Bat egingo dute Internetek, ordenagailuak eta telebistak?
Eztabaida gogorra harrotzen ari da bazterretan. Batzuek diote teknologia berriek bat egingo dutela eta, horri esker, gero eta zerbitzu gehiago jasoko ditugula aparailu miresgarri bakar batetik. Beste batzuek, berriz, ezetz, teknologiak ez direla bateratzen, baizik eta aldetzen.
Telebista sortu zenean, berehala hasi zen jendea pentsatzen nola batera zitekeen hedabide berria aldizkariekin eta egunkariekin. Aurrerantzean aldizkariak ez genituen jasoko postontzian edo erosiko kioskoan: telebistaren pantailan jaso eta etxeko egongelan inprimatuko genituen. Berrogeita piku urte igaro dira, baina horrelakorik ez oraindik.
Orain urte gutxi, beste ahalegin bat egin zen ordenagailua eta telebista elkartzeko.Apple eta Gateway enpresek telebista ikusteko ordenagailuak atera zituzen, baina arrakastarik ez.
Gaur egun, berriz, Bil Gates bera bihurtu da apostolu nagusi teknologiak bateratzeko kontu honetan. Nahi baduzu Internet kontsultatu telebista ikusten duzun bitartean, Microsoftek eskaintzen dizu WebTV. Gatesek eraldatu nahi du merkatua eta horretarako buru-belarri ari da kaxa bat sortzen, bateratuko dituena Internet, ordenagailua eta telebista. Berak jarriko lituzke kaxak eta edukiak, diru trukean, jakina.
Gates ez dabil bakarrik. Enpresa asko eta asko ari dira diru mordoa xahutzen, helburu horretan. Handspring enpresak, adibidez, Treo sortu du, eskuko ordenagailu bat, telefono ere badena. Eta, zenbait adituren ustez, era honetako produkturik onena.
Teknologiak aldendu egiten dira
Baina izango dute arrakastarik ahalegin hauek? Al eta Laura Ries adituek diote ezetz. Hauen ustez, teknologiak aldendu egiten dira, ez bateratu. Hona adibide zenbait:
- Irratia. Irratia ez zen bateratu beste hedabide batzuekin. Banatu egin zen: mahai gaineko irratiak, eramatekoak, auto-irratiak, entzungailu-irratiak, irrati-iratzargailuak, kable bidezko irratiak, satelite bidezkoak, etab.
- Telebista. Hau ere banatu egin zen, hainbat motatan: telebista kateak, kable bidezko telebista, satelite bidezkoa, doanekoa, ordainduzkoa, pay per view erakoa
- Telefonoa. Hemen ere telefono mota asko sortu da: arruntak, haririk gabeak, autoetan jartzekoak, sakelakoak, satelite bidezkoak
- Ordenagailua. Hau ere banatu egin da, hainbat motatan: mainframe, etxekoak, eramatekoak, eskukoak
Egile hauen ustez, gauza bat da zerbait egin ahal izatea eta beste bat, guztiz bestelakoa, praktikoa izatea. Ordenagailu-telebista egin ahal da, hobeto esanda, eginda dago, baina jendeak ez du erosten. Merkatuan ere badira garbigailu-lehorgailuak, arropa garbitu eta sikatzen dutenak, baina gutxi saltzen dira.
Izadiak ere badirudi arrazoia ematen diela Ries aita-alabei. Munduan ehunka katu mota ditugu (arruntak, pertsiarrak, Angorakoak, basakatuak ), baita txakurrak (galgoa, bulldozerra, txiuaua ) edo txoriak ere (horma-txoriak, txantxangorriak, enarak ), baina ez dugu katu-txakurrik edo oilo-ahatarik edo zaldi-behirik.
Eta zuk zer uste duzu, teknologiek bat egiten dutela ala aldentu egiten direla eta espezializatu?
Erantzunak
Tech Foundries konpainiako (Eudald Domènech-ek sortutakoa) InOut TV enpresak, bere Home Media Centre (HMC) produktua merkaturatzeko asmoa agertu du urte honetan bertan.
Begiratu produktuaren ezaugarriak eta, nor ausartzen da asmatu duten edo ez esatera?
Badirudi, eurak behintzat, nahikoa apustu serioa egitekotan direla: 42 milioi eurotako inbertsioa aurreikusi dute Espainiarako, eta beste 250 milioitakoa Europa osora zabaltzeko.
Eusko Jaurlaritzaren Konekta Zaitez programako hurrengo fasea WebTV edo halako aparailuren bati begira pentsatua dago, nonbait.
Duela hamar bat egun azaldu ziren erreferentziak prentsan. Nik kopiatu nituen ohar batzuk:
(...) El presupuesto de esta
nueva etapa asciende a 4.200.000 euros, cantidad destinada por el Gobierno
vasco para ayudas a la adquisición de 35.000 nuevos equipos. Esta cifra se
sumaría a los 170.000 ordenadores que está previsto subvencionar durante la
primera fase.
La fecha para adquirir ordenadores con una ayuda de 270 euros (45.000 pesetas)
finaliza el 31 de julio. Unos días antes, la Sociedad de Promoción y Reconversión
Industrial (SPRI) publicará en el Boletín Oficial del País Vasco las prestaciones
que deben reunir los dispositivos de acceso a Internet susceptibles de
incorporarse a la segunda etapa de Konekta Zaitez .
(...) explicó que se
trata de facilitar la compra de aparatos de bajo precio (en torno a 270
euros, que con la subvención quedarán en 150) y sencillo manejo, a
través del televisor o el teléfono, a los colectivos con más problemas para
incorporarse al uso de las nuevas tecnologías.
(...)
Ez dakit bat egiterik egongo den, eta berri honetan ematen diren adibideek ezetzera bideratzen gaituzte, dena den, gaur egun posible da ordenagailua eta telebista lotzea. Agian hortik joango da etorkizuna, garbigailua eta lehorgailua lotzetik, bakoitza bere funtzioarekin, baina lotuta.
Adibide batekin azalduta: Nire ordenagailuan DVDak ikusi daitezke, baina DVD horiek ordenagailuko aulkian eta pantaila txikian ikustea ez da oso erakargarria, nahiz eta pantailak definizio ona ematen duen. Beraz, nire ordenagailua telebistarekin lotuz gero kate bat osatuko genuke eta familia guztiak ikusiko luke DVDan grabatutako film hori. Nire ordenagailuan filmak ia-ia doan izateko posibilitatea dut, eta ondo legoke hori telebistan ikustea, sofa eder batean jarrita.
Baliteke aparailu batek ez balio izatea pentsatutako guztia egiteko eta horren adibide da, esaterako, Fagorrek asmatu duen hozkailua internetarekin. Nahiko absurdoa nire ustez. Nor ibiliko da hozkailu batean Sustatu irakurtzen? absurdoa benetan!
Dena den imagina dezakezue telebistako programa bat ordenagailuko DVD batean grabatzea, edo musika ekipoan duzun binilo zahar bat CD batera pasatzea? hori gaur egun posible da eta etorkizuna aparatuak kateatzetik datorrela begitantzen zait. Gainera, grabatutako hori zure lagun bati bidaltzeko modua ere badago, eta zer esanik ez banda zabaleko kablea sartuta dagoen lekuetan.