Teknologia albisteak

Euskarazko masterrak bideragarriak dira

K. Sarasola - UEU

2002-09-17 : 11:09

Lehengo urtean lehenengo aldiz azaldu ziren euskarazko graduondoko tituluak. Unibertsitateko curriculum ofizialetan betetzen ez diren beharrak betetzeko sortu ziren. Balantzea oso positiboa izan denez, aurtengo eskaintza zabalagoa da. ERNE! Hau da matrikulatzeko garaia!. Ez galdu aukera hori aste honetan!

Udako Euskal Unibertsitateak Hizkuntza-Teknologiak tituluko promozio OSOA laster izango da lanean. Hogei ikasle ibili dira ikasturtean zehar jo eta ke 300 orduko ikastaroan. Bukaerako proiektuari azken ukituak ematen dioten bitartean, ikasle horiek badakite urrirako denak lanean izango direla.

Hogei ikasle horietatik hamaika lehenago ere profesionalak ziren, hau da, titulu honetan matrikulatu zirenean lanean ziharduten (Itzultzaileak, euskara-zerbitzuetako langileak, euskaltegietako irakasleak, Emun, Elhuyar eta Plazaguneko langileak). Horiek lanpostu berean jarraituko dute, oraingoan hizkuntza idatzia zein hizketa lantzeko tresna berriak erabiliz (testu handiak antolatzeko moduak, testu horien artean hitzak edo dokumentuak bilatzeko tresnak, idazteko laguntzak, itzulpenerako laguntzak ...).
Gainontzeko bederatzi ikasleak lanik gabe zebiltzan orain dela urtebete. Gehienak lizentziatura bukatu berriak zuten eta orain, urrian, denak izango dira lanean eta bi ezik beste guztiak Hizkuntza-Teknologien inguruan. Bi Eleka enpresa berriko sortzaileen artean daude, besteak Elhuyar-en, Ixa eta Aholab ikertaldeetan.

Ikastaroaren balantzea oso positiboa izan denez ikasturte berrirako UEUren eskaintza zabalagoa aurkeztu dugu:

HIZKUNTZA-TEKNOLOGIAK espezialista (300 ordu)
HIZKUNTZA-TEKNOLOGIAK masterra (500 ordu)
HERRI ERAKUNDEEN KUDEAKETA espezialista titulu berria.
EUSKAL HERRIA XXI doktorego-programa

UEUko eskaintzaz gain beste hauek ere euskaraz zabalduko dira:

Euskaldun Egunkaria eta ILCLI institutuak HIZKUNTZA, INFORMAZIOA ETA KOMUNIKAZIOA masterra bigarren aldiz zabaldu da.
INFORMAZIORAKO ETA TEKNOLOGIARAKO TEKNOLOGIAN FORMAZIOAN Mondragon Unibertsitateko master on-line berria (620 ordu)

Erantzunak

miren gabantxo

2002-09-17 : 14:05

Mondragon Unibertsitateak, gainera, internetez, hau da, etxetik fisikoki mugitu gabe ikasteko aukera ematen du. Begira

INTERNETI ESKER, MONDRAGON UNIBERTSITATEKO INFORMAZIORAKO ETA KOMUNIKAZIORAKO MASTERRAK PRESTAKUNTZA ERRAZTEN DU

Gero eta ordenadore, multimedia gauza eta ikus-entzunezko berriagoak ateratzen dira merkatuan. Horiek ezagutzeko esfortzua egin behar duenak, errazago du orain Mondragon Unibertsitateko Humanitateen eta Hezkuntza Zientzien Fakultateko Master bati esker.

Internet bidez, ikasleak nahi duenean irakurtzen ditu gela birtualean zintzilik dauden ikasgaiak. Gainera edozein momentutan ikaslea jarri daiteke harremanetan puntako irakasleekin eta adituekin.

Hezkuntza prozesuan, irakasteko metodoetan eta eskolaren antolakuntzan teknologia berriek duten eraginaz konturatu eta bi urteko apustuaren ondoren arrakasta lortu du Humanitateen eta Hezkuntza Zientzien Fakultateak.

Informaziorako eta Komunikaziorako Teknologiak Formazioan Masterrak erosotasuna eta malgutasuna eskaintzen du.

Gaztea zein heldua, ikasteko orduan, arin konturatzen da ez duela minutu bat ere galtzen Unibertsitateko egoitzara joan beharragatik.

Etxean bertan gelditu daiteke ikaslea eta gainera, inolako aginterik gabe, egunez edo gauez, nahi duenean hartu ikasteko denbora. Lanean zein kontratuaren zain egon, Masterra jarraitzeko arazorik ez dago, malgutasuna baita nagusi.

Gradu-ondoko programa hau euskaraz eta gazteleraz eskaintzen du Unibertsitateak eta Hezkuntza Erakundeekin edo beste erakunde batzuekin harremanetan dauden profesionalentzat egina dago. Lizentziatu berriek, Lanbide Heziketako, Lehen eta Bigarren Hezkuntzako irakasleek, Pedagogoek, eta erakunde publikoetako eta pribatuetako begiraleek eman dute izena Informaziorako eta Komunikaziorako Teknologiak Formazioan Master honetarako.

Aurtengo Irailean bertan jasoko dute Mondragon Unibertsitateko Berezko Titulua Master hau ikasi duten berrogei lagunek.

Enpresa munduak eta gizarteak, gaur egun, internet, informatika eta ikus-entzunezko teknologia menperatzeko eskatzen dutenari erantzuteko prest daude.

Informazioa nahi izanez gero idatzi edo deitu hona 902 10 15 13