Teknologia albisteak

Jon Abrilen aurkako epaiketa

Berako Udala - Berako Udala

2002-05-30 : 09:05

Datorren ekainaren 11n Madrilgo Entzutegi Nazionalean epaituko dute Jon Abril Ttipi-ttapako kazetaria, eta gaur egun Berako Udaleko langilea dena. Hori salatzeko honako mozioa onartu du, ahobatez (Batasuna, EA eta EAJ), gaur goizean Berako Udalak, Berako Kultur Batzordeak hala proposatuta:

Jon Abril Olaetxearen epaiketa dela eta Berako kultura batzordean esku hartzen dugun taldeok aurkezturiko mezua:

Bertaratuak: Josu Goia (alkatea), Imanol Larrañaga, Txaro Zubieta, Bixente Goia, Oskar Goñi, Jabier Leiza, Juan Enrique Abril, Jose Luis Igoa, Jose Ramon Martin, Fernando Etxegarai eta Jabier Iturria.
Idazkaria: Pilar Chueca

Goizeko 11:00etan Berako Udal Batzar Aretoan. Mozioa irakurri ostean, Juan Enrique Abril zinegotziak Batzar Aretoa utzi du, auzipetuaren aita delako.

Testua:

Berako Herriko Etxeko Kultur koordinatzailea den Jon Abril Olaetxearen aurka Entzutegi Nazionalak zabaldutako auzia dela eta Berako Udalbatzarri jakinarazten diogu:

Jon Abril Olaetxea kazetaria da. 2000ko abuztuaren 17an Berako Ttipi-ttapa telebistaren berri emaile gisa joan zela Madrilera, eta bertan bere lanari dagozkion eginkizunetan aritu zela. Eginkizun horien artean zuen auzitegian gertatzen ari zenaren gaineko irudiak hartzea, egun horretan bertze hainbat kazetarik egin zuten gisa berean.
Jon Abril Olaetxea, Berako Herriko Etxeko langilea da, kultur teknikaria eta Kultur Batzordeko koordinatzailea, hain zuzen. Baina Berako Herriko Etxeko langilea izateaz gain, talde ezberdinetan bere ekarpen pertsonalaren bidez lan eredugarriak egindako herritarra da Jon. Berako kulturgintzaren dinamizatzaile nagusia zalantzarik gabe.
Jonen aurka irekitako auziak, orain arte auziperatuarengan sortu eragozpenak, Ekainaren 11n eginen den epaiketak berak, eta aurrerantzean auzi honek ekar ditzaketen ondorioek, Berako Kultur Batzordearen, eta ondorioz Berako Udalaren jardueran eragiten dute, kalterako betiere.
Kultur Batzorde honek Udalbatzarrak gai honekiko hartutako erabakiak ezagutzen ditu, eta horiekin bat egiten dugu. Hala ere, gertatzen ari den bidegabekeriaren aurka eta auzipetuaren alde, eta ondorioz baita Batzorde honen defentsan, bide eraginkorragoak jorratzerik badagoela uste du batzorde honek.

Beraz honekin guztiarekin Berako Udalbatzarrari zera eskatu nahi diogu:

Goitian jakinarazitakoak bere egitea.
Orain arte, gai honen inguruan, hartutako erabaki guztiak berrestea eta berriz ere, komunikabide guztiei horiek azaltzea.
Jon Abril Olaetxeari, hautetsi guztiek, Berako herriaren izenean, erabateko sostengua agertzea, bai hitzezkoa, bai praktikoa ere.
Sostengu horren baitan, hautetsi guztiek auziperatuari epaiketara laguntzea.

Erantzunak

Sustatu

2002-05-30 : 11:57

Eskaera gehienak atzera bota dizkiote eta dudan jartzeko modukoa da Zigor Arloko laugarren atalak duen jarrera. Ikusiko denaren artean Jonek grabatutako bideoa dago:

Atzera botatakoen artean:

Defentsak Jonek grabatutako zinta bat eskatu zuen, baina ez diote eman kopiarik. Zergatia: fiskalak esan dituela esan beharrekoak eta ez dagoela zinta ikusi beharrik. Zinta epaiketan ikusiko omen da.

Ez ditu onartu zenbait froga. Defentsak eskatu zituen froga moduan hartzeko ETBk, A3, Tele5ek eta TVEk auzitegi aurrean grabatu zituzten irudiak, baina frogatzat ez hartzeko arrazoia izan da aipatutako medioek informatzea zilegi dela eta auzipetuak ez ziharduela horretan.

