gureagenda.com, Euskal Herriko kultur agenda
Internet bidezko doako zerbitzua izango da Gure Agenda eta hainbat funtzio beteko du: euskarazko prentsa bulego handi baten lana egingo du albisteak zabaldu nahi dituzten erakunde, elkarte eta profesionalentzat; aurreikuspenak kontsultatu ahal izateko komunikabide berri bat izango da herritarrentzat; euskal gizartearen pultsua erakutsi eta aztertzeko aukerak eskainiko dituen datu basea izango da aztertzailearentzat.
Agenda bat. Horixe izango da kabitik oraintxe irteten ari den informazio zerbitzu hau. Eskuartean erabiltzen ohiturik gauden agenda horietako bat, baina berezko ezaugarriak dituena: elektronikoa, publikoa, euskaraz egina, doakoa eta egunerokoa, bilaketa sistema erosoarekin eta Euskal Herri osora ezezik mundu osora ere zabalduko dena, Interneten egongo baita.
Baina «Gure Agenda» ez da informazio sortzailea izango, bitartekari bat baizik. Informazio iturriek edo agenteek eskainitako datuak jaso eta erabiltzaile guztiei helaraziko dizkie, lehenengoen lana erraztuz. Ziur, behin baino gehiagotan nekez ekingo ziola Zarauzko Udalak Sanz Enea Kultur Etxean antolatutako erakusketaren berri emateari, komunikabideen zerrenda hartu eta faxak edo e-postak bidaliz. Miarritzeko La Citak ere urtero lan handia egin behar izaten du film bakoitza non, noiz eta zer ordutan eskainiko den jakinarazteko, baita Gaiarre antzokiak edo Donostiako Antzoki Zaharrak bertako programen berri emateko, Zenbat Gara Elkarteak antolatu dituen ekitaldi guztien inguruko informazioa emateko, edo Tolosako Nazioarteko Txotxongilo Jaialdiak emanaldi guztien inguruko datuak zabaltzeko. Hil honen bukaeratik aurrera berriz, nahikoa izango da www.gureagenda.com helbidera sartu eta formulario bat betetzea, telefono eta helbide zerrenda luzeak ahaztuz. Era honetara, iturriek beren informazioa gizarte osoari era erraz eta eroso batean jakinarazteko tresna bat izango dute eta erabiltzaileek berriz, informazio hori kontsultatzeko bitarteko aberatsa.
Automatizazioaren indarra.
Edozein izan liteke agente baldin eta kultur gertakari edo ekimen baten berri eman nahi badu. Horretarako bi eratara igorri ahalko da informazioa: posta elektronikoz agenda@gureagenda.com helbidera bidaliz, edo formulario bidez. Azken modu horretara eginez gero, informazioa segituan agertuko da Interneten, prozesua automatikoa izango baita. Horretarako agente bakoitzari pasahitza emango zaio eta honek ekitaldiren baten berri eman nahi duen bakoitzean formularioa bete eta bidali baino ez du egin beharko. Handik aurrera zerbitzu honen ezaugarriek egingo dute gainontzekoa: edozein ordutan eta edozein lekutan izango du erabiltzaileak informazio horren berri, hark horrela nahi badu behintzat, eta bilaketa sistemak informazioa aurkitzeko baliabide guztiak eskainiko dizkio. Bestalde, ekitaldiak motaren arabera (literatura, bertsolaritza, antzerkia...) eta izaeraren arabera (lehiaketak, erakusketak, emanaldiak...) sailkatuak egongo dira, baita herriaren arabera ere. Beraz, bilaketarik egin gabe ere, gertaera egunera sartuz gero, erraza izango da norberaren interesetara egokitutako ekitaldiak aurkitzea.
Azken finean, agenda elektroniko honek datu base bat izango du oinarrian. Baina dokumentazio ikuspuntuaz gain, informazio ikuspuntua ere landuko du, ekitaldiak irizpide ezberdinen arabera sailkatzeaz gain, horiei buruz iturriek eskainitako informazioa hartzailearentzat baliagarri izateko helburuz aukeratu eta eskainiko baita. Gainera, zenbat eta agente edo eragile gehiago gerturatu, orduan eta informazio kopuru zabalagoa eskainiko du. Horrela, erabiltzaileen kontsulta tresna aberastu egingo da eta agenteen hedapen boterea indartu.
Beste urrats bat.
Zerbitzu berri hau ARGIA eta SAREKO ARGIAren ibilbidean beste urrats bat da. Hain zuzen ere, 1984. urtean sortu zen Euskal Kulturaren Urtekariak eta horrek eraginda etorri ziren Euskal Kulturaren Hariak eta Aurkibideak sortu zuten beharra eta gogoeta. Era horretara, pixkanaka-pixkanaka eta teknologia berriek eskaintzen duten azpiegitura sostengu gisa izanik, «Gure Agenda»ren proiektua gorputza hartzen joan zen. Euskal gizarteari zerbitzu oparoa eskaintzeko ezaugarri guztiak platerean zeuden: alde batetik informazioa zegoen, gertatu zena eta gertatuko zenari buruzkoa, eta bestetik, agenteak zeuden. Hurrengo pausoa Euskal Herriko, Kataluniako eta Europako agendak ezagutzea izan zen eta instituzioekin harremanetan jartzea. Kontaktu horien emaitza Gipuzkoako eta Bizkaiko Foru Aldundiek eta bereziki, Eusko Jaurlaritzak emaniko diru laguntzak izan ziren. Horretatik guztitik hil honen amaieratik aurrera erabili ahalko dugun formatoa sortu da, euskal kulturaren inguruko informazioa sarean jasoko duen formatoa, doan, egunero eta euskaraz.
Kaixo!
Oso interesgarria eta baliagarria iruditzen zait lantzen ari zareten agenda. Noizko hasiko da martxan?.
Milesker eta ondo izan.