Teknologia albisteak

Kutxako Internet sariak, zelako sorpresa!

Luistxo - Sustatu

2001-11-30 : 16:11

Iban Arantzabal, Sustatu.com-eko editorea, izan da irabazlea Kutxa-ren Interneteko ekintzaileen 2. lehiaketan. Sariak gaur eguerdian eman dituzte Donostian, Kutxaren egoitzan.

Iban Arantzabalen proiektu saritua mpHiru Management izenekoa da. Ez du zerikusirik Sustatu-n egiten duenarekin. Mutil honek denetarik egiten du eta Gaztelupeko Hotsak diseketxean sekulako manager musikala egina dago... Hortik sortu zitzaion nonbait musika mp3 formatuan Internetetik zabaltzeko ideia bat. Eta horixe da saria lortu duena. 5 milioi pezeta. Ez dago gaizki. Zorionak Iban!

Aurten 31 proiektu aurkeztu dira sariketara. Lehena esan dugun hori. Bigarrena, Ane Miren Axpe-k eraman du (4 milioi), Kirolnet proiektuarekin. Hirugarren saria, ComunidadMayor.com izenekoak, Ainhoa Becerra eta Suria Astudillorena, 3 milioi. 4. saria, Cicerone proiektua, telefono mugikorren bidez turismo informazioa ematekoa, Mikel Labandibarrena. Eta 5. saria, Punto Museum izenekoa (erakusketak eta museoak online antolatzekoa), Joxan Muñoz idazle eta gidoilari donostiarrarentzat (milioi bat pezeta).

Beste bost akzesit ere egon dira. Proiektu hauentzat:

Openswim.com - igeriketa online eta erlazionatutako produktuen salmenta. Iban Mateo eta Gloria Herrera.
Ludoteka.com - Jolasak online. Juan Zubieta.
Landarte.com - Artelanen salmenta Internetetik. Goio Oianguren.
DeConcursos.com - Lehiaketa artistikoen eta literarioen informazioa online. Felix Senosiain.
Top Sapiens. Ezagutzaren transferentzia eta kudeaketa enpresan. Niko Vazquez, Imbecil.com guneko kudeatzailea.

Akzesit bakoitzak 500.000 pezeta eraman du.

Erantzunak

Luistxo Fernandez

2001-12-02 : 22:47

Kutxak hemen argitaratu du sarien zerrenda osoa. Sarituen eta beren proiektuen inguruko informazio gehiago:

Iban Arantzabal. Sustatu-ko editorearen musika esperientzia Gaztelupeko Hotsak disko etxean lortutakoa da. Mikel Urdangarin kantariaren managerra ere bada...

Kirolnet martxan dagoen enpresa bat da. Gipuzkoako kirol amateurrarentzako atari bat egin nahi dute. Bitartean, webgune batzuk antolatu dituzte, hala nola Eibar Futbol Taldearena eta Aspe pilota enpresarena.

Comunidadmayor.com martxan dago. Letralan enpresaren garapen bat da, kredituetan esaten dutenez. Adineko jendeari begira egindako atari bat.

Mikel Labandibarren proiektua Oiartzungo Kam telekomunikazio zerbitzuen enpresaren proiektu bat da. Labandibar eta beste bazkide batzuen arteko enpresa horretatik sortuko da, beraz, Cicerone proiektua.

Joxan Muñoz, bere bazkide Txabi Basterretxearekin, Tipula ekoiztetxekoa da. Marrazki bizidunen ekoizpenean egin duten lanez gain, erakusketen antolaketaren gidoilaritzan egin dute lana. Donostian antolatutako Atarian erakusketa, adibidez, eurena izan zen. Jarduera horren Interneteko luzapena izan daiteke Muñozen proiektua, Punto Museum.

Akzesitei dagokienez,

Top Sapiens. Niko Vazquez ekintzaile Interneten aski ezaguna da Euskal Herrian. Zarauzko Euskal.com enpresan lan egiten du, MCD taldeko musikaria da eta talde horren musika mp3 formatuan Interneten zabaldu duen Imbecil.com guneko arduraduna da.

Ludoteka.com gunea obretan baina online dago. Jokoen inguruko informazioa eta haiek online jokatzeko aukera. Euskaraz ere txukun dago hau, martxan daudela ikusten diren beste webgune proiektuak ez bezala.

DeConcursos.com ere martxan dago, eta Ondarnet izeneko zerbitzu baten garapen bat da.

Openswim.com proiektuari dagokionez, beste domeinu bat beharko dute, ze hori Floridan hartuta daukate batzuek.

Landarte.com proiektua, artea saltzeko internet bidez, garatu gabe dago oraindik, baina domeinua hartua daukate.

Luistxo Fernandez

2001-12-02 : 22:55

Iazkoarekin alderatuta, proiektu gutxiago aurten. Iaz 136, aurten 31. Hala ere, Fernando Spagnolo Kutxako presidenteak esan zuen aurtengoen kalitatea handiagoa zela. Iaz hauek izan ziren sarituak:

saria. TodoMaletas.com, Paul San Sebastian Belaustegigoitia, 10 milioi pezeta

saria. Iura Rech; Miren Eskarne Macho Peña, 5 milioi pezeta.

saria. KulturWeb; Angel Murua Iñurrategi - Juan Alustiza Bergara, 2 milioi pezeta.

Akzesita: Etsedi, Xabier Madina Manterola, milioi bat pezeta.

Proiektu hauetarik, Todomaletas.com eta Kulturweb martxan daude. Lehena Norsis enpresaren garapena da, bigarrena Facilnet enpresarena. Iura Rech zertan geratu den ez dakit. Xabier Madinak Etsedi proiektua jardunaldi akademiko batean aurkeztu zuen, goiburu honekin: Un editor de textos por selección direccional.