Zer izen jarriko diot nire webguneari?
Beharbada webgune bat prestatzen ari zara zure negozioa sarean jartzeko. Izen bat jarri beharko diozu, baina zein? Guk lagunduko dizugu izen egokia aurkitzen. Izan ere, Internetek bere legeak ditu kontu horietarako.
Txakur bat erosten duzunean, lehendabizi izena jarriko diozu. Izan ere, izana duen orok izena merezi du. Aldiz, ez zara lehenengoa txakur bat izendatzen duena eta, hasten bazara honi eta hari galdetzen, konturatuko zara zenbait jendek nahiko landuta duela kontu hori, urteak daramatzate-eta txakurrak hazten. Interneten ere antzera gertatzen da; fenomeno berria izanik ere, poliki-poliki ari gara apur bat ikasten.
Ondoren jarriko ditugun iritziak ez dira geureak, Al eta Laura Ries aditu amerikarrenak baizik. Eta agertzen dira beraien liburuan: 11 Lege Aldaezinak Marka Bat Eraikitzeko Interneten. Ingelesez edo gaztelaniaz irakurri ahal duzue, azken hau Ediciones Deuston.
Ez errepikatu betiko izena
Dagoeneko negozio bat badaukazu, izen bat duena, ez erabili izen hori Interneten. Izan ere, sarea beste zerbait da. Time.com aldizkari digitala ez da lider sarean, ez eta bn.com liburu denda edo Sothebys.com enkante etxea, nahiz eta hirurak nagusi diren saretik kanpo.
Izen generikorik, ez
Interneten sartzeko, izen bat idatzi behar duzu zure teklatuan. Eta izen horrek ez du ez logorik, ez kolorerik, ez letratipo berezirik. Izen bat da, besterik gabe. Internetek biluztu egiten du izena eta kendu egiten dizkio elementu bisualak.
Hori ulertu eta gero, komeni zaigu ikustea nolakoak diren munduan diren markarik ospetsuenak: Coca-Cola, Microsoft, Ford, Disney, Intel, Nokia, Fuji, Nescafé denak dira izen bereziak, hor ez dago izen arruntik edo generikorik. Interneten berdin gertatzen da: Interneteko zerbitzu hornitzailerik handiena ez da Internetekozerbitzuak.com, baizik eta AOL; bilatzailerik bisitatuena ez da bilatzailea.com, baizik eta Yahoo!; liburu dendarik handiena ez da liburuak.com, baizik eta Amazon.com; eta enplegu bilatzailerik bisitatuena ez da enplegua.com, Monster.com baizik.
Gizakiok beti erabili izan dugu izen arrunta edo generikoa izendatzeko kategoria bat, ez produktu edo zerbitzu jakin bat. Beraz, ahaztu izen generikoa jartzea zure webguneari. Horixe diote Al eta Laura Ries-ek.
Baina zer izen, orduan?
Sinestu edo ez, sortuko duzun markaren izena izango da zure ondasunik handiena Interneten. Horregatik, komeni zaizu ondo aukeratzea. Lehenik eta behin, galdetu zeure buruari zein den zure negozioa definitzen duen izen generikoa (liburuak, diskoak, informazioa, ardoak, etab.). Hori jakinda, badakizu zer izen ez diozun jarri behar zure webguneari. Bada zerbait.
Arrakasta izan dutenek egin duten bezala, zuk ere aukeratu izen berezi bat. Eta hau aukeratzerakoan, kontuan izan estrategia hauek:
- Izena izan behar da laburra. Laburra eta ona, bi bider ona. Ahaztu horrelakoak: zureliburuak.com, etxerikederrenak.com, oparizoragarriak.com, etorkizunekounibertsitatea.edu, eta abar.
- Izena izan behar da sinplea. Izen sinple batek abezedarioaren letra gutxi erabiltzen ditu, nahiz eta errepika daitezkeen hainbat konbinaziotan. Astore izen laburra da, baina ez sinplea: sei letra erabiltzen ditu. Coca-Cola, berriz, laburra eta sinplea da, lau letra baino ez ditu erabiltzen eta.
