Teknologia albisteak
5

Bisbalek, Chenoak ala Manuk, nork irabaziko du Eurovisionerako txartela?

Erabiltzailearen aurpegia
Joxe Aranzabal
2002-02-11 : 12:02

Jendea zoroen pare ari da Espainian telefonoz deitzen “Operación Triunfo”ra, bakoitzak bere gustuko idoloari laguntza emateko. Eurovisioneko Jaialdian kantatzeko aukera dago jokoan. Baina ez hori bakarrik. Baita ospea eta dirua ere. Herritar soilak ezezik, herri erakundeak ere buru-belarri sartu dira beren herrikideen aldeko lehian. Eta diru publikoa ari dira erabiltzen horretarako.

Espainiako sei udal eta sei diputazio buru eta bihotz sartu dira lehian euren herrikideek irabaz dezaten “Operación Triunfo”. Batzuek telefonoak jartzen ari dira, jendeak doan eman dezan botoa; besteek, ordea, kartelak atera eta telebista ikusteko lekuak prestatu dituzte. El País egunkariak eman du horren berri.

  • David Bisbal. Almeriako Udalak lau telefono jarri ditu, herritarrek David kuttunaren alde eman dezaten botoa. Astelehenean, gainera, 20x20 m.ko pantaila erraldoi bat jarriko dute herriko plazan, azken jaialdia jarraitzeko. Diputazioak ere bi telefono jarri ditu, jendeak doan dei egin dezan. David Bisbalen familia, bestalde, hiria goitik behera ari da orrazten furgoneta batekin, megafonia bidez gogorarazten herritarrei deitzeko.
  • Chenoa. Palmako alkatea babesle bila ari da doaneko 20 telefono jartzeko Chenoari laguntze aldera. Mallorkako Consell delakoak ere 10.217 euro (1,7 milioi pta) gastatuko ditu komunikabideetan uhartetarrak animatzeko Chenoa laguntzera. Prest dago, gainera, deiak ordaintzeko. “Mallorkaren ahotsa Eurovisionen” esaten diote Chenoa txikiari.
  • David Bustamante. San Vicente de la Barqueran gehiago nahi dute. Joan den astelehenean sekulako festa antolatu zuten beren herrikidea sailkatu baitzen finalerako. Orain beste kanpaina bati ekin diote elastikoak saltzen, kartelak ipintzen eta jendea animatzen deitzera. Udala pentsatzen ari da kiroldegia egokitzea asteleheneko gala jarraitzeko.
  • Manu Tenorio. Sevillako autobusek kartelak daramatzate herriko semearen aurpegiarekin: “Sevilla Manu Tenoriorekin”, diote. Udalak ez, baina Partidu Andalucistak telefonoa utzi die, doan, deitu nahi dutenei Triana auzoan, Manu hangoa da eta. Honen amak ez du esan nahi izan semea Betisen ala Sevillaren jarraitzailea den, osterantzean herritarren erdiak aurrera egiten lagunduko ez dioten beldur baita.
  • Rosa. Granadako Armilla herrian 25.000 afixa jarri dira Rosaren argazkiarekin. Udala sekulako festa antolatzen ari da Rosa akademiatik itzultzen denerako. Telefono enpresa batek mahai bat jarri du herritarrek Rosaren alde dei egin dezaten, musutruk. Udal irratiko langileek ere esaten dute telefonoak kolapsaturik dauzkatela, hainbeste dei jasotzen dituzte eta.
  • Veronica. Salbuespen bat behar-eta, kontua da Elche inguruan ez diotela kasu handirik egin beren herrikideari. Beldur omen dira ez dela sailkatuko lehen hiruren artean eta horrek hotz eta motz utzi du bat baino gehiago. Hala ere, orain bi astebete hango diskoteka batek lau telefono jarri zituen Veronicaren alde. Orain udalak ere beste horrenbeste egingo du. Nahi duten herritarrek Gran Teatren ikusiko dute asteleheneko saioa, hiriko antzokirik handienean.

Erantzunak

Iturri
2002-02-11 : 13:12

Aupa:



Izugarria da saio honek duen indarra. Alde batetik, azken asteetan ez dakit zenbat disko ateratzen den AFYVEren zerrendan. Hala ere, OTkoen diskoak hor agertzeak Munduko kross txapelketekin konparatzen dut nik: OTkoak beltzak, txuriak hor nonbait.



Gero, pasa den astean programaren indarra zein den ikusteko beste aukera bat izan nuen: izan ere, 2001eko abenduan Donostian jaiotako bi haurren izenak Chenoa eta Naim baitira.



Nola dabiltzan gure neuronak!

Luistxo
2002-02-12 : 13:34

Ume hori Txenoa berbataiatuko dute ikastolan, eta Villarrek teoria ilunen bat aterako du ondorioz.



Enfin, nik uste nuen ondo samar kantatzen zuen bakarra Manu Tenorio sevillanoa zela, baina azken-aurreko geratu ei da finalean.

Leire
2002-02-12 : 17:28

Euskal Kantu Txapelketa orain abiarazi dute. Antolatzaileen nahia da "operación triunfo" gutxiago eta euskal doinu, abesti eta hitz gehiago izatea. Dena dela, badirudi geurean ere Operación Triunfo-ren "triunfo"a eztabaida ezinekoa izan dela.

banabil
2002-02-12 : 19:33

Bai! Bustamante txapeldun!!! Horrelako tipo bizarro bat behar du Españak Eurovision-en.

amayi
2002-02-18 : 19:46

> Bai! Bustamante txapeldun!!! Horrelako tipo bizarro bat behar du Españak Eurovision-en.

Hala ere, hain sonatu izateko iruditzen zait ihauteriak bezalako jaietan aipamen gutxi egin dela saio honi buruz, beti egiten da kritika moduko bat baina aurten horren falta somatu dut.

Erantzun

Twitter ikonoa  Facebook ikonoa  Sartu