Teknologia albisteak
7

Buber: Webgunerik onena futboleko bat, aupaathletic.com

Erabiltzailearen aurpegia
Sustatu - Bilbotik
2003-12-04 : 00:12

2003ko finalistak izan dira: euskadi.net, Irungo Udala, Agendalia, Divulcat, Aupaathletic.com, Athletic club, Akelarre, Dedo Multimedia, Euskonews, Canal Bizkaia, Bakio.org, EnteraT.com, Bizkaie! eta Sustatu.com. Denetatik boto gehien jaso dituena izan da aupaatthetic.com. Zorionak!

Hainbat sailetan banatu dira eta sailez sail eman dira sariok, horrela banatuta. Hemen agertzen direnak finalista izan dira eta zuen webgunea ere, Sustatu.com, finalisten artean geratu da. Zorionak denori!!!

  • Erakundeen webgunerik onena: Euskadi.net eta Irungo Udala. Valentin Garciak, Internet euskadiko presidenteak eman dio saria. Euskadi.net atariari. Jokin Olaizolak jaso du saria eta eskertu du. Azpimarratu ditu kideak eta beraientzat eskatu txaloak.
  • Webgune pertsonalik onena: Agendalia eta Divulcat. Iñaki Suarezek eman die saria divulcat atarikoei, SPRIko Informzio Gizartearen Ataleko zuzendariak. Alex editoreak jaso du saria. Honek ere denei eskertu die, lanean aritu diren guztiei.
  • Kirol webgunerik onena: Aupaathletic.com eta Athletic-Club. Iñaki Regidorrek eman die saria. EITBko sisteman zuzendariak. Zubizarretak jaso du saria, nahiz eta beste baten izena emana zegoen. Epaimahaiari eskertu dio saria eta baita orriak idazten dituztenei ere. Modernitatearen eta euskararen aldeko apustua egin dutela aipatu du Zubik. Gurpegik joka dezakeela ere jarrita dago webgunean. Hori da azkartasunaren adibiderik onena. Aupa Athletc esanda amaitu du. Irabazle, beraz, Athletic club.
  • Ataririk onena: Bakio.org eta enteraT. Aitor Kobanerak eman die Bakio.org -ekoei sari nagusia. Saria Txomin Renteria Fernandezek jaso du, Bakioko alkateak. Nerbioso antzean, asko eskertu du sari hau eta ohitu gabe dagoela gaineratu du. Atari dinamiko bati eman diote saria eta hori eskertzekoa da, egunean 300 bisitatik gora dituzte.
  • Enpresa webgunerik onena: Akelarre eta Dedomultimedia.com. Saria eman du Iñigo Atxutegik, Berrikuntza eta Ekonomi Sustapeneko zuzendari nagusiak Akelarre.net -i. Subijanaren webgunea da hau.
  • Hedabide webgunerik onena: Euskonews media eta Canal Bizkaia. Jose Antonio del Moralek eman du saria, Internet Euskadiko Batzorde kideak. Velez de Mendizabelek jaso behar bazuen ere, andrazko batek jaso du. Ekipo guztiari eman dizkio eskerrak, eta baita parte hartu duten 1.500 kideei ere. Irabazlea, beraz, euskonews.
  • Kultura webgunerik onena: Dantzan.com eta Fundacion Catedral Santa Maria. Iñigo Atxutegik eman du sari hau ere. Oier Araolazak jaso du saria dantzan.com -en izenean. Dantzarien Informazioa bideratzeko sortu zela esan du Oierrek. Saria guneak funtzionatzea da eta sari honekin Internet komunitateak ere aintzat hartzea poztekoa da. Euskaraz sortutako gunea errekonozitzea ere eskertzekoa da. Eskerrak eman dizko baita ere C&S enpresari.
  • Euskara Interneten hedatzen gehien lagundu duen webgunea: Bizkaie! Eta Sustatu.com. Aitor Kobanerak entregatu du saria. SPRIko zuzendari nagusiak. Finalera heltzea ere nahikoa zen, baina ederra izan da saria jasotzea, Bizkaieko arduradunak esan duenez. Bizkaiera egunean-egunean erabiltzen duten guztiei eman diete saria. BIZKAIe izan da saritua
  • Webgunerik onena: aupaathletic.com izan da. Zorionak! Finalean geratu direnei diplomak banatu dizkiete. Euskal Webgunerik Onena hogeiren artean aukeratu behar eta aukeratua izan da: aupaathletic.com. Tontxu Canposek eman die errekonozimendua.

