Valdemoroko isolamendutik
Uztailaren 31n, goizeko 8:20an ertzainek atxilotu ninduten etxetik irten eta korrika egitera nindoala. Atxiloketa Audientzia Nazionalak agindu zuela esan zidaten eta nengoen bezala, praka motzetan, eraman ninduten nahiz eta behin eta berriz esan arropak hartzen uzteko.
Bi hilabete eta erdi lehenago, maiatzaren 16an, atera ninduten espetxetik ezarritako zigorra oso-osorik bete ondoren. Zigor honetan sartzen ziren 1978tik 1983ra arteko ekintza batzuk. Ez dakit zehazki guztira zenbat urtetako zigorra jaso nuen; badakit, halere, garai hartako legedia aplikatuta, jaso nezakeen zigorrik handiena jarri zidatela, hau da: 30 urteko kartzela zigorra. Honek esan nahi du zigorra 50 urtekoa ala 2000 urtekoa izan, adibidez, berdin-berdin diola, 30 urteko espetxe-zigorra baitzen garai hartako gehienezko kartzela-zigorra.
Audientzia Nazionala legez kanpo jokatzen ari da eta badaki
Orain 1981eko sumario bat zabaldu dute eta hori dela eta espetxeratu naute. Zergatik ez ninduten, baina, bere garaian epaitu? Izan ere, esan dudan eran,orduan epaitu banindute ezin izango baininduten 30 urtetik gorako espetxealdira kondenatu; eta zigor hori beteta daukat nik dagoeneko. Audientzia Nazionala legez kanpo jokatzen ari da eta ederki asko daki hori gainera.
Huts bat zela pentsatu genuen hasieran
Hasieran guztiok pentsatu genuen “huts” bat egin zutela baina berehala kaleratu beharko nindutela. Gero hasi ginen konturatzen ez zela “huts” bat izan eta guztia ondo prestatuta zutela ni ahalik eta denboraldirik luzeenean espetxean edukitzeko. Garzon epaileak, Fungariño fiskalak hala eskatuta, agindu zuen ni atxilotzea, baina agindua eman bezain laster oporretan joan zen. Audientzia Nazionalera eraman nindutenean Andreu epailea zegoen guardian. Berak agindu zuen ni espetxeratzeko, baina hau ere oporretan joan zen hurrengo egunean. Geroztik eskuak garbitu dituzte guztiek eta ni hemen naukate Valdemoroko isolamenduan.
Egin dutena Astakeria da!
Zuzenbidean aditua den jende askori azaldu diogu gertatutakoa eta guztiak bat etorri dira: nirekin egin dutena astakeria handia izateaz gain, legez kanpokoa da erabat. Baina hauei bost axola zaie “legea”, nahiz eta beren legea izan; beraz Justizia hitz potoloari buruz zer esan nezake…
Lehena da, baina azkena?
Lehen aldiz gertatzen da halako bat estatu espainiarrean. Etsaia ezagututa harritu ez gaitu harritzen; izan ere, hauek, gu izorratzeko, etengabe ari baitira bide berrien bila. Ez dago esan beharrik, oraingoan ondo ateratzen baldin bazaie, jarraian beste lagun batzuekin saiatuko direla. Beraz, behin eta berriz galdera bakarra etortzen zait burura: espetxetik zigorra oso-osorik beteta ateratzen garenoi zein irtenbide uzten digute?
Noiz erantzungo dugu?
Lehen aldiz espetxera sartu nindutenean, bertan ETAkoak bakarrik aurkitu nituen. Oraingo honetan kale borrokakoak, Segikoak, Haikakoak, Askatasunakoak, Euskaldunon Egunkariakoak, Udalbiltzakoak eta abarretakoak aurkitu ditut. Oso zabala da lagina, baina, zoritxarrez, oraindik beste arlo batzuetan ari direnei ere tokatuko zaie espetxea ezagutzea; ni gutxienez horretan nago. Noiz erantzungo dugu, gure osotasunean, herri erasotua garen aldetik? Garaia dela uste dut…
Bukatzeko, eskerrak eman nahi dizkizuet ni atxilotu ondoren zuen haserrea eta elkartasuna adierazi duzuen / didazuen guzti-guztioi. Lasai asko, ezer egin gabe, geratu / geratzen zareten herritarroi ere esan nahi dizuet zertxobait: noizbait espainolen legea aplikatuko zaizuen zoritxarrean aurkitzen bazarete (munduak itzuli asko ematen ditu), guk kalean salatuko dugu eta gure haserrea agerian utzi; honetan ez izan zalantzarik.
Bai neuk eta baita zeuek ere, beraz, inoiz baino tinkoago: aurrera bolie!
Enrike Letona Biteri
Erantzunak
Hemendik Enrikeri eskaini ahal zaiona babesa eta elkartasuna dira. Hortaz, gutuna irakurri dutenei zein ez dutenei beraien aldetik eman ahal dutena eman dezatela eskatzen diet, eta Euskal Herriak bizi duen egoerari erantzun bat ematea.
Besterik gabe, animo Enrike eta ea laister kalean ikusten garen!!!
Txomin-en esaldia inoiz baino ozenago esan behar da momentu honetan: AURRERA BOLIE!!!!!!!! Eta segi aurrera!
Tamalez, gero eta ohituratuagoak gaude horrelako astakeriak entzutera, eta gure erreakzioa, maizegi, "bertze bat gehiago" izaten da. Justizia guti banatzen duten auzitegietatik itxaropenik apenas ez dugunok, elkartasuna dugu aitzin egiteko bidea. Besarkada bat Enrikeri eta inguruko guztiei.
