Shin Chanek gero eta ohiartzun handiagoa
Nork ez du ezagutzen Shin Chan? Umeak, gazteak eta ez hain gazteak bereganatu ditu bost urteko japoniar mutiko koskor honek. bere berri ematen duten hainbat webgune ere badaude. ETBk emandako datuen arabera telebista ikusten dagoen hamar gaztetik zazpik Shin Chan ikusten du. Baina, nor da Shin Chan?
Gura duenak egunero ditu bere abenturak ikusgai Euskal Telebistan eguerdian eta arratsaldean. Orain hilabete inguru Euskadi Gaztean elkarrizketa egin zioten, albistegietan bere izena aipatu dute...
Euskal Herrira heldu den azken marrazki biziduna da, eta bestelako istorioak dakartza telebistara. Bart Simpson amerikarraren japoniar eredua izan gura duen bost urteko mutikoa da Sinnosuke edo Shin Chan. Umoretsua, bihurria, lizunkeriak gustuko dituena, gurasoak lotsagarri uzten dituena Bestelakoa da Shin Chan.
Lau urteko umeak eta hogeitaka urteko gazteak, guztiak bereganatu ditu Shin Chanek. Egunkari eta albistegietan bere tokitxoa izan du. Irudiak, musika, bideoak eta jokoak jasotzen dituen webguneak ere barra-barra ditu. Hala ere guraso bat baino gehiago dago kezkatuta ume eta gaztetxoentzat eredugarri ote den, eta askok ez diote uzten etxeko txikienari marrazki bizidun horiek ikusten. Emanaldi ordutegiak , aldiz, kontrakoa dio justu; etxe askotan haurrari, telebista begira dagoela, jaten ematen zaion orduan botatzen baitute Shin Chan.
Euskal Herrian ez ezik Katalunian ere ematen dituzte Shin Chanen abenturak, Kataluniako telebista publikoak hain zuzen. Kataluniako Ikus-entzunezkoen Kontseiluak, ordea, hainbat kexa jaso ditu gurasoengandik, hamahiru urtetik gorako gaztetxoei zuzendutako marrazki bizidunak izanik txikiak telebista aurrean dauden ordutegian eman dituztelako batez ere. Kataluniako Ikus-entzunezkoen Kontseiluaren erantzuna honakoa izan da:
- Aipatutako marrazki bizidunek ez dutela araudia urratzen, ez baitute etxeko txikiak mindu ditzaketen irudi edo mezurik.
- Onartzen du sexuaren inguruan berba egiten dela sarritan, baina ez du sexua argi eta garbi agertzen den eszenarik.
- Egia da gurasoen agintea zalantzan jarri ohi dela.
- Emakumeen irudi estereotipatua ematen da: etxeko andreak, sexu-objektuak eta kirioak airean beti.
- Ez darabil, ordea, hizkera zikinik.
- Ez du biolentziarik erabiltzen.
Hala ere Kataluniako Ikus-entzunezkoen Kontseiluak ordutegiz aldatzeko eskatu dio Kataluniako telebistari, eta 19:10ean ematetik 19:40an ematera pasatu dute.
Zenbat buruhauste sortu dituen gure Shin Chanek. Kalean dagoeneko ama bati baino gehiagori entzun zaio bere seme alabak ipurtandi edo titi txiki deitu izan diola. Eta horren aurrean zein aurpegi jarri?
