AEB-n kalean da pirateoaren aurkako lehen Cda

> Bitartean Michael Jacksonen mp3ak

> (http://www.tomamusica.com/midilab/mjackson/)

> gura badituzu. Ez dut uste kalterik egiten

> dugunik. Bestelakoa litzateke disko etxe txikiei

> pirateatzea.



Beraz, pirateoa SUSTATU ? Zein fakturazio maila da disketxe bat haundia eta txikiaren artean banatzen duena? Nork jarriko du neurria?



Bestalde, helbide horretan ez dago Michael Jacksonen MP3-rik, MIDI fitxategiak baizik. Hori deskargatuta ez duzue nere Jacko maitea kantuan entzungo ez...

Diskoen pirateriaren alde onak bilatzen hasita aurki daitezke zenbait.



Nik uste dut Metallicaren diskoen pirateria aktiboa egin beharko genukeela. Multinazionalei egurra eman behar zaie alde horretatik, horiek estutzean soilik lortuko baita prezioen politika jaistea.



Oraingoz ez da horrelakorik gertatuko, pirateriari esker disko etxe eta banatzaile enpresa txiki asko itotzen ari baitira pixkanaka.



Eta kontua da euskaldunok Gor, Gaztelupe eta Metak konpainien diskoak pirateatzen ditugula. Konpainia txikientzat salmentak %15 jaistea etorkizunera begira apusturik ez egitea da, eta horrek kezkatzen nau.

Komunitate txikia gara, hiztun gutxi eta pirata koskor ugari. Kontraesanak larrutik ordaintzen ditugu euskaldunok.



Toloserriko Gazte Asanblada batek euskal musikaren max-mix pirata bat ipini zuen salgai sosak ateratzeko. Behin taberna batera sartu eta disko horretan zegoen Bide Ertzean taldeko abestia ipini zuten. Zerbitzariak gainera disko pirata erakutsi eta sinatzeko eskatu zidan. Haimaika ikusteko jaioak garela diote. Serio jartzen hasia naiz, eta erdi txantxetan bada ere, gai honi lotuta beste kontu bitxi bat aipatuko dizuet. Lehengoan, Antonio Vegaren disko berriena erosteko asmoz dendara joan nintzen eta hara non ikusi nuen hogei eurotan saltzen ari zirela bederatzi abesti zituen diskoa. Argi dago Antonio Vegak disko etxe kaskarra duela atzean, kanta bikainak ditu ordea. Disko etxeari esker inor gutxi animatuko da diskoa prezio horretan erostera, eta nik nire lagunei nola esango diet bada disko hori erostea merezi duela? Badakit zer egingo dudan. Nik erosi eta kopiak egingo ditut lagunei erakusteko, Nacha Pop taldeko sortzaileetakoak, urratuta egon arren, abesti bikainak egiten jarraitzen duela. Antonio Vegak pirateatua izatea merezi du. Disketxeak ez badio laguntzen, nik egingo dut. Kantuak merkatuaren legeen gainetik daudelako. Kasu honetan behintzat bai.



Joni

Internetek hankaz gora jarri du musikaren industria. "Nabarra" aldizkarian irakurri dudan bezalaxe, bitarteko berria izateaz gain euskarri ere bilakatu baita Internet. Sarean dauden kantuak lokalizatu, etxeko ordenagailura jaitsi eta disko gogorrean gordetzeko aukera ahalbidetzen duelako. Honakoan ere, aurrerapen teknologikoek industriari hartu diote aurre. Honen ondorioz, MP3 sistema eta Napster moduko enpresen bitartez Internetek agente guztiak dantzan jarri ditu: disko etxeak, musikariak, dendariak... Ekonomia berri baten atarian gaudenez, bide eta harreman tradizionalak kolokan daudela esan daiteke.



Hala ere, teknologia berri hauek onuragarriak izango dira Euskal Herriko musika industriarentzat. Hizkuntza gutxituetan aritzen garenok orain artean arazo handiak izan ditugulako gure lanak atzerrira esportatu eta ezagutarazi ahal izateko. Orain, sare elektronikoaren bitartez, multinazionalek monopolizaturiko banaketa sarea gainditzea errazagoa izan daiteke. Dena den, bada kezkagarria iruditzen zaidan beste fenomeno bat, CD grabagailuek eragin duten pirateria, hain zuzen.



Internet bitartez musika kontsumitzen duena gutxiengoa da oraindik. CDak bikozteko tresneria, ordea, zabalduago dago, eta dagoeneko izugarrizko eragina izan du diskoen salmentan. Gero eta gutxiago dira disko dendetara jotzen dutenak, eta negozioan dabiltzanek badakite galera, neurri handi batean, CD grabagailuek eragin dutela. “Soilik kanpokoak kopiatzen ditut”, askotan entzun dugun arrazonamendua, jada iraganeko gauza da. Arazoa, gainera, are larriagoa da gurea bezalako merkatuetan. Lehen ere, produkzio gehienek inbertsioari aurre egiteko benetako zailtasunak zituzten. Horri pirateria fenomenoa gehitzen badiozu, epe laburrera etorkizuna ilun ager daiteke.



Euskal Herrian oraindik musika alternatiboa da nagusi, estetika eta estilo komertzialetik at dagoen eskaintza. Diskoen salmentak gainbehera jarraitzen badu, disko etxeek apusturako gogoa galdu, eta diskogintzak behera egin dezake. Kanturako gogoa ez da desagertuko, baina industria kinka larrian da. Arrain handiak arrain txikia irentsi dezake. Baina hori nori axola zaio? Azken batean, globalizazioak ulertzen ez duen hizkuntza batean mintzo gara.