Ibarretxe: "gaur egungo eskenatoki zailaren gakoak ulertzen lagunduko du elkarbizitzarako planak"

Ibarretxeren esanetan, gaur egungo eskenatoki zailaren gakoak ulertzen lagunduko du elkarbizitzarako planak. Giza eskubideen aldeko eta talde erabakiak errespetatzearen aldeko konpromisoa erakutsi du.

Azken urte honetako gertakari batzuk azpimarratu ditu, gizartea markatu dutelako. Lehendakariaren esanetan, “zailtasunak zailtasun euskal gizarteak osotasuna eta lasaitasuna erakutsi du”. Euskal gizarteak geldi ez dagoela eta aldaketa nahi duela adierazi du Ibarretxek.

ETA giza eskubideen aurkari nagusitzat jo du eta bere indarkeria amaitzea eskatu du. “Proposamen honek ETA gure bizitzatik kanporatu nahi du”, gaineratu du Lehendakariak.

Hona hemen azaldu dituen gai nagusiak:

• Oraingoa, egoera sozio-politiko berri baten hasiera dela azpimarratu du, elkarbizitzarako plana, egoera berrirako erantzuna dela gaineratuz. "Proposamenak euskal gizartearen aldaketarako nahiari erantzun nahi dio", esan du.
• ETAren indarkeria azken berrogei urteotako etengabeko kontua izan dela azaldu du, tregua garaian izan ezik. Ibarretxeren esanetan, "bizitza eskubidearen aurkakoa da eta oraindik ere, pertsonen sufrimendua eragiten jarraitzen du".

Ibarretxek esan du bere proposamen politikoa trinko eta serioa dela; ETA kanporatu nahi du. Horrela, aro politiko berri bati hasiera emateko, “etapa post ETA”. Ibarretxek gaineratu du, ETAk badakiela prozesuan aurrera egiteak bere amaiera dakarrela.

• Prestige eta Iraken auzietan Espainiar Gobernuak izan duen jarrera salatu du. Nabarmendu duenez, gizartea aurka egon arren, espainiar Gobernuak berearekin jarraitu du. Beraz, axolagabeko jokabidea izan duela egotzi dio.

Prestigeren hondamendiak Euskal kostaldean eragindako kalteen aurrean erantzukizunik ez hartu izana egotzi dio Ppren gobernuari. Irakeko auzian, PPk modu unilateralean jardun duela azaldu du Ibarretxek, legez kanpo eta okerki.

• Terrorismoaren aurkako borrokaren disfrazarekin, PP demokraziaren aurkako estrategia egiten ari dela adierazi du Ibarretxek. Alderdi politikoen legea, Batasunaren ilegalizazioa, Egunkariaren itxiera eta botere judizialaren politizazioa gaitzetsi ditu.

Ekintza horiek guztiek, norbanakoen askatasuna eta euskal gizartearen askatasuna mugatzen dutela esan du Ibarretxek.

Ondorioak

1. Euskal gizarteak elkarbizitzarako apostua egin du. Krispazio, inmobilismo eta indarkeria proposamenak arbuiatzen ditu. Euskal gizarteak bakearen, demokraziaren eta elkarrizketaren aldeko apostua egin du.
2. Euskal gizartea, bidean aurkitu dituen oztopo guztiak gaindituz, aurrera egiteko gai izan da eta errespetuan oinarrituriko gizartea eraikitzen jarraitu du.