Teknologia albisteak

Arnasguneak hizkuntza gutxituetan, nazioarteko biltzarra

Sustatu

gaur : 09:05

Nazioarteko konferentzia soziolinguistikoa egingo da datorren astean Azpeitian: Arnasguneak Hizkuntza Gutxituen Biziberritzean. Urriaren 16an eta 17an. Izena emateko aukera dago oraindik, hemen. Antolatzaileak dira Udalerri Euskaldunen Mankomunitatea, Soziolinguistika Klusterra, Udako Euskal Unibertsitatea, Coppieters Fundazioa; eta babesleak Eusko Jaurlaritza, Gipuzkoako Foru Aldundia, Azpeitiko udala, eta Europako Parlamentuko funtsak.

Biltzarraren helburuak nagusiak bi dira,

Arnasguneek hizkuntza gutxituen biziberritzean duten garrantziaz gogoeta eragitea Europako hizkuntza gutxituen eremuan.
Arnasguneetan hizkuntza gutxituek duten egoera soziolinguistikoa indartzeko proposamenak eta neurriak plazaratzea.

Euskal Herriko esperientziak eta hausnarketak beste komunitate batzuetakoekin erkatuko dira, egitarauan atzerriko gonbidatu hauek daudelarik:

Elin Haf Gruffydd Jones (Galesko Unibertsitatea - ELEN Hizkuntzen Berdintasunerako Europar Sarea)
Cynog Prys eta Rhian Hodges (Galeskoak hauek ere, Bangoko Unibertsitatea)
Adrian Borka (Voivodinako Gobernu Autonomoa, hungariera eta beste gutxiengo txikiago batzuen hizkuntzak dauden Serbiako eskualdea)
Étienne Lemyre (Quebec, Statistique Canada)
Mattia Zeba (EURAC, Hego Tirolgo hizkuntzetan aditua)
Conchúr Ó Giollagáin (Eskoziako gaelikoa, University of the Highlands and Islands)

Egitarau osoa hemen.