Independentziaren kostoa kalkulatzen
Jose Luis Barberia-k sinatutako erreportaiaren galderak parrafoz parrafo zekarren idatzia, beti begibistan ez bazegoen ere, bere erantzuna: EZ, jakina. Ideia/datu gehienen jatorria badirudi Enpresarien Zirkuluak eta haren buru Jesus Maria Vizcainok ateratako kontuak direla, No-España delakoaren kostuak azalduz atera zuten txosten batekoak... (azaroan kaleratu zuten hura eta haren erreferentzia bat hemen aurkituko duzu. Beste lotura honetan berriz, Amatiñok Vizcainoren inguruan orduko haren haritik Deian kaleratu zuen artikulu bat).
Nolanahi ere, independentzia ekonomikoki ezinezko horren inguruko argudioek eta datuek banan-banan ez zuten indar handirik. Edo ondorio kontrajarriak eman ditzakete, segun nola irakurtzen dituzun. Adibidez:
- Barne produktu gordina, Euskadin (erreportaia horretan Euskadi da Euskal Autonomia Erkidegoan, noski), Espainiakotik %20 gorago. (independentziara bideratzeko ez dago gaizki).
- Euskadiko ekonomia zeharo dago lotua Espainiakoan. Eta horren adierazgarri, ekonomista baten esaldia: Cuando España va bien, Euskadi va muy bien, y cuando España va mal, Euskadi va peor. Hortaz, okerrerako ere bada batzuetan hori...
- Sekulako kolpe ekonomia litzateke, independentziarekin batera, Europako Batasunetik irtetea.
Azken argudio honek dirudi sendoena. Estatu independente berria Batasunetik kanpo geratuko litzatekeen hipotesia konfirmatu ezkero. Gainkarga latza izango litzateke hori. Baina, era berean, artikuluan azpimarratzen denez gaur egunean sofritzen den indarkeriarena ere beste karga latz bat da. Eta hortaz, konparatu datu hauek...
- Mikel Buesa katedratikoaren arabera, Espainiatik kanpo geratzearen kostoa Barne Produktu Gordinaren %9.5 izango litzateke.
- Alberto Abadie eta Javier Gardezabal ekonomisten ikerketa baten arabera, indarkeriaren kostoa GAUR, Barne Produktu Gordinaren %10 da. ETAren suetenaren garaian euskal enpresek burtsan izandako eboluzio konparatua ere aztertu dute bi horiek nonbait.
Ba atera kontua: konparatu oraingo kostoa, edo ondoren, ustez indarkeriarik gabeko etorkizun batean izango litzatekeen beste kostoa. Parra geratzen gara.
Diru kontu bitxi hauez gain, erreportaiak zeuzkan hiru piezetako bi ez ziren independentziaren kostoari buruzkoak, baizik eta gaur egunean indarkeriaren eta nazionalismoaren mamuagatik euskal enpresek pairatzen duten boikoten inguruan. MCC taldeak jasaten dituen presioak aipatzen dira, Jesus Catania MCCko buruak ez dio El Paisi erantzun nahi izan, edo izenik gabeko enpresari batek euskal produktuen kontra botatakoak... Holako osagarriekin betetzen da informazioa. Atal honetan ere, badirudi gaia ez dela Independentzia zenbat kostatuko den bihar, baizik eta Nazionalismoa zenbat kostatzen den gaur.
El Pais-eko erreportaiaren hiru piezak sarean: Bat, Bi eta Hiru
Erantzunak kargatzen...
