Teknologia berrien bitartez, euskara sustatzeko laguntzen onuradunak
Eusko Jaurlaritzaren Kultura Sailak teknologia berrien bitartez euskara sustatzen dutenei zuzendutako dirulaguntzak banatu berri ditu.
Dirulaguntzak bost multzotan banatu dira. Hauek dira multzo bakoitzean puntu gehien izan dituztenak:
1-. multzoa: Euskararen ondarearen informazioa digitalizatu eta zabaltzeko egitasmoak.
- Bonaparte ondareko eskuizkribuak: edizio elektronikoa (Deustuko Unibertsitatea)
- Literaturaren zubitegia (Estrata Liburuak, S.L.)
- Azkue hiztegia (Aurten Bai Fundazioa)
2-. multzoa: Aisialdirako ekoizkinak.
- Euskararen multimedia gordailua (Mediategia) (Hori-Hori, S.A.L.).
- Galde debalde (Plazagunea, S.L.).
- Bat, bi, hiru, lau, bost, Urdintxo eta Pox (Gipuzkoako Ikastolen Elkartea, Kop. Elk.).
3-. multzoa: Internet-en bidez euskarazko zerbitzuak, baliabideak eta produktuak eta edukiak gizartera zabaltzeko egitasmoak.
- Ikastolen Konfederazioaren web gunea 2003 (Euskal Herriko Ikastolen Elkartea).
- www.gureirratia.com (Topagunea, Euskara Elkarteen Federazioa).
- Hemeroteka zerbitzua (Euskal Editorea, S.L.)
4-. multzoa: Hizkuntzen teknologietan euskara integratzeko proiektuak.
- Snowball-erako euskarazko lematizatzailea (CODESYNTAX, S.L.).
- Alegiazko aurkezleak euskaraz Interneten (ASOCIACIÓN Vicomtech).
- Etsedi euskaraz (Xmadina Tecnologia Adaptativa, S.L.)
5-. multzoa: Softwarea euskarara lokalizatzea edota euskaraz sortzea.
- Elkarteen kudeaketa integralerako erabilpen baten garapena euskaraz (BIGE, Gurasoen Elkartea).
- EDIT-ON (Goiena Komunikazio Zerbitzuak, Koop. E.).
- Webgune.net (Kaixo! Internet, S.L.).
Eusko Jaurlaritzaren webgunean dago eskuragarri dirulaguntzen gaineko dokumentua.
Erantzunak
Etorkizunari begira, Sustatu hobetzeko berrikuntzak egin nahi ditugu, baina 2003 urtean izan ditugun berrikuntza eta hobekutzak aipatzea badago:
- Lehen ez zeuden atal berriak sortu dira, BWEB atala, pil-pilean, azkenak,...
- Joan zen urtetik, Sustatuko albisteak euskarazko interfazearkin eta publizitaterik gabe banatzen dira, Postaria.com erabiliz.
- Sustatu-k duen euskarazko bilaketa sistema hobetu et arindu egin da.
- PDA-rako bertsio bat ematen da, eta RDF estandarraren bitartez gure albisteak beste webguneetan integratzea errazten dugu edo PALM bezalako sistemetan Sustatu-ko albisteak irakur daitezke.
- Web zerbitzaria hobetu eta berritu egin dugu. Gainera, zerbitzua hobetu nahiean, egun gutxi barru zerbitzaria Zamudiora eramango da.
Beste datu aipagarri batzuk, teknikoak ez direnak, baina 2003 urteko jarduera laburtzeko balio dutenak:
- Sustatuk euskarazko 350.000 mezu banatu zituen 2003 urtean.
- Sustatu-n argitaratutako 1.135.511 orri ikuskatu ziren 2003 urtean.
- Sustatu-k 249.009 banakako bisita izan zituen 2003 urtean.
- Sustatu eta euskal weblogintza-ren aurkezpenak egin ziren 2003 urtean, esate baterako, Informatikari Euskaldunen Biltzarrean (IEB2003) edo Software Libreko (Merkatal Ganbarakoak) jardunaldietan.
Besteak beste, asmo edo ardatz hauetan sakontzeko asmoa dugu 2004 urteari begira:
- Informazioaren sorkuntza eta hedapenean sakondu.
- Profesional Euskaldunen komunitatearen trinkotzea.
- Dedikazio profesional handiagoa izatea (2003 urtean izan dugunaren hainakoa, gutxienez)
- Berrikuntza teknikoak egiteko asmoa dugu (atal berriak, XHTML-ra pasatu, zerbitzaria berria, ...)
Azken batean, gure posibilitateen barne, egunero Sustatu irakurri eta egiten duzuenoi ahalik eta webgune erakargarriena eskaini nahi dizuegu.
Sustatu dirulaguntzarik gabe geratu da deialdi honetan. Irakurleek dakiten bezala, bi enpresen arteko ekimena da webgune hau, baina elkarlanean hobeto aritzeko, Ogasun Elkarte bat eratu genuen Goiena eta CodeSyntax-en artean. Ogasun Elkarte hori aurkeztu da dirulaguntzetara, baina atzera bota dute eskaera, O.E. bat ez delako pertsona juridiko bat, deialdiko baldintzetako bat.
Eta halaxe da, bai. O.E. batek ez dauka pertsonalitate juridikorik, nahiz eta notaritza baten aurrean legez eratutako elkarte bat den, kontu korronte propioak dituen eta, kasu honetan, Gipuzkoako Ogasunean zergak ordaintzen dituen.
Gainera, Sustatu O.E.-aren atzean, bi entitate juridiko oso daude, eta biek, CodeSyntax-ek eta Goienak, baldintza guztiak betetzen dituzte, deialdi honetan bertan biei proiektuak onartu izanak erakusten duen bezala.