Blogari edo bloglari?
Orain arte, euskal blogosfera txikian blogak mantentzen zituzten gehienek, blogari hitza erabili dute bere burua izendatzeko. Aldiz, Berriako blogak iragartzerakoan bloglari hitza erabili da. Mikel Iturriari ez zaio gustatu eta bere harrikadetan bloglari hitza ez erabiltzeko eskatu du. Zein da zuzena?
Apur bat ikertu dugu sarean eta, orain arte, euskal blogosferan nagusiki blogari hitza erabili dela ikusi dugu:
- Blogari hitza erabili izan da normalean Sarean.com euskal blog aitzindarian.
- Blogari euskaldunen topaketa izan zen Elgetako Euskal Blogs & Beers edo BST-an.
- Blogariak ziren eibar.org-en , lehen blog-komunitate euskaldunekoak. Izan ere, eztabaidan ibili ziren hitzaren inguruan Eibar.org-en
- Blogariak ziren goiena.net -ekoak
- Blogari gehienak itsusiak omen diren galdetzen dute Euskal blogen eraztunean
- blogari bertsozale moduan arituko da Gaztelumendi , Patxi.
- ..., Blogari da blog pertsonal guztietan erabiltzen den terminoa. Googlen bilaketa egin eta nabaria da blogari hitza dela gehien erabili dena euskaraz.
Hala ere, bloglari hitza gutxienez hiru aldiz aipatua aurkitu dugu sarean:
- Iban Arantzabalek Elgetako topaketaren kronika egiterakoan bloglari erabili zuen Sustatun bertan : Guztira, 22-25 bloglari gaueko ordu txikietaraino ordenagailuak Espaloiko WIFI sarean konektatu
- Josu Badiolak Uztarriako Didazkan blogean : Bloglari naizela eta ez naizela, adarra jotzen hasi zitzaidan.
- Luistxo Fernandezek, Kazetaritza Kongresurako prestatu zuen Bitartekaritzarik gabeko kazetaritza ponentzian : Bitartekari bat gehiago (bloglari esperoa), baina bitartekaritza gutxiago informazioaren zikloan, horra Interneten ondorio bat.
Orain, badirudi Berria "bloglari" hitza hasi dela erabiltzen ... eta, esate baterako, Mikel Iturriari , ez zaio larregi gustatu; ezta Joxe Arantzabali ere.
Zein da zuzena? blogari ala bloglari? Eta egokiagoa?
Kataluniarrek erabaki dute
Joan zen astean Mikel Iturriak aipatu zigun moduan:
"Catalunyan Termcat erakundeak erabaki du zein hitz erabili katalanez bloga eta blogaria izendatzeko: bloc eta blocaire. Albistea Vilaweben. Gure artean ezagutzen dut baten bat "blog" baino "blok" hitza nahiago duena. Euskaltzaindiak noizbait esango du zeozer honi buruz? Ea blogak zirkulaziotik kendu baino lehen iristen den erabakia... ;-)"
Euskaltzaindiak baino, argituko al digu Andu Lertxundik Hitz Beste blog berrian?
Erantzunak
Blogger anglesezkoa erabilgarri da oso euskaran ere, baina orain arte blogari izan da gehien erabili izan dena. Kontutan harturik anglesezko beste eratorrti batzuk nola blogophile eta blogosfera, badirudi g letra ez dela zertan bikoiztu behar: blogari, blogile, blogista, blogero, blogofilo, blogosfera, e.a.
Technoratiko agerpenetan oinarriturik, sokatira txanpa estatistiko bat egin dut.
Eta irabazlea.......iEUP!
> Orain arte, euskal blogosfera txikian blogak mantentzen zituzten gehienek, blogari hitza erabili dute bere burua izendatzeko. Aldiz, Berriako blogak iragartzerakoan bloglari hitza erabili da.
Baina deskuido bat izan da. Halaxe dio Esate baterako blogean
Irene Arrarats-ek:
Mementoko deskuidua izan da BERRIAn bloglari argitaratzea, eta ez blogariak bestela bataiatu nahia. Izan ere, blogari erabiltzea erabakita dauka BERRIAk.
Spintatzen dutenak sprinter eta blogean ari direnak blogger.
Blog hitza ez da euskal hitz originala eta ezta ere kontzeptua, hori aurretik guziaren argitzeko; da arrotzhitz bat zeina ez da mailegua. Da arrotzhitza soil, kanpotik hartua zuzenki.
Blogak izkiriatzen duena da blogger bat, bloggerra. Horren antzera esaten da euskaraz ere zyklismoan sprinterra, datorrelarik hitza tik sprint hitza eta bere derivatua sprinter. Horrela gure kasu hontan ere blog eta bere derivatua da blogger. Ez dugu euskaldunok zertan deskubritzen ari behar sutsuki Mediterraneoa, zeren bait da millenioetan jada ezaguna duenarentzat ezagutzarik.