Egunkariaren aldeko orria alemanez
Euskaldunon Egunkariaren aldeko ekimen zibernetikoa osatzeko bidean, beste hizkuntza bat erantsi diogu Egunkariaren itxiera salatzeko Igorrek-eta prestatutako orriari: alemanezko bertsioa
Azken ordua: Sindikatuen ekimena: paroa.
Itzulpena Kleanthes Grohmann hizkuntzalari alemana eta Carsten Agger daniarra hasi dira prestatzen. Hainbat testu itzuli dituzte, baina laguntza beharko lukete, lagun birentzako lan handiegia baita. Oraindik itzuli barik dauden testuak ingelesez utzi dituzte, bitartean ahalik eta zabalkunderik handiena ziurtatzeko. Orri honetan ikus dezakezue orain arte egindakoa
Eginda dagoenean Kontseiluak bere babespean hartutako orrian alemanerako link bat azalduko da.
Beraz, lagun alemandunok, anima zaitezte Grohmann eta Carsten-i itzulpen eta eguneratze lanetan kabletxo bat botatzeko. Prest zaudetenok idatzi mezu bat egunkariabai@yahoogroups.com-era gaiaren lerroan "alemanerazko itzulpena" idatzita.
Egunkaria aurrera!
Erantzunak
Rafa Diez, LAB
Eskubide guztiak errespetatuak izango diren jokaleku berri bat eskatuko dugu egun horretan. Horrez gain, Egunkariaren proiektua konpontzeko eta sendotzeko konpromisoa hartu dugu, eta langileriari gauza bera eskatuko diogu
Jose Elorrieta, ELA
Mobilizazio demokratikoekin herriak lortuko du Egunkaria berriro kalean izatea. Egunkari berria lehengoa baino indartsuagoa izatea lortu behar dugu. Egunkariak orain arte lan asko egin du, eta hemendik aurrera bere oinarria indartuta geratuko dela nabarituko dugu.
Demokratikoa ez den estatu baten jokaera izan da. Ziurrenik estatu demokratiko batek ez du inoiz hain zikin jokatu. Euskal Herriko gizartea konturatu da horretaz, eta horren kontrako jarrera erakutsi zuen Donostiako manifestazioan
Hamahiru urteko lana apurtzeko, botere judiziala politikoaren menpe jarri du lehenengo. Gero, atxiloketak eta torturak izan dira. Eta amaitzeko, adierazpen askatasunaren aurka egunkari bat itxi du.
Adierazpen gehiago, Egunero tik hartuak:
Jose Elorrieta (ELA)
"Egunkaria berri indartsuago bat sortzea posible dela erakutsi gura dugu"
"Hemen geure buruari egin behar diogun galdera da ea Espainiako Estatua noraino dagoen prest gure herria eta gure kultura desorekatzeko. Baina, bestalde, ikusi dugu gizartea asko mugitu dela eta mugitzen ari dela Egunkariaren kontrako erasoari erantzuteko. Hau da, beste fase bat posible dela konturatu gara. Kasu honetan, Egunkaria berri indartsuago bat sortu daiteke. Martxoaren 13ko ekimena ere horri begira egiten dugu. Egunkariaren errealitatea eta proiektua bera indartu gura ditugu ekimenarekin, eta langileok eta sindikatuok ere fase horretan parte hartu gura dugu".
Belen Arroyo (EILAS)
"Itxiera dela-eta gertatutako guztiari erantzun bateratua eman behar genion"
"Euskaldunon Egunkaria itxi zuten egunetik, langileek deitzen zituzten mobilizazioetan parte hartzen izan gara. Baita Kontseiluak antolatutako bilera eta ekimenetan ere. Hala ere, ikusten genuen beharrezkoa zela zerbait gehiago egitea, eta, gainera, era bateratuan egitea. Horregatik, egoera larria dela ikusita, pentsatzen dugu erantzun bat eman behar dela, gertatutako guztia salatzeko eta Egunkaria berriro kalean izateko. Bestalde, uste dugu oso positiboa dela sindikatu guztiok batera deitzea ekimenera, eta horregatik oso balorazio positiboa egiten dugu".