Erantzunak
Atzo Shin Chan hizpide izan genuen Arrasate Irratian antolatu genuen tertulia batetan. Bertan zale amorratu bat, ama bat eta Txatxilipurdiko (Arrasateko aisialdi taldea) langile bat izan ziren. Guztiek ezagutzen zuten Shin Chan, nola ez! Amak bere 5 urteko alaba guztiz engantxatuta dagoela esan zigun, eta sekulako barreak botatzen dituela. Amak alabari zergatik gustatzen zaion galdetu ziola esan zigun; alabaren erantzuna, Shin Chan-ek tontokeriak egiten dituelako. Txatxilipurdiko langileak ludotekako haurrek japoniar mutikoa behin eta berriz imitatzen dutela esan zuen, baina modu onez imitatzen dutela, inoren gonak altxatu gabe. Ludotekan elefante tronpako maskara bat dutela esan zigun, eta azkenaldian haurrek maskara hartu eta gerrian jartzen dutela e, Tronpa! oihukatzen duten bitartean. Laburbilduz, Shin Chan-en inguruan ordu erdiz berbetan egon ondoren, mutikotxo honen abenturak haurrak eta gurasoen arteko harremanetarako erabilgarria izan daitezkela ondorioztatu genuen. Elkarrekin ikusi, barrabaskeriak aztertu eta haurrari ulertarazteko zer dagoen ondo eta zer ez. Ah eta sexu aipamenei dagokionez, informazioa ez dago sekula soberan, ala bai?
> - Onartzen du sexuaren inguruan berba egiten dela sarritan, baina ez du sexua argi eta garbi agertzen den eszenarik.
Pitilina behintzat erraz erakusten du Sintxanek :-)
Neri lau urteko semeak deskubritu dit pertsonaia hau.
Gerora, Aurkin ere aurkitu izan dut! Gutxitan ikusi dut, baina egia da grazia daukala.
> - Ez du biolentziarik erabiltzen.
>
Ba zen garaia! Azkenean, biolentziarik gabeko marrazki bizidunak eta horren ordez sexuari lekua uzten diona gainera, ez dakizue zer nolako poza hartzen dudan hori horrela dela jakitean.
Nik 18 urte ditut eta nire adineko jendeak, gelan ez du mutikotxo hori besterik ahotan, guztiek abesten dute abestia, denek esaten dituzte bere esaldiak, denek egiten dituzte aurreko eguneko kapituluaren komentarioak...
Zer esanik ez kalean! Besterik ez da entzuten eta lehengoan batek esaten zidanez, aurtengo udan, herrietako jaietan, askotan entzungo dugu muttiko bihurri honen berri eta seguruenik tabernaren batean abesti famatu hori ere sarri entzungo dugu.
Espero dezagun ez garela azkarregi nazkatuko hainbesteko sona izanagatik, izan dezagun Shin Chan betirako!
Bada gaurko saioa, arratsaldekoa, penagarri xamarra izan da. Amak amets egiten zuela titi handiak zituela, bere haurrak horretaz farre egiten zuen bitartean. Eta nesken papera, berriro diot, hutsaren hurrengoa da. Bi andereño ateratzen dira, elkarren etsai eta beti irrigarri geratzen direnak, zuzendaria noski gizona. Ikasleen artean denak mutilak, neska bat izan ezik, kropomisoagatik edo sartua. Gelako liderrak noski, mutilak
Gaia beste alderdi batera eramanez gomendagarria da oso pertsonaiaren sortzaileari Kataluniako aldizkari batean egindako elkarrizketa
Bertan hainbat gai jorratzen dira, hala nola ez dela haurrendako pentsatutako pertsoania, helduentzat baizik, eta beraz sortzaileak berak ulertzen duela gurasoen kezka.
Beste bat da hizkuntzarena. Seriean hitz jokuek indar handia dute, eta aipatzen da itzultzaileen lana. Gure kasuan, behintzat, euskal bertsioa oso ona iruditzen zait, eta hitz jokuak barregarriak suertatzen dira.
Gainera bildur agertzen da japoniar barne produktu hau kanpora atera delako eta ez dakielako nola hartuko duten kanpoan.
Ez dut nik Shin Chanen alde edo kontra egingo, lau urteko umea izanda, egin behar izanez gero, kontra egingo nuke alde baino gehiago-eta. Baina ez da kasua!