Ondo ulertutako elebitasunean jardun du aurkezpenak egiten Leire Zorrozuak. Hark argitu digu 1.000 internautak baino gehiagok hartu dutela parte bozketan.

Amaieran, Jose Antonio Del Morali ere eman diote saria, antolatzaile lanetan aritzearren. Buber ere eskertu du hitzaldi motzean Del Moralek. Amaitzeko Internet Euskadiko presidenteak egin du berba, eta euskaraz egin ere. Mezu bakarra, eta bere esanetan garrantzitsua eman du esanaz, pertsonak direla ordenagailu atzean daudenak.

Horren ostean, mokadurako unea. Ardo onarekin errazago eramaten da eguna. Guk berri hau idatzi dugunean, webgune batek ere ez zuen jarrita Buber saridun zirela. Horra Euskaldunan idatzitako berria Sustatuko irakurleendako. Guri tokatu zaigun aldetik, zorionak Sustatuzale guztioi, botoa eman diguzuenoi eta batez ere fin-fin Sustatu irakurtzen duzuenoi. Zuena da diploma.

Erantzunak

JOSEMARI VELEZ DE MENDIZABAL
2003-12-04 : 10:48

Niretzat, eta -uste dut- Sustatu-ren aleak egunero (eta ia-ia minutuoro) jasotzen ditugunontzat zuek zarete "gure sariaren" irabazleak.

Aupa eta segi aurrera, orain bezain langile.

Manolete
2003-12-04 : 11:00



> - **Webgunerik onena**: "aupaathletic.com":http://www.aupaathletic.com/Home/default.asp izan da. **Zorionak**! Finalean geratu direnei diplomak banatu dizkiete. Euskal Webgunerik onena hogeiren artean aukeratu behar eta aukeratua izan da: aupaathletic.com. Tontxu Canposek eman die errekonozimendua.



Parkatu, baina duda traszendentala eragin dit berri honek gaur goizean. Honako aukeren artean nabil zalantzan:



a) Ez dakit webgune honen euskarazko bertsiora iristen.

b) Webgune honek ez dauka euskarazko bertsiorik.



Erantzuna a) bada, torpea naiz eta zer egingo zaio.

Erantzuna b) bada, gu ergelak gara (euskaldunok) Zergatik eman diote (diogu) saria erdara hutsezko leku honi?



Jimenez Losantos
2003-12-04 : 11:24

Zalantzarik ez izan, B aukera.



Alkate erdaldunak aukeratzen ditugu, lehendekari erdaldunak, ahaldun nagusi erdaldunak, erdal egunkariak irakurtzen ditugu...



Nola ez du ba erdal webgune batek irabaziko?

Andoni
2003-12-04 : 15:42

Nola izan daiteke gaztelera hutsezko webgune bat "euskal" webgunerik onena? http://www.aupaathletic.com gaztelera hutsean dago.



Zergatik ez da euskara sustatzen Buber sarietan eta Buber webgune izateko euskara beharrezko arautzen? Soilik gazteleraz edo frantsesez informazioa emango lukeen webguneak ezin izango luke webgune onena izan, euskaraz ez dagoelako. Euskaraz aritzen dugunon hizkuntza nagusia, euskara bera, kontuan hartzen ez duelako.



Noiz jabetuko gara, Euskal Herria Bizkaia eta "Euskadi" baino gehiago dela... nola suertatu dira aurten irabazle Bizkai aldeko 4 gune? Bizkaitik kanpo webgune gutxiago egiten da? Edo jasotako botu kopuruak zerbait ikusi al du saria ematearekin?



Orduan, benetan al dira webgunerik onenak? Gehien ikusten dena ez du zertan onena izan behar.



r. xalba garez
2003-12-04 : 18:09

Halako zeozer dio: Egun euskalduna izatea oso erraza da, hitz batzu buruz ikasi... eta haien artean "aupa Athletic!!" edo jarri segidan nahi duzuen klubaren izena.



Taxi Driver
2003-12-04 : 19:10

Ba hori, biba la jinastika.

dabilen harria
2003-12-04 : 22:22

Hori uste dot, ezen Bizkaiko EAJren hainbat alkatek, edo EAJren agintepean dauden udal batzuk ukoa eman diote EBPN garatzeko ekimenari.



zer egin dezakegu agintarion nahi ezaren gainean .?





Zer deritzozue?

Erantzun

Twitter ikonoa  Facebook ikonoa  Sartu

Publizitatea

Jarraitu sustatu.eus

E-postaz, mezuz mezu:

E-postaz, eguneko buletina:

  • rss ikonoa

»» Aukera gehiago