Rafa Diez (LAB)
"Erasoari aurre egiteaz gain, gure etorkizuna eraiki behar dugula erakutsi nahi dugu"
"Aurkeztu dugun ekimenarekin Donostian hainbat euskal herritarrek erakutsitako indarra eta asmoa bideratu nahi ditugu. Kontseiluak eta Egunkariako langileek egindako planteamenduari erantzuteko modu bat ere bada. Ordu bateko lanuztearekin gauza bi nabarmendu nahi ditugu. Batetik, Egunkariaren itxieraren inguruan gertatutako guztiak salatu nahi ditugu. Bestetik, martxoaren 13aren zentzu positiboa ere azpimarratu dugu. Hau da, erasoari aurre egiteaz gain, gure etorkizuna eraiki behar dugu, eta dinamika horretan urratsak eman behar ditugu".
Esteban Muruamendiaraz (HIRU)
"Gure aurka egindako erasoa dela uste duguª
´Ikusten dugu eraso gogorra izan dela Egunkariaren aurka, baina baita euskararen eta Euskal Herriaren aurka ere. Euskal Herria hitza erabiltzen dugun guztiok gure aurkako eraso gisa hartu dugu Egunkariaren kontrakoa. Egoera konpontzeko dagoen bide bakarra erantzun bateratua da, eta sindikatuok martxoaren 13ko ekimena sortu dugu. HIRUri dagokionez, eta gure lantokia oso zabala denez, modu berezi batean antolatuko dugu ekintza. Kamioiak ez dira dauden tokian beste barik geratuko. Herriak ikusteko moduko zerbait egitea pentsatzen ari garaª.
Angel Abalde (ESK)
"Egunkariaren itxierarekin kaleko giroa gaiztotzea lortu gura du Espainiako Estatuak"
"Euskarari egindako erasoaz gainera, kaleko giroa gaiztotzeko estrategia baten barruan kokatzen dut Egunkaria ixteko agindua. Espainiako Estatuaren eta Euskal Herriaren arteko gatazka bilatzen ari direla uste dut, maila politiko, sozial eta sindikalean ezelango akordiorik egon ez dadin. Bestetik, martxoaren 13ko ekintzarekin lortu duguna da sindikatuok bat egitea gure herriko elementu garrantzitsu baten alde, euskararen alde. Guk egindako deialdiari langileek ondo erantzungo dietela uste dugu, nahiz eta jakin ez dela erraza izango, gure herrian dagoen bereizketa politikoagatik".
Patxiku Irisarri (EHNE)
"Gizarteak hartu zuen erasoari aurre egiteko erantzukizuna, eta guk lekuko hori hartu dugu"
"Hau ez da eraso puntual bat izan. 2000. urtetik gaur arte, etengabekoak izan dira euskararen kontra egindako erasoak, eta Egunkariaren itxiera hor kokatzen dugu. Euskararen kontra egindako eraso garbia izan dela uste dugu, eta baita adierazpen askatasuna kolpatua izan dela. Bestalde, gizarteak berak hartu du erasoari aurre egiteko erantzukizuna. Donostiako manifestazioan erakutsi zuen hori. Sindikatuok ikusten genuen horri jarraipen bat eman behar geniola, eta guk gizarte sektore batekin harreman zuzena genuela ikusita, gizarteak utzitako lekukoa hartu dugu".
> Herriari? Zeini? Dugunari edo nahi genukeenari?
Dugunari? zein da duguna? Nik amesten dudana bakarrik dakit zein den, baina ez pentsa, hori ere...
Aurrekoan uste nuen 7 probintziaduna zela. Orain seikoa dela esaten didate.
Esaten didate Udalbiltza A dela bat eta Udalbiltza B bestea, beraz, ez dakit ez nire herrian ez nire ametsetako herrian A-k edo B-k agintzen duen ere.
Ezin uka herrimina dudala, hala ere. Edo herri mina ote da ba?
Eta aberria, zer da aberria?
Gure izatea galdera konstantea izango ote da?
