Eusko Jaurlaritzak eta gizarte-eragileak Kulturaren Euskal Plana garatzen dihardute
Plana kulturaren inguruko analisiak eta adostasunak lantzeko prozesua da. Arlo horretan, eragile publiko eta pribatuek euskal gizartearen kultur premiei erantzun bateratua emateko aukera dute.
Premia eta erronkei erantzuna
Kulturaren Euskal Kontseilua 2000. urtean sortu zen. Gaur egun, gizarte-eragileekin batera, Kulturaren Euskal Plana bideratzen ari da. Horrela, euskal kultura osoarekiko ikuspegi estrategikoa, jarduera-irizpideak eta lehentasunak adosteko prozesua abian da. Euskal gizartearen kultur premia eta erronkei eraginkortasun handiagoarekin erantzuteko jarri zuten martxan plana.
Planak aukera ematen die eragile publiko zein pribatuei euskal gizartearen kulturaren inguruan iritzi bateratuak bilatzeko. Proposamenak egiteko eta adostasunak lortzeko lekua da, hain zuzen ere. Egileen esanetan, "adostasunerako eta hobekuntza etengaberako tresna da".
Jarraitu beharreko ildoak
Euskal Kultur Planaren oinarrizko zutabeak jasotzen dituen dokumentu markoak hainbat arlo lantzen ditu. Talde-lana bultzatzeko eta euskal gizartearen zerbitzura dagoen baliabide erabilgarria izan dadin hainbat puntu zehazten dira.
Alde batetik, Kontzeptuen arloa izenburupean, oinarrizko kontzeptuei buruz hizkuntza komun bat adostu nahi dute. Hiru atal bereizten dira, hausnarketa eta analisia eskaintzen dutenak:
- Kulturari buruzko ikuspegiak: kultura eta zibilizazioa, kulturari buruzko ikuspegi zabala eta kulturari buruzko ikuspegi berezia.
- Kultur sistema: Gizarteko sistema instituzionalizatuak, kultur sistema eta kulturaren balio-katea. Kultur sistemaren barruan hiru azpisistema bereizten ditu: kultur ondarea, arteak eta kultur industriak.
- Politika kulturala: Kultur politikaren ereduak, kultur politikaren balore eta printzipioak eta kultur eskubideak.
- Egungo testuingurua: Bizi dugun mundua.
Bestalde, Kulturaren euskal plana eraikiz txostenaren bigarren atala planaren misioa eta ikuspegia emanez hasten da. Jarraian, planaren ardatz estrategiko batzuk proposatzen dira:
- Kulturaren euskal sistema eraikitzea, lurralde arteko kultur sarean oinarriturik.
- Euskal kultur ondarea eta bere balio-katea bultzatzea.
- Ikusizko eta eszenako arteak eta horien balio-katea bultzatzea.
- Kultur industria eta bere balio-katea bultzatzea.
- Euskal Kulturan euskararen presentzia sustatzea.
- Kultura gizartea kohesionatzeko ardatz bezala garatzea Jakintzaren Gizartearen barruan.
- Euskal kulturaren sorkuntza, ekoizpena eta erabilera berritzeko, teknologia berriak eta adierazpen formak eskuratzeko eta erabilera egokitzeko erraztasunak ematea.
- Euskal kultura munduan zehar hedatzea.
Kulturaren hiru azpisitemak oinarritutako hainbat ponentzia landu dituzte Kulturaren Euskal Kontseiluak aukeratutako adituek. Orain, lan-taldeek adituek eginiko ponentzia horiek balioztatu, osatu eta hobetzeko eginkizuna dute.
Azkenik, uda honetan zehar, behin behineko dokumentua garatuko da, Euskal Herriko kultur eragileekin egindako lana aditzera emateko. Planean jasoko dira, kultur sektorearen egungo egoerari buruzko diagnostikoak eta ardatz estrategiko bakoitzari lotutako jarduera-ildoak eta proiektuak.
Erantzunak
Santurtziko Udal Euskaltegitik Cultura digital txostenaren inguruko ekarpen batzuk egin nahi ditugu geure lan-arloari begira, euskararen online ikaskuntzari alegia. Gizarte-eragile izan edo ez, ekarpenok txostenaren egileentzat interesgarriak izatea espero dugu.