Jakin dut Bizkaiko eskolaren batean ere polemika handia sortu duela Shin Chanek; eguerdian, bazkal ondoren, 3,4,5,6 eta 7 urteko nahi duten umeek telebista ikusteko txokoa izan dute beti. Normalean bideoak ikusi ohi dituzte, baina ETB mutiko japoniar baten bihurrikeriak eskaintzen hasi zela-eta, ba, horixe ikusten hasi ziren, inolako protestarik egin gabe, gainera, umeak eta ez hain umeak. Izugarrizko koadrila handia elkartzen zen telebistaren inguruan eguerdiro: 3,4,5,6, 7 urtekoak eta baita 8,9, 10,11,12,13,14,15 eta 16 urtekoak ere. Marrazkiak izanda, eta gainera euskaraz, badirudi umeentzako ona behar zuela izan produktuak. Ikastolako zuzendaritza taldeak, bost urteko japoniar txikiak zer esan, nori esan, zelan esan, eta zer egiten zuen ia jakin gabe, txikienentzako zen telebistaren txokoa eguerdietan ikasle nagusiagoekin gainezka egoten zela ikusten zuen eguna joan, eguna etorri. Marrazkiak ikusita, erabakia hartu du zuzendaritzak; etxean norberak nahi duena egingo badu ere, ikastolan ez du inork Shin Chan ikusiko.
Argi azaldu du ikastolako zuzendaritzak; nagusiek ez dute inoiz txikiekin telebista ikusterik izan eguerdietan, eta ez dute orain ere izango. Horretaz gain, marrazki bizidunok ez ditu egokitzat jotzen zuzendaritza taldeak, beraz, Shin Chan ez du ikastolan inork ikusiko.
Shin Chanek inoiz baino jarraitzaile gehiago ditu orain Bizkaia aldean. Eurena egin dute ikasleek Shin Chanen aldeko burruka.
Aupa !
Sin chan-en aldrebeskerieangatik norbait kezkatua ikusteak pozten nau, eta aldi berean, ulertezina iruditzen zait zenbaitzuren jokaera. Argi eta garbi baitago, haur eta gazte guztiak "hipnotizaturik" daudela pertsonaia honekin, eta aldi berean honen umorea txikienentzat desegokia dela. Imitazioa izanik eskolaz kanpo ikasteko modu eraginkorrenetakoa, nola ez dute ba imitatuko sinosukeren gauza guztiak ? Ezagutzen ditut, ikasgela bertan galtzak jetsi eta "tronpa" delakoa egiten hasi direnak, baita sin chan aitzaki hartuta, lotsagabekeriz emandako erantzun ugari ere. Honegatik guztiagatik, ez deritzot gaixki haurrari programa hori debekatzea. Ez da haurrentzat egokia, eta honegatik haurren "prime time" orduetatik kanpo uztea litzateke modu egokiren bat gauza okerragoak ekiditeko. Entzuna dut denuntziaren bat ere egon omen da... eta horregatik atzeratu dutela ordu erdiz arratsaldeko emanaldia ... gutxienez haurrak 30 minutuz luzatuko dute beraien parkeetako jolastorduak !!!
Besterik gabe ...
ONDO IZAN !
Bada, nire ustez Shin Chan, Simpsons-ekin gertatzen den bezala, bietara jokatzen duela. Helduentzako umorea alde batetik, haurrentzakoa bestetik. 5 urteko haurren gela batean irakasleak galdetu, eta 23k Shin Chan ikusten zuten, 8 urtekoen artean ere arrakasta itzela da. Baina zer ikusten edo ulertzen dute horiek? Atzo nire 5 urteko alabak zioen Shin Shanen ama gaiztoa zela, ez noski mutikoa, haurra eta aita jotzen zituelako. Egia esan ez zait batere eredugarria iruditzen han erakusten dena, baina ez zait kezkagarria iruditzen. Eta,egia da, barregarria da. Dudarik gabe, alderdirik makurrena da erakusten duen debaldeko matxismoa, eta haur franko obsesoa sexuala idurikatzea. Bistan autoritatea gizonari aitortzen zaila, eta neska-emakumea beti ahulago agertzen dutela.