STEE-EILAS, EHNE, ELB, HIRU, EGAS, ELA, LAB eta ESK sindikatuek egin dute deialdia. Ordubeteko geldialdia egitea proposatu dute martxoaren 13rako. 11:30etik 12:30era izango litzateke paro hori. Bakoitza bere lanlekuaren aurrean.
Hiru gauzari esan diote baietz:
Zortzi talde sindikal hauek, bestalde, Bilbon egingo dute ekitaldi nagusia, arratsaldeko 19:30ean. La Casillan izango da eta han erakutsiko dute Egunkariarekiko elkartasuna.
Hauxe agiria:
Bai euskarari eta bai EGUNKARIAri
Martxoaren 13ko elkartasun egunarekin bat egin eta ordubeteko lanuztera deitu duten zortzi sindikatuek -ELA, LAB, ESK, EILAS, EHNE, ELB, HIRU eta EGAS-agiri bat plazaratu zuten atzo, Egunkariaren itxiera salatu eta euskararen nahiz adierazpen askatasunaren aurkako erasoak salatzeko.
Martxoaren 13an bai euskarari, adierazpen askatasunari, herriari, Euskaldunon Egunkariari.
BAI euskarari. Euskara herri honen hizkuntza, gure hizkuntza dugu. Hizkuntza oro legez, altxor bat da, baina munduan diren milaka hizkuntzaren artean euskara da gure ahots berezia. Euskarak, anitza izanik, bat egiten gaitu.
Euskara zaindu eta babestea dagokigu, gure arbasoengandik jaso dugun ondarea aberastu eta indarberrituta ondorengoei utzi nahi diegulako.
BAI normalizazioari. Euskara nonahi erabili eta entzutea nahi dugu, baita hedabideetan, hezkuntza sistema osoan, teknologia berrietan, lan munduanÖ Nahi izanez gero, gure hizkuntza gaurko gizarterako tresna egokia izango da.
Euskararen normalizazio betea, hots, eguneroko bizimoduan eta oztoporik gabe garatzea, bizikidetzaren normalizaziorako bidean ere lagungarria izango da.
BAI euskarazko hedabideei. Euskal Herria txikia da, eta herri txikiek zailtasunak izan ohi dituzte alor askotan, are gehiago egungo globalizazio oldarkorrean. Hedabideak gero eta esku gutxiagotan jausi ahala, gero eta uniformeago bilakatu ahala, hurrengo prentsak, euskaraz adierazten den prentsak herri honi nor izaten jarraitzen laguntzen dio.
Euskarazko hedabideak bultzatzeko eta erabiltzeko borondatea eta konpromisoa adierazi nahi dugu. Gure esku dagoena egingo dugu honelako proiektuak gauza daitezen.
BAI Egunkariari. Egunkaria ezean, ahots baten faltan gaude, hitz idatzia kentzen zaigu. Herri honek kalean eta kioskoetan agertu du euskarazko egunkari bat babesteko konpromisoa; guztiok -erakunde, alderdi politiko, eragile sozial ala herritar-geure egin dezagun.
BAI adierazpen askatasunari, informazio eskubideari eta aniztasunari. Guztiok dugu egiazko informazioa eta askatasunez adierazitako iritzia emateko eta jasotzeko eskubidea. Baita norberak informazio-iturria hautatzeko eskubidea ere..
Halaber, kazetari eta hedabide guztiei zor zaie itxiera, jazarpen eta beste inolako mehatxurik jaso gabe beren lana egin eta informazioa hedatzeko aukera.
BAI Egunkariako langileei. Egunkariako langileen enplegua eta etorkizun profesionala bermatu beharra dago. Ezin da alferrik galdu hamahiru urteko ibilbidean lan itzelez jasotako proiektua eta euskararen hedapen eta normalizazioaren aldeko lan eskerga.
BAI atxilotuen askatasunari. Gure kulturgintzako hainbat pertsona eredugarri bezain beharrezkoak zakarki atxilotu dituzte eta, tratu txarrak eta torturak jasan ondoren, gehienak espetxeratuak izan dira. Orain arte lan handia egin badute, aurrerantzean ere horretan jarraitzea nahi dugu. Etxean behar ditugu.