Honako hau dakar txostenak erderazko bertsioan:
- 9.2 Posibilidad de estudiar Euskara
Debería implantarse un método apropiado para el aprendizaje de euskara de forma telemática. Tanto el sistema Hezinet como el del euskaltegi municipal de Santurtzi sirven para realizar ejercicios, pero ambos sistemas deberían integrarse dentro de un sistema más general y completo y dotarse de profesores que ofrezcan tutorías y una supervisión del proceso, todo ello para hacer posible el aprendizaje del euskara tanto desde la diáspora como desde el propio País Vasco.
Hona gure ekarpenak:
- Ez dakigu txosten hau noiz egina den, baina lau urte daramatzagu gel@irekia Autoikaskuntzarako Zerbitzuaren bitartez bai tutoretzak bai ariketak eskaintzen. Gaur egun ikasleak ariketak ez ezik komunikazio-tresnak ere baditu eskura (foroak, txat-gelak eta, jakina, e-posta) eta elkarreragina irakaslearekin zein berak bezala urrunetik ikasten duten beste ikasleekin gauzatzeko aukera du.
- Irakasleekiko elkarreragina izaten da, beraz, tutoretza-saio horietan, helburu nagusi bi lortzeko asmoz: ikasprozesuan gertatzen diren arazoei aurre egin eta ikaslearen ikasteko gaitasuna hobetu.
- Cultura digital du izenburu txostenak eta agian horregatik metodo eta sistema hitzak sinonimo moduan erabiltzen dira. Hala ere, ezeren ikaskuntzaz ari bagara, komeniko litzateke kontzeptuak zehaztea didaktikaren ikuspuntutik, bestela arrisku handia dago sistema informatikoari lehentasuna emateko, nahiz eta aspaldi zaharkituta gelditutako metodo didaktikoa erabiltzen duen.
- Txostenean hainbat erreferentzi ematen dira, eredugarri diren esperientziak-edo. Helduei begirako bigarren hizkuntzen ikaskuntza telematikoaren arloan guk pare bat proposatu nahi dugu duten kalitate kontzeptualagatik, hau da hizkuntzaren izaria eta ikaskuntzarena ulertzeko islatzen duten moduagatik:
- GLOTIS egitasmoa (Universitat Pompeu i Fabra. Koordinatzailea: Olga Esteve)
- “SMILE egitasmoa”:http://www.giapel.uji.es/proyectos.htm (Universitat Jaume I. Koordinatzailea: Mª Luisa Villanueva).
Azkenik eta laburbilduz, e-learning-a bi kontzeptuk osatutako hitza da: lehenak bitartekoa adierazten du eta bigarrenak helburua. Kalitatezko online ikaskuntza sustatu behar baldin badugu euskararen kasuan, kontzeptu bioi eragin beharko diegu, baina beti ere kontuan hartuta helburuak izan behar duela lehentasuna eta horretara makurtu beharko duela bitartekoak.
Besterik ez. Izan ongi.
Ezin nezakeen imajinatu Kulturaren Euskal Plana izenburu handiko ekimenaren abiapuntuan, dantzaren alorrean behintzat, horrelako txosten kaskar eta hutsala azaltzea. dantzan.com webgunean idatzi ditut txosten horrek eragin dizkidan zenbait burutazio
Dantzari buruzko txosten hori, planteamenduan partziala, dokumentatu gabeko diagnostikoan oinarritutakoa eta proposamenetan handizalea eta oinarri handirik gabekoa dela esaten dut bertan besteak beste.
Lantalde multzo bat dago Plan honetan, eta ni batean sartuta nago, Kultura Digitalarenean. Gaur izan naiz bilera batean Lakuan, atal honetan aurkeztu den txostena eta kontuak komentatzen eta eztabaidatzen.
Nork aukeratu ditu txostengileak kasu honetan? Zehatz ez dakit, baina zergatik aukeratu dituzten bai: merituengatik. Izan ere, Kultura Digitalaren txostenaren egileak dira Kepa Sarasola informatikaria eta Javier Echeverria filosofoa.
Gainerakoak nola aukeratu gaituzte? Nire kasuan badakit: Kepa Sarasolak entxufatu nau. Baina bueno, nik ez dut gizartea ordezkatzen: nire ikuspegiak botatzen ditut eskatzen didatenean, interes subjektiboek baldintzatuak seguru aski.
Plan honetan aholku edo lantalde jakin batean parte hartzen ari direnek, pasahitz bat jaso dute Planerako prestatu diren materialak eta txostenak Internetetik eskuratzeko, kulturareneuskalplana.net webgunetik hain zuzen.
Correo taldeak (lehen Grupo Correo Prensa Española, orain Vocento), berriz, txostenok (erdarazko bertsioak) libre jarri ditu Interneten, El Correo Digitaleko helbide honetan.