- Izenak adierazi behar du kategoria bat. Horra hor, koxka: nola sortu izen bat, generikoa ez dena eta kategoria bat adierazten duena? Ez da erraza. Nabiscok, adibidez, bainilla marka bat sortu behar zuen eta Nilla sortu zuen: laburra, sinplea eta izozki mota horren oihartzuna iradokitzen duena.
- Izena izan behar da bakarra. Eta bakarra den neurrian, gogoratzeko erraza. Kodak, Xerox edo Eroski diren bezala. Pentsa opari bat erosi behar duzula sarean. Zer idatziko duzu: opariak.com, erosi.com edo erregalo.net?
- Izena izan behar da aliteratua. Hotsen bat errepikatzen duten izenak errazagoak izaten dira gogoratzeko: Coca-Cola, Obaba, Chupa-Chups, Volvo.
- Izena izan behar da erraza ahoskatzeko. irockandroll.com, 4xazkarrago.net edo opus360.com, esate baterako, ez dira esateko errazak, inondik ere.
- Izena izan behar da deigarria. Marka izenik arrakastatsuenek beti izan dute ezusteko elementuren bat. Prodigy, Hotmail eta Monster izenek, adibidez, badute hori.
- Izenak aipatu behar du pertsona bat. Munduko marka gogoangarri asko pertsona izenetatik datoz: Ford, Chrysler, Chevrolet, Pontiac, Cadillac, Calvin Klein, Ralph Lauren, Adolfo Domínguez, Boeing, Forbes, Gillete, Dell Sortzailearen izena erabiltzen dugunean, areagotu egiten da markaren publizitatea egiteko aukera.
Jakina, Interneten sortzen diren marka guztiek ezin izango dituzte bete baldintza hauek guztiak batera. Baina ahalik eta gehienak hartzen baditugu haintzat, errazago asmatuko dugu.
Erantzunak
Guztiz ados zurekin Gari, bi izen ezberdin erabiltzea gomendatzen duten puntu horren atzean ez dago inolako razionalik.
Bestela, gomendioak betikoak dira, ez dut gauza bereizgarririk ikusten internet delako.
Eta izen generikoak ez erabiltzearena puntu ona izan daiteke baina ez beraiek esaten dutenagatik. Ni zeozerren bila banabil google-era noa eta ez naiz hasten webgune mordo bat asmatzen ia nahi dotena aurkitzen doten.
Generiko bat erabiliz gero indarra galtzen du izenak, ez bait da proposamen indartsu eta ezanguratsu bat.
Ni ere Garirekin ados nago eta burura adibide bat etorri zait: Euskal Herriko disko etxe ezagun batek bere webgunea bere izenarekin jartzea izango litzateke logikoena nire ustez, baina zer gertatu zaie Metak disko etxekoei?
Ba sartu metak.com helbidean (for adults only) eta sartu musikametak.com helbidean. Ez da gauza bera, inondik ere.
Ez da zureliburuak.com, etxerikederrenak.com, oparizoragarriak.com, etorkizunekounibertsitatea.edu eta abarrekoen kasuaren modukoa, baina musikametak jartzea seguru ez dela izan Metakoen nahia. Dena den, batzuetan...
Kontrako adibiderik ere ezagutzen dut. Beste disko etxe bat Gaztelupeko hotsak da. Hauek, ordea, hotsak.com jarri diote izena webguneari. Ez dakit ba hau ere ona den, identifikazioa galerazten du... dena den gaztelupekohotsak.com hobea ez litzatekeelakoan nago.
> Honekin ez nago ados. Time ez bada lider sarean ez da izenarekin arazorik duelako, beste norbait aurreratu zaiolako edo hobeto egiten duelako. Enkanteen kasuan ere, ez dut uste Sotheby denik saretik egindako enkanteen paradigma.
Time ez da liderra, arrazoi duzu, besteak beste Interneten beste batzuek hobeto lan egiten dutelako. Baina bada beste arrazoi bat ere, egileen ustez: bezeroen pertzepzioa. Gure buruetan, Sotheby´s dira enkanteak, Londres edo New Yorkeko areto batean egiten direnak. Baina eBay dira enkanteak Interneten. Enpresa honek irabazi du leku bat gure pertzeptzioetan eta hor bere izena erabat uztartuta agertzen da sarearekin. Azken batean, izenak izana salatzen du eta hori gure buruetan gertatzen da. Horregatik jotzen dute egileek garrantzi handikoa izenarena.
