Teknologia albisteak

Zientzialari: Hamar zientzialari kamera aurrean, egiten dutena azaltzen.

Zientzia Kaiera

2014-03-22 : 12:53

Gaur egun gero eta interes handiagoa erakusten dugu zientziarekiko. Izan ere, zientzia giza kulturaren zati handi bat da. Euskal Herriko Unibertsitateko Kultura Zientifikoko Katedrak zientzia-dibulgazioaren bidez gizartera hainbat gai hurbiltzea du helburu. Horrekin lotuta Zientzia Kaiera blogean, besteak beste, zientzia ezagutzera emateko lanean dihardugu eta zientzialariei aurpegia, izena eta izana jartzen ahalegitzen gara. Euskal Herrian primerako adituak ditugu hainbat esparrutan, baina ezagutzen ditugu? "Zientzialari" atalean hamabostean behin, zientzialari bat jartzen dugu kamera aurrean beraien ibilbide profesionalaz, ezagutza zientifikoaz edota pasioaz berba egiteko.

“Zientzialari” atalean uztaila bitartean hamar zientzialari jarriko ditugu kamera aurrean egiten duten lana azaltzen. Bost minutuko bideoen bidez euren lana azaltzen digute edota garatzen duten inguruko xehetasunak ematen dizkigute. Jada hiru protagonista izan ditugu:

Onintze Salazarrek, Euskalmeteko meteorologoak, denboraleak zergatik izan diren hain kaltegarriak azaltzen du. Zergatik sortu diren hain jarraian bata bestearen ostean eta klima-aldaketarekin zerikusirik ote duen argitzen digu.

Nekane Balluerkak, Portaera Zientzien Metodologiako katedradunak, psikologia zientzia dela azaltzen du, aurrera joateko beti erabili izan baitu metodo zientifikoa. Horrez gain psikologiaren ikerketa objektua pertsonaren portaera dela azaltzen digu.

Ana Zubiagak, Genetikako Katedradunak, aldiz genetikan izandako azken aurrerapausoak zer suposatzen duten esaten digu. Genoma sekuentziatzeak zenbat gene ditugun ezagutzeko aukera eman digu, gutxi gorabehera 20.000 eta ezagutza hauek nola lagun diezaioketen, esaterako, minbiziaren tratamenduei.

Zientzialari euskal zientzialarien jarduna eta bizipenak gerturatzeko asmoz kaleratu dugu. Beraien ibilbide profesionalaz, ezagutza zientifikoaz edota pasioaz berba egiteko. Hamabost egun barru beste bat izango dugu kamera aurrean. Lekukotasun berri bat.