Agur, Artandape
Atzo goizean joan nintzen ARTANDAPEren Korrikari buruzko monografikoa inprentara eramatera, eta tartean dei bat jaso nuen aldizkaria ateratzen duen ABARRAK elkarteko araduradun batena: "Joxe, zenbaki hau azkenengoa da".
Urtebete pasatxo egin ondoren, beraz, bertan behera geratzen da Arrankudiaga, Arrigorriaga, Ugao eta Zaratamoko aldizkari euskalduna. Aldizkari euskaldun bakarra, zailtasun ekonomikoen eta instituzio lokaletatik (batzuetatik beste batzuetatik baino gehiago) adierazitako erabateko interes faltaren ondorioz. Ondoren doakizue ABARRAKek aldizkarian bertan argitaratutako oharra.
"Ia guriak egin du" zioen Xenpelarrek bere bertso ezagunean. Gureak bai egin duena, zoritxarrez. ARTANDAPEko azken alea duzu eskuartean. Ezin aurrera jarraitu, ezin zorra handitzeari eutsi. Pena da, baina porrot ekonomikoa onartu beharra dago. Arrazoi asko dago erabaki honen atzean; azter ditzagun, bada:
Etxeko akatsengatik has gaitezen, bidezkoa da eta. Iaz Eusko Jaurlaritzak ematen duen subentzioetara epez kanpo aurkeztu ginen. Negoziazioetan ibili baginen ere, ez ziguten eskabidea onartu eta 6.000 euro galdu genituen. Ordutik hona burua altxatu ezinik ibili gara.
Euskarazko aldizkari batek ez dauka interes komertzial handirik enpresetarako. Erdarazko produktuak badauka publiko osoari heltzeko segurtasun osoa, guztiok gaztelaniaz dakigu eta. Ez dugu publizitate aldetik aurreikusitakoa jaso, ezta urrik ere.
Instituzio publikoetatik dirulaguntza jaso dugu (iaz proiektuaren %55), baina beti urtearen erditik amaiera aldera, eta aldizkariko gastuak hilero ordaindu behar izaten dira. Horrela ez dago bizirik irauterik.
Aurten Diputazioak eta Eusko Jaurlaritzak herri aldizkariei aurrekontuaren %40 auto finantziazioa eskatzen diete. Iaz baino %5 gehiago. Ondoren jotzen duzu eurek ateratako EBPN (Euskara Biziberritzeko Plan Nagusia) ra eta gutxieneko baldintza batzuk beteta, diruz laguntzea irakurtzen duzu eta barregura sortzen dizu. Udalaren batean irabazteko asmorik gabeko elkartea izango ez bagina bezala tratatzen gaituzte diru zuriketaren orduan.
Denbora gehiago eman dugu balantzeak koadratzen eta ekonomiari erreparatzen aldizkariari berari baino. Eskerrak kazetari multifuntzionala izan dugun eta berak gure hutsuneak bete dituen.
Beste arrazoi nagusienetako bat gure inkonpetentzia izan daiteke, ezelango dudarik gabe. Dena dela, alde positiboak ere egon dira, eta txalotu beharrekoak: Joxe, kazetaria, fenomeno bat izan da. Langile nekaezina eta denerako prestua. Bikaina benetan. Orain langabezira doa. Erredakzio taldea, benetan bikaina. Eskerrik asko.
Artikuluak, gutunak, kolaborazioak... bidali dituzuenoi, eskerrik asko.
Beste barik, nahikoa negar egin dugu eta. Orain daukagun zorra kitatzeari ekin beharko diogu. Horrek, dudarik gabe, eskuartean geneuzkan hainbat proiektutan eragin zuzena izango du, diru galera suposa diezaguketenak bertan behera utzi beharko baititugu (antzerkiak, berbalagun...). Moral aldetik ere nahiko jota gaude eta gure aurrera begirako bidearen inguruan hausnarketa egin beharra dugu. Argi daukaguna da administrazioaren aurrean eskale moduan ezin garela ibili, baita gizarteak ere euskararen inguruan konpromezu handiagoa hartu beharra duela.
Txarto esanak barkatu, ondo esanak kontuan hartu. Plazerra izan da. Beste bat arte.
ABARRAK EUSKERA TALDEA
Erantzunak
Kasualitatea. Hemen ondoan dut Artandaperen zenbaki bat, hamargarrena. Erakarrita hartu nuen, Arrigorriagan, gabonetan. Ederra iruditu zitzaidan, elegantea, dinamikoa, bizia, diseinu erakargarriarekin, gai lokalak ondo uztartuta...
