtzen du horrela Sustatu.


Orain Statcounter ipini dugu, esan bezala hortik kanpo gelditzen dira RSS eta e-posta bidezko audientzia.


Baina, zertarako balio du kontagailu bat ipintzea eskatzeak, era berean ez badira zehazten kontagailu horrek bete behar dituen parametroak?


Norbaitek gorago esan duen bezala, tranposoenak diru gehiago lortzeko?


Esan da bisitak ez direla askotan webgune baten garrantzia neurtzeko irizpide bakarra, baina horren arabera baloraketa egiteko parametro horiek zehaztu egin behar dira. Gutxienez, noiztik kontatu behar den, zer kontatu behar den eta nola kontatu behar den.


Bestela bakoitzak nahi duen modura tranpeatuko du kontagailua.


inaxio
2006-01-31 : 23:26

horiek horrela izanda ez dirudi zentzuzkoa jaurlaritzaren eskariak. eta egokia iruditzen zait berak diruz lagundutako egitasmoen jarraipena egitea, bisitari eta klikaldien kontua jasoz, baina ez onuradunei eskatuta alajaina: jaurlaritzak berak egin beharko luke jarraipena, berak ezarritako parametroen arabera. euren logoa jartzeko eskatzen duten bezala, berdin-berdin eska zezaketen euren 'kontadorea' jartzea.



diozuen bezala zaila da kontuak zuzen egitea, baina web guztietan parametro berak erabiliz gero nahikoa datu esanguratsuak jasoko lituzke. egindako inbertsioen emaitza jarraitzeko modua da, eta hori egin beharreko lana da, batere ardurarik izanez gero.

Erantzun

Twitter ikonoa  Facebook ikonoa  Sartu

Publizitatea

Jarraitu sustatu.eus

E-postaz, mezuz mezu:

E-postaz, eguneko buletina:

  • rss ikonoa

»» Aukera gehiago