Urola-Kostako "Hitzak" hasiera ona
Ostiralean sortu zen Urola-Kostako Hitza euskarazko egunkaria, eta hasiera ona eduki du, aurkezpenean era guztietako ordezkariak bildu zirelako eta herritarrek oso gustura hartu dutelako.
Urola-Kostan egunero prentsan herri informazioa euskaraz jorratzean zegoen hutsunea bete du eskualdeko Hitza egunkariak. Ostiralean atera zuen lehen zenbakia, eta babes eta harrera onarekin ekin dio bideari.
Aurkezpen jaia
Ostegun iluntzean izan zen lehen zenbakiaren aurkezpen-festa, Zarautzen, eta era guztietako ordezkariak bildu ziren: erakundeetakoak eta politikariak (Joxe Joan Gonzalez Txabarri Gipuzkoako ahaldun nagusia, Batasuneko mahaikideak, eskualdeko udal ordezkariak...), euskalgintzakoak, kulturakoak, gizarte eragileak, herritarrak... Gaur atera du Hitzak bigarren zenbakia, eta herritarrek oso gustura hartu dute. Bi asteotan banaketa masiboa egingo du, eta gero 10.000 harpidetza lortzeko helburua dauka (izena ematen duenak jasoko du egunkaria). Urola-Kostako egunkaririk banatuena izango da orduan. Lehen bi zenbakietan, Iñaki Uriari eta Txabarriri egindako elkarrizketak izan dira artikulu nagusiak.
Hitza osatzen dute:
Eskualdeko Txaparro, Uztarria, Baleike, Danbolinzulo eta Artzape, EKTko Bertako Hedabideak, eta Urola-Kostako gizarte eragileak dira Hitzaren enpresako bazkideak.
Nolako egunkaria?
Egunkaria asteartetik igandera argitaratuko da, egunero 8 orrialde (batzuetan 12 ere bai; gaur, adibidez), eskualdeko 11 herrietako berri emango du, eta etxera banatuko da (51.000 euskaldun daude eskualdean). Zarautzen du egoitza nagusia, eta Azpeitian bestea.
Laugarren "Hitza"
Urola-Kostakoa da laugarren Hitza. Tolosaldeak badu berea (Tolosaldean Egunero 2001eko abenduan sortu zen, eta Egunkariaren itxieraren ondoren, Tolosaldeko Hitzak hartu zuen Tolosaldean Eguneroren lekua), Oarsoaldeak ere badu (2003ko ekainetik) eta Lea-Artibai eta Mutrikuk ere bai (2003ko azarotik). Urola-Kostakoak bere helburua lortuz gero (oso posiblea ikusten da), lau Hitzen artean 27.000 aleko tirada izango dute egunero, eta hori arlo komertzial aldetik ere oso garrantzitsua izango da, publizitate etxe handiak erakartzeko.
Erantzunak
Uztarria.com webgunean, aurkezpen jaiaren berri eman dugu argazkien bidez.
Hitza nolakoa den ikusteko, berriz, 0 alea eskura dezakezue pdf formatuan oso-osorik.
Dudarik gabe, zorionik beroenak. Aurrera goaz.
Baina, HItzak non kaleratu diren ikusita, galdera bat: ez al da estrategikoki interesgarriagoa Hitza moduko egunkari lokalak (Berria-ren osagarri bikainak) hiri handietan argitaratzea?
Donostialdea, Bilbo ingurua, Iruñea, eta abar...
Gogoeta bat da, besterik gabe.
Bilbori jagokonez, aspaldian plazaratutako asmoa da uri mailako aldizkari batua egitea, ez orain arte legez nor bere kabuz aritzea. Dena den, inkisidoreak nahi izan dauan arte, "E.Egunkaria"ko "Bizkaia" gehigarrian orain dala urte bat arte inguru honetako barriak jasoten genituen, eta mendebaleko euskaraz.
Gaur egun martxan dagoz proiektuak honakoak dira:
- Prest Deustuko "Berbaizu" alkarteak egindakoa.
- "Berton". Mahatserriko aldizkaria (Begoña, Santutxu, Uribarri, Solokoetxe,...).
- "Zorrotz Morrotz". Zorrotzako Euskal Txokoak argitaratua.
Eta Bilboaldean orokorrean, "Bilbo Handia" esaten dan eskualdean, beste egitasmo batzuk be kalean dagoz. Besteak beste, "UK" Uribe-Kostako proposamen ikusgarria, Arrigarriako aldizkari barria edo Barakaldokoa.
Aukera ederra izango zan gaia barriro hartzea eta alkarte guztiei "Bilboaldeko (Bilbo Handiko) Hitza (Berba)" proposatzea. Geure esku.
Aupa!
Zorionak danoi! Ez dakizue ze poza hartu dudan, "Hitza" jasotzean.
Orain, Diario "Vasco" erosi nahi ez dugunok ere herriko berriak jaso ahal izango ditugu.
Gainera, ziur naiz lan txukuna egingo duzuela, 0. alea eta 1. alea ikusi besterik ez dago.
Ba hori, zorionak eta animo!!