Euskara eta edukiak Interneten: mahaingurua bihar, mintegi bat aurrerago
Ostiral honetan UEUren Hizkuntza Teknologiak (Hiztek ) graduondokoaren barnean osagarri gisa antolatu den azken mahainguruaren berri eman nahi dizuegu: Euskara eta edukiak Interneten
Deialdia irekia da eta zabalik dago gai honekin interesatuta dauden edonorentzat. Hortxe duzue ekitaldirako deialdia. Partehartzaileen interbentzioez gain, UEUko Informatika Sailak zenbait enpresa eta eragilerekin egin asmo duen mintegi baten prestakuntza abiatzeko balioko du ostiraleko Eibarko elkarketak.
Izan ere, udazken partean Interneteko euskarazko edukietan lanean diharduten elkarte, enpresa, profesional eta erabiltzaileentzako mintegi bat antolatzeko intentzioa dago. Gaiak, enfokeak, partehartzeak...
Mintegi hori prestakuntzarako aukera bat izan daiteke, Internet eta komunikazio arloan dabiltzan profesionalentzat, ikasleentzat (hainbat alorretan: kazetaritza, marketinga, diseinua...), interesa duen edonorentzat. Zeren gainean prestatzeko? Adibidez: marketing, diru-iturriak, egile-eskubideak, eleaniztasuna, weblogak, ...
Eztabaida eta hausnarketarako aukera bat ere izan liteke mintegi hori. Adibidez, herri informazioa eta sarea; klusterraren aukera (hizkuntza industrien klusterra? edukien euskal klusterra?)...
Hemen esandako hauek, noski, zirriborro bat besterik ez dira. Ostiraleko elkarketan egongo da agian hauen inguruan tratatzeko aukera, eta gerora ere, UEUko Informatika Saila eta mintegi honen abiatze-lanean parte hartu duten eragileak irekita daude ideia, proposamen eta abarretara.
Gonbidatuta zaudete, beraz, mahai-inguru honetara, eta baita gerora begira oraindik zehazten dihardugun mintegi horretara.
UEUko Informatika Sailetik,
Iñaki Alegria eta Luistxo Fernandez
Mahainguru honen inguruan, Egunkarian elkarrizketa laburra egin diote gaur Iñaki Alegriari. Horra galde-erantzun bat handik aterata:
Zer-nolakoa da euskararen eta euskarazko edukien presentzia Interneten?
Kuantitatiboki txikia da, baina goraka doa. Orokorrean, Interneteko informazio
kopurua urte batean bikoiztu egiten da, eta euskarazkoa, berriz, lau halako gehitu,
baina hori gertatzen da duela gutxi arte oso informazio gutxi zegoelako euskaraz.
Kalitate aldetik denetik dago. Lehen uneko ahaleginaren ondorioak ziren gehienak,
eta ondorioz zaharkituta geratzen ziren berehala. Egun gune asko daude
komunikazio politika baten barruan direnak edo zerbitzu iraunkorra eskaintzen dutenak.