Teknofiloen albistegia
8

Sarean.com agertzeko garaia zen

Erabiltzailearen aurpegia
Jabi Zabala
2003-03-26 : 10:03

Euskaldunon EGUNKARIA 2003ko otsailaren 20an itxi zuen Goardia Zibilak, espainiar gobernuaren aginduz. Webgune honetan azken sei urteotan EGUNKARIAn Interneti buruz idatzi ditudan testuen gordailua aurkituko duzu.

Aspaldi pentsatutako eta erdi ahaztutako proiektua nuen eta bidegabekeria batek bultzatu nau gaiari serioski heltzera. Noiz edo noiz, urte hauetan Euskaldunon EGUNKARIAn sarearen inguruan idatzi ditudan testuak, sarean bertan argitaratzeko beharra ikusten nuen. Logikoa eta baliagarria izango zen hori egitea, baina denbora faltak ez zuen lan hau nire lehentasunen artean jarri. Orain, jaio da sarean.com.

Otsailaren 20an, ordea, epaile eta polizia batzuek burututako bidegabekeriak dena aldatu du. Hasteko, EGUNKARIAren 12 urteko ibilbidea moztu dute, indarrez, inolako arrazoirik gabe hainbat lankide kale gorrian utzita eta milaka euskalduni euren egunerokoa kenduta.

Sareari dagokionez, berriz, sei urteko ibilbidea moztu dute, hainbat euskal internauta euskarazko informaziorik gabe utziz. Euskaldunon EGUNKARIA Euskal Herrian argitaratzen diren kazeta guztien artean dekanoa zen Interneten gaineko informazioa eskaintzen. "Nabigatzen" orrialdea 1996ko urrian agertu zenetik (Luis Fernandezek sortua), nire azkeneko "Irristatzen" argitaratu zen 2003ko otsailaren 20a arte katea ez zen eten, guk ez genuen eten behintzat. Beste horiek eten dutela pentsatuko dute, baina EGUNERO faxismoaren garaipen hori kioskoetan gezurtatzen ari den bezala, webgune honen bidez, arlo jakin horretan ere ez gaituztela isildu erakusten saiatuko naiz.

Nire helburua, epe laburrean, neuk EGUNKARIAn argitaratutako "Nabigatzen", "Irristatzen", "UNInet" eta "Kulturnet" testu guztiak banaka argitaratzea da (milioi bat karakere baino gehiago sailkatu eta sartu beharko ditut), ahal dudan neurrian webguneari diseinu eta egitura egokia eman bitartean. Momentuz, 2002ko eta 2003ko testuak sartu ditut eta, sarean.com apurka-apurka betetzea espero dut. Bestelako helburuak gerorako utziko ditut, momentuz.

EGUNKARIA aurrera!

Jabi Zabala

Erantzunak

Gari Araolaza
2003-03-26 : 11:27

Zuri esker sortu da euskarazko lehen weblog pertsonala (izen hori onartzen baduzu...)


Jarraitzeko erreferentzia garrantzitsua, dudarik gabe.


Artikulu berriak idazten jarraituko duzu?


Gari


Jabi Zabala
2003-03-26 : 11:27

Interneti buruzko informazioak jorratzen lehenengo egunerokoa izan zen EGUNKARIA. 1996tik bere itxiearen eguneraino, hainbat atal finko eskaini zituen sarearen gaineko informazioak argitaratzeko.


Euskal sarearen ingurukoak azaltzen lehenengo orrialdea Nabigatzen izan zen. Luistxo Fernandez lankidearen eskutik agertu zen 1996ko urrian. Geroztik, 1997ko abenduan, horren ardura hartu nuen. Geroago, igandeetako KZ magazinetik azteazkenetako UNI gehigarrira igaro zen orrialdea, UNInet izena hartuta.


Era berean, osteguneroko Barkatu Ama gazte gehigarriak berrikuntza izan zuen 1998ko gabonetan, kolorea sartuz, orrialdeak gehituz eta sareari buruzko Irristatzen izeneko atala sortuz. Geroago, 1999ko urrian, larunbatetako Begia kultura gehigarrian ziberkulturari buruzko atala sortu zen, Kulturnet izenekoa. Azken hauek biak egiten jardun dut aurtengo otsailera arte.


Jabi Zabala
2003-03-26 : 12:26

Berez, weblog tresneria, itxura eta egiturarekin egin dut, ikusi duzun moduan, baina momentuz testuen gordailua egingo dut.