Badaramatzat urte batzuk prentsa lokalean ekiten, eta adibide ezberdinak ikusi ditut Bizkaia maite honetan, batzuk oso onak (Artandape bera, Begitu, UK eta Prest) eta eskas samarrak ere (Bermeokoa, Txorierrikoa....)
Baina ezin jasan dudana da, aldizkari bat desagertzea. Gutxiago Joxek kordinatu, egin, idatzi, pentsatu eta bizi zuena ezagututa.
Kazetari ona eta fina da Rojas. Interneten aspalditxotik gabiltzanok ezagutzen dugu bere gaitasuna, eta negar eta barre batera egingo dugu.
Artandape bizi dadin! Paperean ez bada sarean...
Lotsatuta nago, politikari, administrazio eta herrilan arduradun hauek guztiengatik. Errepide bat amaitu barik uzten duten egunean, neuk dimitituko dut.
EAJk zer dioen? Arrigorriagan baduela nahiko lan dagoen beste aldizkaria, 'Arrigorriaga Hoy', finantzatzen... tira, letxe txarra kontrolatzen saiatuko naiz.
Hau da azken zenbakiak eramago duen portada:
Hala ere, eta nonbait jasota gera dadin, berez eraman behar zuen portada ere erakutsi nahi dizuet. Ez dakit, elkarrizketatuarekin (Arrankudiagako eskolako zuzendariarekin) zorretan geratu naizelako inpresioa daukat. Beno, berarekin eta beste askorekin. Barkatu guztioi, ez zen gure asmoa horren presaka amaitzea. Nik neuk ere ezin dut sinetsi oraindik! :/
Tira, 'para la posteridad', 14. zenbakiak berez eraman behar zuen portada...
Oporren ostean erredakzio taldekook bilduko gara ea proiektuari segidarik emateko modurik bururatzen zaigun. Edizio elektronikoarena neuri ere bururatu zait... KOntatuko dizuet.
Azkenean nazkatu egiten da bat euskalgintzan ibiliz gero beti eskean eta alde guztietatik ostiak jasotzen ibili beharraz...
"Lotsatuta nago, politikari, administrazio eta herrilan arduradun hauek guztiengatik."
Noski, lotsagarriak baitira hainbat jarrera hipokrita horiek guztiak.
Baina asuntoa da instituzinoek ez deukiela erru oso-osoa. Joxe-k berak autokritika egin dau, baina erruaren beste zati bat herritarrona da, eta ezin dogu ahaztu: herritarron axolagabekeria, konpromiso falta, holako produktuak egitea zenbat kostatzen dan ahaztea, euskara normalizatzea kaleko euskaldun guztion erantzukizuna be badala,...
Ea ondo azalduko dodan: "Artandape" kasuan instituzinoek eskatu eutsien autofinantzatzeko zati bat. Ni neu ibili naz Bilboko auzo baten aldizkarian ("Zorrotz Morrotz"-en) eta jentearen edo irakurleen pasibotasun itzela zer dan badakit. Dagoenean on, baina ez dagoenean...
Autofinantzabidea lortzeko beste alkarte batzuk kuota kobratzen dabe, eta irakurleek batzuetan nahita nahiez eta bestetzuetan boluntarioki ordaindu behar izaten dabe. Herritarrak prest dagoz holako produktuak pagatzeko? Nago askotan "Diez Minutos" eta halako kaka zaharra erosteko hainbatek ezer kuestionatzen ez dabela, baina herriko edo auzoko aldizkaria danean emoten dau danak dohainik izan behar dauala. Oso txarto hezita gagoz. Eta "Egunkaria"ren itxiera eta gero, holako zeozer (biderkatuta) ikusi ahal izan genduan. Orduan esnatu ziran hainbat "euskaltzale".
"Artandape"ri jagokonez, gustura asko irakurri neban 13. zenbakia, neure lagun minak emonda. Berton azaltzen baitziran Ollarganeko "Zubietxe" alkartearen nondik norakoak. Neu izan nintzan berton Prestazino Soziala egin eban kontzientzia eragozle lehenengoetarikoa, eta gaur egun harremana deukot eurekin oraindino. Kriston ilusinoa orduan artikulua ikusi izanagaitik.
Bihotzez, MILA ESKER ABARRAK!!
Horrenbeste Korrika eta horrenbeste jai, eta gero ez gara kapazak herri aldizkari bat mantentzeko. Zertarako balio du horrenbeste izerdi eta lan, proiektu estrategikoak bertan hil daitezen uzten baldin badugu? Eta EAJ-k honen inguruan zer dio?