Dibertitzeko manerak

Antolatzaileek, seguruenik, hala ez uste arren (giro polita zegoen kanpoan…) aretoa lepo eginda zegoela sartu dira Kike (despistatu aurpegiarekin), Asisko (beti bezain koloretsu) eta Antxon (karpeta handi batekin).

Zer egingo zuten ez zen erraza asmatzea eta tituluari begiratuta gutxiago: hitz aspertuan dibertitzeko manerak. Eta zein izan den moldea? Ba aspertzeko moduko hitzekin jardun gabe berba eta berba egitea hariari tiraka.

Haria zein zen? Bidaia bat, Gasteizen ez dagoen Iparra tabernaren bila. Haria fina, baina ez horregatik motza edo apurtzen erreza. Hari horri tiraka esandako batzuk:

• Antxon Olaziregik orrialde horietan topatu dituen dendez jardun du:

Ebanista: Balda Apalategi / Geologoa: Ibai Mendia / Surf denda: Itsaso Barea / Sagardotegia: Ito Arte / Psikologoa: Cisneros Ostiategi (ez al ziren buruan izango…) Zapata denda: Pare Gabia (Baionakoa) / Diborzioak: Biurrun / Psikiatra: Legorburu.

• Asisko Urmenetak zaspiak bat liburutik ateratako zenbait hitzen gainean aritu da eta dialektologian maisu izan daitekeela ere erakutsi du:

Oilarrek Euskal Herrian hiru modutan egiten dute: Kikiriki (Iruñean), Kukurruku (hegoalde gehientsuenean), eta Frantsezez Cocoriko.

Zakurrek, berriz, guau-guau egiten zutela bagenekien askok, baina iparraldean waf egiten dutela? Edo txakur txikiek ttau-ttau egiten dutela?

Katuek, aldiz, miauka entzun ditugu, baina haserre daudenean marrau egiten dutela esan digu Asiskok, edo oso haserre daudenean fut egiten dutela. Eta baita katu txikiek ñiau egiten dutela ere.

Otsoek hegoaldean eta iparraldean ez dute soinu bera ateratzen argi utzi digu: gehientsuenok ulu egiten dutela diogun bitartean, Xiberuan, Donapaleun, hain zuzen ere, Ohülgü egiten dute.

• Kike Amunarrizek hainbat testu eta dokumentu ekarri ditu eta baita Txiskolan famatu egin ziren “nola esaten da…? Horiek ere. Fresko-fresko, eguneko hogeita lau orduak horretan pasako balitu moduan, hantxe bertan asmatu du Arabieraz puskarra nola esaten den: a le babarrun jale.

Sexua ere hizpide

Sexuak ere eman ditu perla ederrak gaurko hitzaldian eta inor ez dela aspertu konbentzituta atera gara. Zikokatu, tresnak mezuratu, bandatu, gainkatu, Santa Ageda jo, partxisean aritu, xagua klikatu, karaokea kantatu, ezkurtxoarekin jardun… Zer diren badakizu?

Euskarak jolas egiteko ere balio duela adierazi dute, behintzat. Horrenbeste bider penak kontatzen egon beharrean euskara modernoa eta osasuntsua izan daitekeela ere irakatsi digu hirukote honek. Sena ei da bidea eta hari jarraitu behar omen zaio Asiskok esan duen moduan. Kontatzeko asko geratzen da kronikatxo honetan kontatu barik, baina kontatzeko moduak ere egiten du eta inoiz aukerarik baduzue segi hirukote honen pista.