Euskarazko komunikabideentzako dirulaguntzak: informazioa on-line gaurtik
Gaur eman ditu argitara Eusko Jaurlaritzak Euskararen erabilera sendotu eta indartzeko eta euskarazko komunikabideen egitasmoak bideragarriago egiteko dirulaguntzak. Dirulaguntza horiek eskuratu nahi dituenak gaur hasi eta hilabeteko epea du eskaera egiteko.
Prentsa idatzizko komunikabideei, irrati, telebista zein teknologia berrietako hedabideei zuzenduta dago deialdia.
Baldintzak
Prentsa idatziko laguntzak euskara hutseko proiektuei bideratuko dizkiete, eta gaztelaniazko prentsa idatzian euskararen presentzia areagotzeko ekimenak ere lagunduko dituzte. Euskarazko prentsa idatzian, laguntzak eguneroko prentsari, astekariei, haur eta gazte aldizkariei, bestelako aldizkariei eta EAEko toki-aldizkariei (herri, udalerri edota eskualdekoak) emango dizkiete. Hedabide mota bakoitzaren bereizitasunak, gutxieneko tiradak, maiztasunak eta orrialde kopuruak kontuan hartuko dira.
Euskarazko irrati eta euskarazko herri-telebisten alorrean, baldintza izango da, irratien kasuan: urtean zehar, astez aste gutxienez 25 orduz euskarazko saioak emititzea; eta herri telebisten kasuan, urtean zehar, astean gutxienez 10 orduz euskarazko saioak emititzea.
Informazio gehiago
Laguntzei buruz informazio gehiago eskuratzeko edo inprimakiak lortzeko, Euskal Herriko Agintaritzaren Aldizkarian (EHAA)duzue informazio osoa.
Gaur argitaraturiko deialdian, honakoak ere sustatzen dira:
E multzoa: Euskarazko on-line argitalpenak.
Baina partida ez da oso handia (82.000 euro). Eta eskatzaileak, hedabideak izan behar dira derrigor, hiru kategoria hauetan sartzen den entitateren bat:
a) Egunkariek eta aldizkariek jarraian eta etengabe izen berberarekin argitaratzea, batetik, eta, bestetik, aleek numerazio jakin bati jarraitzea edo, argitalpenen kasuan, data jarrita izatea.
b) Euskarazko irrati-enpresek, urtean zehar, astean, gutxienez 25 orduz euskarazko saioak emititzea.
c) Euskarazko herri-telebistek, urtean zehar, astean, gutxienez 10 orduz euskarazko saioak emititzea.
Hala ere, jakin dugunez, datorren irailaren 17an, beste deialdi bat irtengo da EHAA aldizkari ofizialean, euskara eta informazioaren teknologia berriak sustatzeko, eta han ez bakarrik hedabideek, beste era bateko entitateek ere eskatu ahal izango dituzte diru-laguntzak, webguneetarako eta teknologiarekin zerikusia duten beste alor batzuetarako (softwarea, lokalizazioa, ondare digitalizazioa...).