Bertsolaritza: txapelketaren barne komunikazioa Skype bidez antolatzen da
Atentzioa eman zigun Skype helbidea ikusteak elkarte bateko prentsa oharrean. Lehena eta bakarra dela uste dugu. Bertsozale Elkartearen eragileen arteko barne komunikazio ia guztia Skyperen bidez egiten dute. Joseba Kamiorekin egon gara gu Skype erabilita. Deitu eta da!, erantzun.
Noiztik Skypekin?
Bertsozale Elkartean maiatza-ekainean hasi ginen batzuk skypekin. Pixka bat tematu egin ginen, eta segituan Elkarte osoan ezarri genuen sistema 10 bat lagunen artean.
Zergatik Skype? Noren gomendioz? Nondik jakin zenuten bazenik horrelakorik?
Hasieran Xabino San Sebastian eta ni jarri ginen harremanetan skyperen bidez, nik etxean erabiltzen nuelako eta Xabinok bere enpresan. Skyperen berri izan genuen sarean ibilita eta blogetan ibilita bereziki. Etxean erabiltzen hasi eta gero Elkartera ekarri genuen; batetik, gure arteko komunikazioa errazteko (kontutan hartu behar da Skypek bat-bateko mezularitza eta artxibo trukaketa ere eskaintzen dituela; eta bestetik, telefono fakturan xoxak aurrezteko ere. Azken batean eskuko telefonoa ere gutxiago erabiltzen dugu Skype erabiltzen hasi ginenetik, ez soilik fijoa.
Bertso antolakuntzan zertan erabiltzen duzue?
Ba Bertso Antolakuntzan bereziki ezertan, edo beharbada denetan. Esan nahi dut Bertsozale Elkartearen eragileen arteko barne komunikazio ia osoa Skyperen bidez egiten dela, eta nola egun hauetan Txapelketan! buru belarrti ari garen, ba, jakina, Txapelketari dagozkion gauzak ere Skyperen bidez egiten ditugu.
Eta bertsolariek? erabiltzen dute?
Nik dakitela batek bakarrik erabiltzen du, Xabier Paiak, hain xuxen.
Noiztik zuen e-postetan skype helbidea jartzen?
Ba uste dut neronek bakarrik egiten dudala hori, hasieratik gainera. Komunikazioan aritzen garenok horixe egin behar baitugu, komunikaziorako bideak ireki eta erraztu, eta alde horretatik, nabaria da KITek egin duten ekarpena.
Kazetariren batek erabili du erreminta hau zuekin harremanetan jartzeko?
Ez.
Erreminta berriren bat ere bazabiltzate probatzen telefono finkoetara doan deitzeko...
Bai, egia da. Voipbuster probatzen ari gara telefono fijoetara deitzeko doan. Momentuz minutu bateko deiak ematen dituzte doan, eta oker ez banago, nahikoa da PayPalen bidez euro bat ordaintzea muga hori desagerrarazteko. Beraz, hor ere badago non aurreztu dirua. Hala ere, gaur egungo ADSL eskaintza batzuek fijoen arteko deiak oparitzen dituzte, eta aztertu egin behar da kasu bakoitzean zer komeni den. Esan behar da, bai Skyperen kasuan baita Voipbuster-en kasuan ere soinu kalitatea oso ona dela.
Erantzunak
> Sustatuk gaur bi albiste egin ditu gaion inguruan, uste dut, mereziko lukela, Irratia.com aipatzea, ezta?
Ez ba. Sustatuk gaur ez ditu bi albiste egin, eginak zituen. Bi albiste argitaratu egin ditugu gaur. Horra hor irratia.com zergaitik ez den aipatu.
Aupa! Niri ere gertatu zait inoiz gauza bat paperean argitaratzeko idatzi eta jendeak egunkarian irakurri aurretik Sustatuk argitaratzea, eta onartu behar dut horrelakoetan amorru pixkat ere ematen duela;-) Gauza bera gertatuko zitzaigun askori blogekin (niri bai behintzat), gurerako albiste bat "hozkailuan" egun bat edo ordu batzuk edukiz gero beste norbaitek lehenago aipatzea.
Interneten albisteak zein azkar (egunkariekin alderatuta) hedatzen diren, zein berehalakoa den sareko edizioa... Izugarria da.
Oraingoan kasualitatea izan da eta Patxik erreparatu dio koinzidentziari, gaiak gordeta zeudela jakin gabe. Euskal blogosfera txiki honetan normala da gai beretsuei erreparatzea. Oraingoan irratiak (beno, irrati-bitakorak) eman du lehenago, besterik ez.
Tira, ohar bat amaitzeko: aspalditxo irratia.com Wordpressera aldatu genuen arren, norbaitek lehengo Movable Typeko RSS jarioa harpidetuta badauka alda beza, otoi, bere Bloglines, iTunes eta bestelako RSS harpidetzetan. Podcastellano-koek, adibidez, helbide zaharra zeukaten oraintsu arte eta bertan ematen zuen ez geneukala saio berririk sarean. Jario berriaren helbidea:
http://www.irratia.com/?feed=rss2
Joseba Kamio, Bertsozale Elkarteko komunikazio arduradunarekin Skype bidez egindako elkarrizketa entzungai duzue Irratia.com-eko 25. saioan.
Asteon egin dugu, Bertsolari txapelketa izan dugu hizpide, eta besteak beste Skypen erabilerari buruz be, galdetu diogu Josebari.
Txapelketa eta teknologia berrien erabilera. Interneten txapelketak daukan presentzia, egindako gune berriak, apustuak...
Oso intentsoa eta interesgarria izan zen elkarrizketa labur hori. Josebarekin elkarrizketa amaitu eta jarraian Estitxu Elduaienekin hasi ginen berbetan (Telefonica bidez, oraingoan) eta Matraka.info eta Matraka berrituari buruz, blogei buruz, aritu ginen....
Sustatuk gaur bi albiste egin ditu gaion inguruan, uste dut, mereziko lukela, Irratia.com aipatzea, ezta?
Irratsaioa entzuteko: irratia.com