Mendeku usaina du zurekin egiten ari direnak, Enrike, gorrotoak bultzatutako mendekua. Honek ez du zerikusirik justiziarekin.
Ospitaletik irten nintzenean jakin izan nuen berriro espetxeratu zintuztela, eta haserretu egin nintzen. Hala ere, barkatuko didazu ez badizut bidaltzen irrintzi bat mendi tontorretik, etab., etab. Zure egoera eta zure antzera, mendekuaren ondorioak pairatzen dutenena konpondu egin behar da lehenbailehen. Eta ETAren armak isildu, betiko. Denon artean eten behar dugu gurpil zoro hau.
Beharbada hau ez da erantzun tipikoa. Hala ere, nire kezka adierazi nahi nizun, eta elkartasuna erakutsi. Laster kalean ikusiko zaitugulakoan, besarkada handi bat zuri eta zure familiari.
Buruari hotz eustea kostatzen da halakoetan. Makinaria bortitz batek, engranajeak jira eta bira jendea gorputzez eta arimaz nola txikitu nahi duen ikustea latza da. Hori da espetxea.
Kupidarik gabe, gelditzeko zirkinik ere egin barik.
Eta hori urtez urte, -semea gazte sartu eta ilezuri atera- ikusten duen senideak, maiz askotan ingurukoei guzti hori ulertarazteko lanak dituzten aita-amek arnasa behar dute.
Arnasik onena irtenbide baten aldeko lana, konpromezu positibo eta sendoa dela uste dut. Gainerakoek kaskoak berotu eta ernegatzeko baino ez dute balio, eta irtenbidea are urruntzeko.
1987ko urritik 2003ko maiatzera bitartean kartzelan izan ondoren, aske utzi zuten ezarritako zigorra oso-osorik beteta zeukalako. Hala ere, kalean bi hilabete egin ondoren, berriro ere atxilotu egin zuten uztailaren 31n eta Valdemoroko bakartze-ziega batean sartu.
1981eko sumario bat aitzakiatzat hartuta, espetxeratu egin dute berriro eta 3 hilabete daramatza, dagoeneko, berriro kartzelan. Gehienezko zigorra baino hiru hilabete gehiago bete ditu jada, beraz, preso.
Arrasatear honekin egiten ari diren bidegabekeria salatu eta lehenbailehen aska dezaten eskatzeko, bilgune zabala osatu da herrian. Pentsakera ezberdinetako eta sektore anitzetako pertsonak elkartu gara helburu horiek lortzeko.
Bilgune honen izenean, dei egiten dizuegu parte har dezazuen datorren larunbatean, hilaren 15ean, Arrasaten egingo dugun manifestazio ixilean. Manifestazioa arratsaldeko 7etan abiatuko da udaletxeko plazatik.
Enrike arrasatearra bada ere, arazoa preso guztiei dagokie eta, azken finean, gizarte osoari. Egun horretan gurekin nahi zaituztegu, beraz, ingurukoak eta urrutiagokoak.
Bi mila eta ehun lagunek manifestazio isila egin dute Arrasateko kaleetan zehar, Enrike Letonaren askatasuna eskatzeko. Manifestaziorako deia Bilguneak egina zen, Enrike Letona askatzeko taldeak.
Manifestazioa herriko plazan abiatu da, eta hantxe bertan amaitu, herriko kaleak zeharkatu ondoren, beti ere isiltasunik handienean. Bukaeran, Iñaki Mendiguren itzultzaileak irakurri die mezu bat han batutako guztiei.
Mezua
Iñaki Mendigurenek gogorarazi du zer egoeratan dagoen Enrike Letona: nola espetxeratu zuten, kondenatu, askatu eta berriro atxilotu, zigorra bete ondoren. Hori gogoan, hiru puntu azpimarratu ditu:
- Lehenik, ez dagoela ezelako oinarri edo euskarririk Enrike berriro kartzelan edukitzeko.
- Bigarren, politikoki, euskal presoei bizitza osoko kartzela-zigorra ezarri nahi zaiela.
- Azkenik, izugarrizko krudelkeria dela arrasatear honekin egiten dihardutena.
Horregatik jarraitu du Mendigurenek, Enrikeren askapena eskatzeko Bilguneak dei ozena eta irekia egiten dizue arrasatear eta euskal herritar guztioi bidegabekeria honen aurka erreakzionatzeko, bestela egoera berean dauden beste askori ere gauza bera egin diezaieketelako gero.
Bukaeran, eskerrik beroenak eman dizkie han batutakoei, Enrikeren izenean, haren familiarenean eta Bilgunearen partetik. Manifestazioa gaueko 20:00etan bukatu da.
Bilgunea
Bilgunea Arrasaten eratu zen urriaren 29an, Enrike Letona askatzeko. Egun hartan, prentsaurreko bat egin zen Arrasateko Udaletxean, eta han izan ziren, Arrasateko alkatearekin batera, ikuspegi eta jokamolde diferenteko herritarrak: EAJ, EA, Aralar, Herri Anitza eta Zutikeko jendea, ELA, LAB eta ESK-ko ordezkariak, Etxeratekoak eta beste hainbat eragile.
Letonaren idazkiak dena esaten du, argi asko, ez dakit zer erantsi.
Hala ere, nire haserrearen berri eman nahi nuke, ozenki, beste askok isilean egingo duzuen bezala; eta elkartasuna ere adierazi nahi nioke Enrikeri, baita bere adiskide, senide eta lagunei ere.