IVAPek errealitatearen zentzua galdu du
Azken deialditik aurrera, IVAPeko 4. Hizkuntza Eskakizuna egiteko aukera izateko, beharrezkoa da atariko proba bat gainditzea; alegia, EGAn bezala, orain azterketa hori egin nahi duenak lehenago atariko froga hori gainditu beharra dauka. 30 galdera dira eta 20rekin gainditzen da.
Atariko proba hori ikusita, ondorio bakarra atera daiteke: IVAPek errealitatearen zentzua galdu du.
Atariko proba izugarri zaila da. Galderak ez dira batere garbiak eta helburu dute hizkuntzan aditua dena ere zalantzaz betetzea.
Antza, 4HE egin nahi duen administrazioaren langileak udalbatzarra, udalbatza, udalbitzarra eta udalbiltza bereizten jakin behar du.
Jakin behar du zenbaiten ustez maila jasoa dela eta batzuek esaten dute ez hain jasoa (?).
Jakin behar du honako esaldia ez dela zuzena: Esan dezagun, bene-benetan, orain arte aipatu ditugun arauek, epe laburrean izango diren lege aldaketak direla medio, zentzu gutxi izango dutela etorkizunean.
Jakin behar du alokairu eta soldata sinonimoak direla, eta bailitzan baztertzeko modukoa dela.
Jakin behar du Europako kanpo mugetako kontrol neurriak indartzen ari direla, eta ez leuntzen.
Administrazioko langile batek, edozein dela bere arloa ere, ogasuneko eta zuzenbideko terminologiak ederki ezagutu behar ditu, jakin behar du ez dela zuzena Epaimahaiari onartezina eta salatzeko modukoa iruditu zaio kideetako batek prentsari zenbait informazio ematea, zuzena eman izana dela (?). Eta abar.
Euskararen inguruan ari garenok gure jarduera profesionalean gauza ugari ikasi ditugu. Nolabait adituak gara euskaran. Bada, atariko proba hori ederki sufrituta gaindituko dugu, gainditzen badugu.
Galdera da nola demontre ausartzen ote den administrazioa bertako langileei hizkuntzaren profesionalen mailako edukiak galdetzera.
Erantzuna: IVAPekoek uste dute errealitatea beraiek direla, eta ez gizartea. Horri errealitatearen zentzua galduta izatea esaten zaio.
Erantzunak
Badakit zure mezua beste bide batetik doala, eta gaia larregi ezagutzen ez dudanez, ez naiz sartuko kontu horretan, baina:
> 30 galdera dira eta 20rekin gainditzen da.
Hor zerbait txarto dago: edo azterketa zailegia da, edo eskatzen den maila txikiegia.
Nola liteke hizkuntza baten maila gorena ziurtatzeko azterketa batean, galderen %33 oker erantzun ahal izatea?
Euskara azterketa errazetara ohituegi gaudela? Ederra.
Bada galderatrxo bat egingo dizut:
Zergatik suspenditzen du 3HE edo 4HE %95ek? Errezegia delako? aurkezten direnak tontoak edo alperrak direlako?
baina, zertan nabil hori zuri galdezka? Zure erantzuna ederki ezagutzen dut: mailarik gabeko jendea aurkezten delako.
Baina, hitza ematen dizut izugarri lan egin duen jendeak suspenditzen duela, euskaraz txukun hitz egiten duen jendeak.
Eta jende hori da nire ustez errealitatea. Ez zu eta biok.
Kontua ordea ez da juzkatzea etsaminatuek zer maila daukaten edo euskara errealak zer maila daukan berez. Eztabaida sakonegia da, honako.
Askoz ere problema xinpleagoa dago hemen: perfileko mataderiara jendea bidaltzen gabiltzan lau irakasletatik hiru, edo ez gaude konforme, edo zer zuzendu litekeen asunto honetan guztian esaten ari gatzaizkio IVAPi, bide batetik ez bada bestetik. Eta erantzuna, gehienetan (beti, esango nuke), sekula arrazoi zipitzik ez aitortzea da. Ez gara batere fidatzen IVAPekin; nik esango nuke ez direla gutarrak, ez dutela euskara loriosik nahi euskaldun edo euskaldungai zoriontsuentzat. Arerioak ikusten dituzte euskaldunetan; ez dute nahi euskaldunek administrazioan euskaraz lan egiterik.
Zer pasatzen da ordea IVAPen? Beren boteretxoa erakusteko grina hutsean bizi dira, edo zer? Ba al du beste esplikaziorik? Igoal baduke esplikazio oso humano eta komuna: apaltasun falta eta inkonpetentzia dabiltzala gailen IVAPeko zirkoan.
> Atariko proba izugarri zaila da.
Bai, horixe izan ohi da etsamina 'normalen' ezaugarri bat: zailak -edo izugarri zailak- izatea. Arazoa, nire ustez, beste bat da: hemen ohituegiak gaudela euskara-azterketa errazetara.
Asko eskatzen dela 4.HEan? Oker ez banago, hori da euskara-gaitasuna egiaztatzeko agiri gorena, ez? Bada, zuk aipatutako galderak (alokairua=soldata, etab.) ez badira 4.HEan egiten, non egingo dira, bada?