Gazteak euskara elkarteetara nola ekarri
Zaila egiten omen da gazteak euskara elkarteetara hurbiltzea. Ez omen dute interesik euskara elkarteek egiten duten lanean, eta are gehiago, euskararen alde egiteko ere gero eta gazte gutxiago omen dago prest. Dena den, oso garbi daukagu gazteen lana beharrezkoa dela euskara elkarteen egitasmoa aurrera eramateko eta euskara elkarteak indarrean mantentzeko.
Ponentzia: Gazteak. Emalea: Iñaki Eizmendi (Animatzaile soziokulturala) Ttakun kultura elkarteko haur eta gazte saileko arduraduna.
Baina, zergatik nahi dugu gazteak elkartera hurbiltzea? Zer eskaintzeko asmoa dugu? Nola hurbiltzen gara gazteengana? Nola egiten dugu eskaintza?
Txosten honetan, gai horien inguruan hausnarketatxo bat egiten da, eta proposamen batzuk egiten dira.
Kontutan hartu txosten honen helburua gazteak euskara elkarteetara nola erakarri aztertzea dela, eta ez herrietan gazteek euskara gehiago erabiltzeko zer egin behar den aztertzea. Agian oso gauza oinarrizkoa aurkezten dira eta ez dio inori askorik lagunduko, edo agian hausnarketa eta eztabaida bat sortzeko balioko du. Horrela balitz, denontzat hobe.
Topagunearen Euskara Elkarteen Kudeaketaren inguruko Jardunaldiaren inguruko informazio gehiago: deialdia, programa, eta bertan tratatutakoak.
Ez da erraza gazteak, adin jakin batzuetakoak batez ere, euskalgintzara hurbilaraztea. Egia esan, 12 eta 16 urte bitarteko gazteek edonolako elkartetan esku hartzea oso zaila da. Oso adin kritikoa da, erabateko aldaketakoa eta joera indibidualistak azaltzen dira, nahiko "pasotak" izaten dira gazteak trantsizio adin horrekin.
Bilboko Zenbat Gara elkartean, hutsune horretaz jabetuta, hainbat buelta eman dizkiogu gaiari. Gure helburua bizitzaren esparru guztietako jarduerak euskaraz egin ahal izatea da eta adin guztietako jendeak, noski.
Duela hilabete batzuk elkarteak enbidoa bota zien adin horretako hainbat gazteri, euren gustoak eta joerak zeintzuk diren jakiteko, inolako aurreiritzirik eta mugarik gabe gazteek eurek antolatutako ekintzak prestatzeari begira, helduok sustengua ematera mugatuz.
Elkartruke horren ondorioz sortu da larunbatean aurkeztuko den ZAPARRADA gaztegunea. Asmatuko ahal dute-dugu gazteok euskaraz eta gustora euren jarduera egin dezaten lortuz?
Arretaz irakurriko dugu zure txostena, Iñaki. Eskerrik asko.
Jabi Zabala.