Zumaian berriz ere BALEIKE
Martxoan, 100. zenbaki biribila ateratzearekin batera, agur esatea erabaki genuen, baina "laster arte" izango zen itxaropenez. Orain, lau hilabete geroago, hemen gara berriz ere; kalean da Baleike herri-aldizkariaren 101. zenbakia. Beste aldi bati ekin diogu. Herrian eginkizun garrantzitsua betetzen duela iruditzen zaigulako. Zumaiarrek zumaiarrentzat egina. Ez ahal du beste etenik ezagutuko!
Euskarazko prentsaren inguruko berri denak ez dira txarrak, zorionez. Izan ere, BALEIKE, Zumaiako aldizkaria, berriz ere abian jartzea lortu dugu eta hainbat berritasunekin dator, gainera: doan banatuko da (harpidedun eta bazkideen artean), hilean behin aterako da aurrerantzean eta formatu txikiagoa izango du. Zenbaki berezi hau, duela 8 urte lehen zenbakiarekin egin genuen bezalaxe, herriko postontzi guztietan banatu da (3.500 ale).
Azken 4 hilabeteei begiratuta, hogei lagun inguru elkartu ginen martxoaren 23an egindako bileran. Aldizkariaren izaera eta bilakaerari buruz hausnarketa egin genuen eta baita zenbait ondorio atera ere:
- Hamabostekaria izateak ez zuen aurrerapausorik ekarri.
- Herrian ahalik eta gehien zabaltzea komeniko litzateke.
- Kultur elkarte sendo bat bultzatzea oso garrantzitsua da.
Gainera, aldizkaria berriz ere lehenbailehen martxan jartzeko ahalegina egin beharra zegoela ikusi genuen, horretarako prest zegoen jendea elkartzen bazen, behintzat. Izan ere, zenbat eta eten handiagoa izan gero eta zailago izango litzateke lehengo baldintzak eta laguntzak izatea.
Lehen bilera mamitsu haren ondoren, beste bileratxo batzuk etorri ziren, eta bi lan-taldetan banantzea erabaki genuen, lana hobeto egin ahal izateko. Batek, aldizkaria martxan jarri ahal izateko proiektu berria landu du, urte bukaera bitartean 6 aldizkari ateratzea ahalbidetuko diguna: bideragarritasuna aztertu, itxura eta edukiak zehaztu, jendea lotu... Beste lan-taldea kultur elkartearen ideia lantzen ari da: zer egingo beharko duen, nola funtzionatu...
Baleike kultur elkartea ere mamitzen ari da
Lehendik ere juridikoki eratuta zegoen Baleike kultur elkartea, baina orain artean ez zuen elkarte bezala funtzionatzen. Orain erronka horixe da: "benetako" mugimendua eta dinamika sortzea elkartearen inguruan. Lehen egitekoa herriko kultura eta taldeak aztertzea izan da, hutsuneak eta gabeziak non dauden antzemateko. Lehendik dauden taldeei lagundu eta kultur eskaintza zabal eta duin bat osatzen laguntzea da Baleike kultur elkartearen helburu nagusia.
Datozen hilabeteetan aldizkaria indartu eta kultur elkartea bera ere sendotzea espero dugu. Guztion artean baleike!
Erantzunak
Oso ttukuna iruditu zait aldizkaria. Gustatzen zait herriko jendeak ateratzea aurrera bere neurriko lana.
formatoa gustatu zait asko. Gainontzeko herri aldizkarien tankera hautsi du... lan taldeak ere sendoa dela dirudi. Ia egia bihurtu den proiektu honek jarraipenik duen urte askoan eta etenik barik. Zumaiak badu herri aldizkaria eta hori zoriontzekoa da.
Zorionak Baleikero guztioi!!!!!
Berri hau dela eta, jakin nahi nuke zergatik aldizkari hau, eta Euskal Herrian argitaratzen diren beste hainbat, ez diren interneten bitartez zabaltzen. Jakinik sarean argitaratzea ez dela ez garestia ez eta zaila, ondo legoke herri txikitako berriak lau haizetara zabaltzea.
Baleikekoei dagokigunez, behintzat, badugu zerbait egiteko asmoa. Aspalditik datorren kontua da, baina zerbait txukuna atera ahal izateko aurrez proiektu bat lantzea komeni da eta gero, ahal baldin bada, finantzaketa bermatzen saiatzea. Zorionez, gainera, gero eta eredu gehiago dugu eta txukun askoak, gainera.
Geure aldetik, eta behin aldizkaria berriz ere abian jarri eta gero, 2003ean geure webgunea izan nahi genuke eta bertan aldizkarian azaltzen direnak baino gauza askoz ere gehiago eskaini.
Bestalde, jakin badakit Topagunea ere lanean ari dela herri-aldizkari guztien artean zerbait bateratua aurkezteko.
Lasai egon, beraz, iritsiko da denak sarean egongo garen eguna eta.
Atsegin handiyakin irakurri izan det Baleike eta iruitze zat ondo indako aldizkariya zala. Asko pozte naix berriz e kalian dala jakittian. Eutsi goyai eta aurrea.
Samartolometako hurrengo alia.