Euskadi Informazio Gizartean aurkeztu du Lehendakariak

Jende uholdea zegoen gaur eguerdian Kursaal-aren kubo txikian. Badago jakin-mina EAE-k gai honen inguruan hartu beharreko norabidea ezagutzeko. 300 lagun inguru batu dira

Iraultza teknologikoaren atarian gaudela esan du Juan Jose Ibarretxek, aldaketa izugarriak ekarriko dituela eta hori erronka izango dela Euskal Herriarentzat. 2000Hiru ekimena izan da euskal gizarteak egoera berrira egokitzeko izan duen erreakzioen eragilea, bai hezkuntza alorrean, bai enpresetan, bai administrazioan bai eta etxeetan ere. Programa horren emaitzak jakinekoak dira, esaterako, 1999. Urtean Euskadiko etxeetatik biztanleen %6 konekta zitezkeen Internetera, eta 2001 urtean, berriz, %25 dira. Kataluniarrekin batera, Estatuko erkidegoen buruan gaude, beraz.

Hiru euskarritan egingo da eraldaketa:

1. Informazioaren eta ezagutzaren gizartea sortzea.
2. Euskadi berrikuntza eta teknologia alorrean eredu izatea.
3. Kalitate Osoa irizpidea izatea erakundeak kudeatzeko modua.

Helburu moduan, epe luzera, Europar Batasuneko herrialde garatuenekin batera (Suedia, Finlandia eta Danimarka) egotea jarri du Ibarretxek.

Lehendakariak kultura digitalean sartzeko gonbita egin die herritarrei, bizi kalitatea hobetzeko, harremanak aberasteko eta aisialdiko aukerak areagotzeko.

Horrenbeste aldiz erabiltzen dugun informazioaren gizartea kontzeptua horrelaxe definitu zuen Ibarretxek: Informazioaren Teknologien eta Komunikazioen garapenaren ondorioz gertatzen ari diren eraldaketa sozial, ekonomiko eta politikoak biltzen dituen prozesua, baita teknologia horiek erabiltzeak informazioa lortu, bildu, prozesatu eta partekatzeko eskaintzen duen ahalmen mugagabea ere.

Helburu estrategikoa ere markatu du lehendakariak: Euskal gizartea aro digital berrira egokitzea, kultura aldaketa sustatuz eta teknologia berriak pertsona guztien zerbitzura jarriz, bizitza kalitatea hobetu, oreka sozial handiagoa ezarri eta gure ekonomian aberastasuna sortzeko. Helburu horien artean, Etxean ordenagailu pertsonala duten familiak %21,5 igotzea izango da, hau da, %65 izatera pasatzea. Internet erabilera ere egungo %29,2tik %65era pasatzea edo merkataritza elektronikoan jarduten dutenak %16,9tik %35era pasatzea.

Jarduera ildo batzuk ere markatu dituzte Jaurlaritzatik. Erabiltzaileei dagokionez honako jarduera esparruak hartzen dira aintzat:

1. Internet guztiontzat: herritar orok zerbitzu eta edukiez gozatzeko aukera bermatzea. Horretarako jarriko dira martxan Interneterako sarbide eta prestakuntzako guneen sarea, herritarrei laguntza teknikoa emateko gunea, ingurune digitala, Konekta zaitez eta Egailan guneak...
2. Enpresa Digitala: Enpresek baliabideak edukitzea, bai bezeroekiko, hornitzaileekiko eta administrazioarekiko. Bai barneko kudeaketa hobetzeko aukera izateko zein harreman horiek sendotzeko. Enpresa digitalaren guneak, oraindik eraikitzen dagoen maquetas.com
3. Adiministrazioa on line: Behar beharrezkoa da administrazioak erronkatzat hartzea eta infoherritarrek instituzioekiko harremanetan izan behar dituzten behar berriei erantzuna ematea. Gogoeta horrek gobernua berrasmatzea dakar. Eskakizun horietara moldatu eta prozesu guztiak Euskadi digital berrira egokitzeko. Euskalcert, Euskalsarea, atea, Zuzenean, boto elektronikoko sistema, erosketa publikoak...

Eduki eta zerbitzuei dagokionez:

• Euskadi sarean: Euskadiren irudia indartzea du helburu. Euskararen presentzia eta erabilpena sustatzea. Alfabetatze digitala sustatzea eta ahotsari lotutako teknologien industria garatzea izango dira erronka. Hemen sartzen da Euskadi.net ataria ere.
• E-prestakuntza: Administrazioak berebiziko ahalegina egin behar du Informazioaren eta Komunikazioen Teknologien alorreko talentuak erakarri eta gordetzeko. Tartean dira Unibertsitate campus birtuala, Ingurumen eta kontsumoko heziketarako edukiak eta plataformak sortzea, Ikastetxeetako azpiegiturak sendotzea, On line prestakuntzako sarea...
• e-osasuna: herritarra/gaixoaren eta administrazioaren arteko harremanei balio erantsia emango zaie. Esaterako, osasun txartel moderno bat jarriko da martxan, historial kliniko digital bakarra izateko urratsak eman, errezeta elektronikoak, herritarrendako zein langileentzako ataria edo pazientearendako hezkuntza eta entretenimendu sistemak ezartzea.
• Edukien sektorea: Jarduera ildo honen helburu nagusia Euskadin edukien ekoizpen eta banaketaren sektorea berrantolatu eta garatzea da.

Honetarako Azpiegitura berriak bultzatuko dira (EUSKONIX, lurreko telebista digitalaren ezerpena, banda zabaleko azpiegiturak herrialde osora hedatzeko plana, 12bask, multimedia korridorea...), teknologia modernoenak erabili eta administrazio publikoa denez honen atzetik dagoena Arautu ere egingo da esparru hau, erabiltzailearen eskubideak babesteko.

Zifra gehiago:

Internet erabilpen maila hezkuntzan: Unibertsitatean, lehen hezkuntzako edukiak interneten jartzen zein Bigarren Hezkuntzan, %5etik 40ra pasatzea.

Ekipamendu mailan, interneta banda zabaleko konexioa duten lehen hezkuntzako ikastetxeak %14,5 izatetik %100 izatera. Berdin bigarren hezkuntzako zein LHko ikastetxeekin. Kontuan izan, Konekta zaitez programarekin 20 ikasleko ordenagailu bat izatetik 12 ikasleko bat izatera pasatu dela. Hori da gaurko egoera, baina hobetu gura da.

Posta elektronikoa erabiltzen dutenak %49 izatetik %60 izatera.