Nafarroako telebista autonomikoa sortzear
Lehenengo urratsa baino ez da oraindik, baina nafarroan bi telebista kalte egongo dira, biak kable bidez. Telebista digitala izango da eta bi enpresak izango dute aukera kudeatzeko.
Nafarroako parlamentuan eman zituen azalpenak Jose Ignacio Palacio ek. Berau, azpiegitura eta Herrilan sailburua da. Esan zuenez, gutxienez har orduko emisioa izango du egunero. Asteburuetan ere emitituko du eta 70 ordu izango dira, beraz.
Telebista autonomikoa ez da gaur goizeko kontua nafarrentzat. Orain aukera hori zabaldu da telebista digitalarekin eta Palaciosek ziurtatu duenez, ekimen pribatuaren esku utziko du telebista autonomikoaren gestioa. Telebista hauei eskatzen zaien gauza bakarra generalistak izatea da eta informatiboetan Nafarroako berriak tratatzea.
Hizkuntzarena ez dago oso argi
Argi dagoen bakarra bi kateetako bat gazteleraz izango dela da, osoki. Eta euskarak izango duen lekua? Ez dago argi, baina Palaciosek esan zuenez, bikoizketak izango dira euskara zabaltzeko bide. Bertsio originala, beraz, gazteleraz jorratuko da eta horrela entzun gura duenak aukera izango ei du euskaraz ere zerbait entzuteko. Bi kate hauek ez dira ordaindu beharko, baina ziur egon ordaindutako telebista ere jaso ahal izango dela.
Eta bitartean, ETB 1 ez da ikusten Nafarroa hegoaldean. Aurrekoan Euskaldunon Egunkariak zekarrenez, emisio arazoak daude Nafarroan. Telebisten emisioak kudeatzen dituen enpresa Retevision da. Arabako, Bizkaiko eta Gipuzkoako kasuan emisio gehienak Euskaltel enpresarekin egiten dira, baina Nafarroan ezinezkoa da hori. Retevisionek hegoaldera banatzen duen kanala erabiltzen zuen ETB1-ek, eta orain Canal 4 ikusten da kanal horretan. Beraz, ETB1 ez dute ikusten hegoaldeko euskaldunek.
Kodesko Joar mendian dagoen antenak ezin du zabaldu seinalea bi enpresari kate berean. 31. Kanala bi telebistek erabili gura dute eta hori ez da posible. Harremanetan daude Retevision eta ETB arazoa konpontzeko.