Galdetzen da ia auzitegi aurrean irudirik ez grabatzeko dekretu edo agindurik zegoen. Galdetzen da, baita ere, ia irudiak grabatzea galarazten zuen kartelik edo aparteko seinalizaziorik bazegoen. Epaileek diotenez, bide publikoan irudiak grabatzea ez da eztabaidagai.

Eskatutako beste froga bat Donostiako poliziaren egoitzan kazetari batek grabatutako irudiak dira. Kasu hori artxibatua geratu zen. Hau ere ez da aintzat hartu.

Defentsak lagun hauek ere deitzea pentsatua zuen: Txema Ramirez de la piscina, Josu Chueca eta Edorta Arana EHUko irakasleak eta Euskaldunon Egunkariako Zuzendari Martxelo Otamendi. Hauei entzutea ere ez da izan posible, esan dutenez, EHUko irakasleen kontu hau oso urrun geratzen baita eta aukeratutako adituak herri ezberdinetakoak izanik ez baitute Ttipi-Ttapa ondo ezagutuko.

Onartu ere egin dituzte froga batzuk

Ttipi-Ttapa fundazioari dagozkion datuena.

Akusatuaren galdeketa eta lekukoen galdeketa ( polizia bi eta Ttipi-Ttapa Fundazioko kideena, Berako Alkatea, Audientzian Jonekin zeuden lagun batzuena... horrela hamaika lagun).

Lau bideo zinta ere erakutsiko dira, tartean, ETB-1ek, TVE-k eta Antena 3k emandako berriak batetik eta baita ETBk hainbat aldiz auzitegi kanpoan egindako grabaketak. Beste zinta batean Jon Abrilek Ttipi-Ttapan egindako kazetari-lanak ageri dira, izan aurkezle moduan, kolaboratzaile moduan... Eta azken bideoan Segurtasun Indarren nortasuna babesteko neurriak agertzen dira.

Zabal landu du berria gaur Euskaldunon egunkariak titular honekin: Akusazioaren oinarri den grabazioa ikustea ukatu diote Abrilen defentsari. Gaia landu duen beste medio bat Gara egunkaria da.

Iban Arantzabal

2002-05-30 : 12:02

Jon Abrili elkartasuna adieraztearren ekainaren 9rako Kultur Batzordeak prestatutako jaialdiaren berri ere eman du Josu Goia Berako alkateak.

Goizeko 11.00etan: kalejira egingo da, herriko musikariekin, Altzateko plazaraino.

Eguerdian harrera-ekitaldia egingo da hantxe

Handik Rikardo Baroja pilotalekuraino abiatuko dira eta, dantzari eta bertsolarien saioa egongo da

Arratsaldeko 18.30etik aurrera, Altzateko plazan, taloak, antzerkia, bertsolariak.

Ondoren, musika: Morau, Montoia, Petti, Joseba Irazoki eta Irats taldea izango dira.

«Errugabeak gara, ez inuxenteak» lelopean egingo dira ekitaldi guztiak.

Ertz kultur gunea

2002-05-30 : 22:13

Errugabeak gara, inuxenteak ez!

Gure kolaboratzaile estu eta lagun min den Jon Abril egin ez duen delitu batengatik epaituko dute ekainaren 11n Madrilen.

Audientzia Nazionaleko fiskalak 6 urteko kartzela zigorra, 6 urteko kazetari inhabilitazioa eta urte horietan lan publikora sarbidea debekatzea eskatzen du kazetari beratarrarentzat, 7.000 euro baino gehiagoko isunarekin batera.

Bere ustezko delitua, ttipi-ttapa herri telebistarentzat Madrilgo Audientzia Nazionaleko atean bideo-kamerarekin irudiak hartzea, bere lana egitea, alegia.

2000ko abuztuan bi beratar gaztek deklaratu zuten Audientzian eta, gainerako komunikabide guztiek egin zuten bezala, berri hori osatzeko irudiak hartzen ari zen Jon Abril.

Orain, 10 segunduko iraupena duen grabaketa xinple batengatik, eta bertzelako arrazoirik gabe, talde terroristarekin kolaboratzea leporatzen dio justiziak.

Ekainaren 11n eginen diote Madrilen erabat zentzugabea den zirku-epaiketa hori.

ERTZ kolektibotik adierazpen askatasunaren kontrako eraso hori indar guziekin salatu nahi dugu eta aldi berean agerian utzi kasu horretan ere justiziak eta zenbait komunikabidek erakutsi duten jokabide lotsagarria, errugabetasun presuntzioa eta informatzeko askatasuna behin eta berriz zanpatuz.

Bukatzeko argi utzi nahi dugu Jonek gure babes eta elkartasun osoa duela eta izanen duela, eta hemendik aitzinera behar den guzietan salatuko dugula egoera hau bere errugabetasuna onartu arte.