Aurrerago bai, gauza berriak idazten hasiko naiz, baina weblog pertsonaletan egiten den moduan, nahi dudan neurriarekin eta nahi dudan gaiaren inguruan, egunkari baterako idazteak eskatzen duen karaktere kopuruaren eta gaiaren zurruntasunik gabe... Beraz orduan onartuko dut "weblog pertsonala" izendapena.



Momentuz, 2002ko eta aurtengo testuak jarri ditut. Besteak, gehienak data zehatza jarri gabe dauzkat eta hemeroteka lan pixkat egin beharko dut ;-)

Luistxo
2003-03-26 : 12:41

Ados nago Garirekin bota duen definizio horrekin, lehen weblog pertsonala euskaraz. Jabik emandako berdefinizioan testu-gordailu soil gisa aurkezten badu ere, horixe da log bat, nabigazioko terminoa, bitakora, intzidentziak biltzen dituen testu multzo kronologikoa.


Erabili duzun Movable Type softwareak weblogak egiteko dauden famatuenen artean dago, eta aukera ona dirudi.


Diseinuaren aldetik ere, CSS2 estandar berrienarekin hain dotore egina ageri da (browser txukuna behar ikusteko, jakina), horregatik ere zoriondu behar zaitut. Kasu honetan, aizu, gutxigatik geratu zara pionero izatetik gertu. Uste dut duela pare bat aste ireki zen Aurrera.net izan dela CSS2-rekin egindako lehen webgune euskalduna.


Zorionak!


Luistxo
2003-03-26 : 12:46

>

> Euskal sarearen ingurukoak azaltzen lehenengo orrialdea Nabigatzen izan zen. Luistxo Fernandez lankidearen eskutik agertu zen 1996ko urrian. Geroztik, 1997ko abenduan, horren ardura hartu nuen.



Ez dizut agintzen egingo dudanik, baina saiatuko naiz artikulu prehistoriko haiek aurkitzen-edo. Beharbada bidaliko dizkizut, gordailu honetan sar ditzazun.



Irristatzen eta KulturNet oso gustura irakurtzen nituen... Lan handia egin duzu azken urteotan. Animo gizona!

Igor Leturia
2003-03-27 : 08:38

Nik ere betidanik irakurri izan ditut Nabigatzen, Irristatzen eta Uninet atalak, eta oso gustukoak izan ditut. Aspaldi botatzen nuen faltan horiek guztiak batera sarean egotea, eta hara! Esperantza gutxien nuenean, Egnkaria itxi dutenean, horra hor bere ondarea inoiz baino biziago! Zorionak Jabi!


Ez duzu Unimatika atala aipatzen, hori ere egongo al da edo beste norbaitek idazten du?


Jabi
2003-03-27 : 13:36



> Ez duzu Unimatika atala aipatzen, hori ere egongo al da edo beste norbaitek idazten du?



Unimatika atala informatikari buruzkoa zen eta nik ez dut inoiz informatikari buruz idatzi, ez baita nire gaia eta ideia handirik ez baitaukat. Laurentzi Garmendiak egiten zuen hasieran eta azken aldian Xabat Zabalak.



Nik UNInet egiteari utziz geroztik Plazaguneak egiten zituen orrialde horretako testuak. Andoni Sagarna zen gehienetan horiek sinatzen zituena.

gotzon uribe
2003-03-29 : 17:21

Egunotan izan dut sarean.com-en berri. Hainbat lekutan nabigatzen ibili ondoren sekulako ideia iruditu zait weblog honen bidez euskarazko testuak lasai asko internet-en aurkitzeko, irakurtzeko eta ikasteko aukera izatea. Merkatu anglosajoiak dominaturiko esparru "komertzial" honetan eskertzekoa da honelako ekimen sendo eta interesgarriak ateratzea. Lehenagotik jarraitzen nuen zuk egindako lana, eta aportazio interesgarria iruditu izan zait beti, bai euskal mundurako eta internet-en inguruan mugitzen garen euskaldun guztiontzako ere.



Espero dut apurka apurka sarean.com hau hazten joatea eta denborarekin gai, iritzi, esparru eta aukera ugarirekin, gutariko askoren bilgune, zentru izatea. Jakinmina hasetzeko tokia. Sarea unibertso amaigabe baten gisakoa bait da.



Zorionak bada, eta segi aurrera!



Gotzon

Erantzun

Twitter ikonoa  Facebook ikonoa  Sartu