> Bi izen erabiltzeak (bat sarean eta bestea kalean) nahastea ekar lezake. Beste gauza bat da sareko marka bakarrik sortu nahi badugu...
Cortefielek hainbat marka sortu zituen, arropa saltzen dutenak publiko desberdinentzat: Springfield, Women´s Secret, eta Milano. Eta bakoitzak bere dendak ditu eta bere kontabilitatea eta lan egiteko modua. General Motors-ek ere, hainbat marka ditu: Chevrolet, Pontiac, Oldsmobile, Buick, Cadillac eta Saturn. Bakoitzak bere publikoa du, baina denak enpresa berekoak dira. Beraz, zergatik ezin du enpresa batek beste bat sortu Interneten lan egiteko, beste izen batekin? Edo zergatik ez eraldatu enpresa eta sarean lan egiteko prestatu?
> Cortefielek hainbat marka sortu zituen, arropa saltzen dutenak publiko desberdinentzat: Springfield, Women´s Secret, eta Milano. Eta bakoitzak bere dendak ditu eta bere kontabilitatea eta lan egiteko modua. General Motors-ek ere, hainbat marka ditu: Chevrolet, Pontiac, Oldsmobile, Buick, Cadillac eta Saturn. Bakoitzak bere publikoa du, baina denak enpresa berekoak dira. Beraz, zergatik ezin du enpresa batek beste bat sortu Interneten lan egiteko, beste izen batekin? Edo zergatik ez eraldatu enpresa eta sarean lan egiteko prestatu?
Bale, baina hor beste arrazoi komertzial batzuek azaltzen dira. Adibidez, merkatu berrietara iristeko beharra, eta horregatik izena aldatzen da. Auchamp-ek Alcampo sortu zuen bezala edo Mr. Proper Don Limpio bihurtu duten bezala (Frantzian M. Propre eta alemanian ez dakit nola...) edo gure inguruan Fagor marka Aspes bihurtzen den bezala.
Baina negozio berdina egiteko eta publiko berdinera iristeko, hobe izenik ez aldatzea, marka berbera indartzeko. Imajinatzen duzue IBM interneten beste izen batekin lan egiten? Ez bada beste negozio linea desberdin bat sortzen dutela...
Artikulua oro har ondo dago, baina ikus dezagun paragrafo hau:
> Una estrategia mas usable y rentable es utilizar el mismo nombre que la empresa física. Muchos usuarios ya lo conocen y lo saben escribir correctamente. La imagen de marca del sitio web se identificará automáticamente con la empresa física, con los ahorros y beneficios que esto conlleva.
Jende askok egin du hau Interneten eta saretik kanpo. Virgin etxeak paroxismora eraman du. Begira hemen: 20 negozio sortu ditu, denak Virgin izenarekin! Hegazkinak, trenak, bidaiak, telefonoa, megadenda, diskoak, beribilak, bizikletak, ardoak, oporrak, globo hegaldiak, osasuna, liburuak, ezkontzak, zineak, kosmetikoak, kreditu txartelak, edariak eta esperientziak.
Niretzat Virgin markak diskoak esan nahi du. Bestelako negozioetan tratu gutxi egingo dute nirekin. Hau da zuek proposatzen duzuen bidea?
Ez errepikatu betiko izena
Dagoeneko negozio bat badaukazu, izen bat duena, ez erabili izen hori Interneten. Izan ere, sarea beste zerbait da. Time.com aldizkari digitala ez da lider sarean, ez eta bn.com liburu denda edo Sothebys.com enkante etxea, nahiz eta hirurak nagusi diren saretik kanpo.
Honekin ez nago ados. Time ez bada lider sarean ez da izenarekin arazorik duelako, beste norbait aurreratu zaiolako edo hobeto egiten duelako. Enkanteen kasuan ere, ez dut uste Sotheby denik saretik egindako enkanteen paradigma.
Bi izen erabiltzeak (bat sarean eta bestea kalean) nahastea ekar lezake. Beste gauza bat da sareko marka bakarrik sortu nahi badugu...