Teknologia albisteak
2

Urnietatel ezin saldu-eta, Urnietako alkateak dimisioa aurkeztu du

Erabiltzailearen aurpegia
Ander
2002-02-09 : 21:02

Maixa Lizeaga Urnietako alkateak eta Juan Luis San Migel udal bereko zinegotziak, biak EAJko kideak, dimisioa aurkeztu zuten ostiralean egin zen osoko bilkuran. El País egunkariak aipatzen du 2000ko maiatza ezkero Urnietako Udalak salgai jarri zituela Urnietatelen dituen akzioen %70, baina hainbat gorabehera tarteko, salmenta inoiz ez dela burutu. Oposizioak dio irregulartasunak izan direla udal operadorearen gestioan.

Urnietatel hizpide izan da leku askotan, 1998an sortu zenetik telekomunikazioko operadore moduan. Baita hemen ere. Izan ere, eredu izan da beste udal askorentzat.

Urnietatel 1998an aurkeztu zuen Jose Inazio Lizeaga orduko alkate eta Maixaren anaiak. Helburua zuen herritarrei telefono eta Internet zerbitzuak eskaintzea oso-oso merke. Atzean Urnieta Eraiki elkarte publikoa omen zegoen, udalaren diruarekin. “El País”ek adierazi duenez, Urnietatelek Donostialdera zabaltzeko asmoa zuen. Hala ere, hasierako inbertsio handiak eta geroztik galdu duen diruak eraman zuten Urnietako Udala konpainia esku pribatuetan jarri nahi izatera. Baina gauzak ez dira joan nahi bezala:

  • Lehen eroslea. 2000ko udaberrian Miguel Angel Fernándezek hartu zuen, 7,5 milioi euroren truke, Urnietatelen kapitalaren %70. Erosketa baliorik gabe geratu zen, ordea, hiru hilabete geroago eroslea hil egin zelako.
  • Bigarren eroslea. 2001eko ekainean Iñaki Unsain etxegileak bere gain hartu zituen lehen eroslearen zorrak eta akzioak. Honen taldeak 1,2 milioi euro ordaindu zituen orduan eta konpromisoa hartu zuen 2001eko abenduaren 31rako beste 3,75 milioi euro jarriko zituela. Bestela, akzio haien titularitatea Urnietako Udalaren eskuetara itzuliko zen. Eta halaxe gertatu, Unsain ez baitzen gai izan agindutakoa ordaintzeko.
  • Hirugarren eroslea. 2001eko abenduaren 31n Urnieta Eraiki elkarteak jakinarazi omen zien bere kideei CAC Telecom konpainiak hartuko zituela akzioak, baina ezta.
  • Oposizioaren salaketak. Oposizioak gestio hauen guztien iluntasuna salatu du. Eta sal-erosketa hauek guztiak ez direla idatzi Merkataritzaren Erregistro Liburuan.
  • Alkatearen adierazpena. DV egunkariak dimitituen komunikatua argitaratu du. Maixa Lizeagak dio “telekomunikazioen egoera zailak” eragotzi duela proiektua finkatzea. Hala ere, urnietarrek jarraituko dute telekomunikazio zerbitzuak jasotzen, berdin-berdin, “Urnietatel berriz ere udalarena baita bere osoan”.
  • Alkate berria. Florentino Ugalde jeltzalea izango omen da Urnietako alkate berria. Hala ere, “El País”ek dio atzean jar dezaketela krisialdi hau bideratzeko Jose Manuel Martiarena, garai batean Urnietako alkate eta Barne sailburuordea izan zena Eusko Jaurlaritzan.

Erantzunak

Luistxo
2002-02-11 : 11:59

Hemen niri sortzen zaidan zalantza nagusia zera da:


  • Porrot egin du Urnietako esperimentuak?

  • Ala Urnietakoa eskualderako teleco bat bihurtzeko saioak?

Urnieta barruan herritarrek daukaten zerbitzuak, behintzat, inbidia ematen segitzen du. Huts egin duenak, zerbitzu hori eskaintzeko ahalegina barik, inguruko herrietara zabaltzeko operazio enpresariala bada, atera ditzakegun ondorioak oso desberdinak dira.


Bide batez, atzoko El Paisen informazio gehiago zetorren.


jalgihadi!
2002-02-11 : 12:18

> * Porrot egin du Urnietako esperimentuak?

>

> * Ala Urnietakoa eskualderako *teleco* bat bihurtzeko saioak?

>

Nire ustez pribatizazio saiakera hori izan da huts egin duena. Zergaitik saldu? Zergaitik horrenbesteko milioiekin amets egin? Zertarako?

Pelotazoaren garaiak zorionez joan ziren.... Urnieta eredu izan da, informazioaren gizartea, informazioaren bitartez gizarteratzen... baina nonbait tronpatu egin dire gerora. Mozkorraldi bat izan dutela dirudi.... eta dimisioari usai txarra dario!

Pribatizazio prozesuetan beti edo gehienetan herriak galtzen du, eta esku ilunek parte hartzen dute, herriari berari bizkarra emanez.

Zer gertatuko da orain?



Erantzun

Twitter ikonoa  Facebook ikonoa  Sartu