Teknologia albisteak

Marraz(i)Oak topaketetan ilusionismoa landuko da

Erabiltzailearen aurpegia
2012-11-23 : 13:55

Azaroaren 26an hasiko dira IV. Marraz(i)Oak Ilustratzaile Berrien Topaketak. Aurten ilusionismoa landuko dute parte hartzaileek Elena Odriozola ilustratzaileak eta Gustavo Puerta irakasle eta literatur kritikari ezagunak gidatutako saioetan. Izan ere, "Ilusionismoa: Aurrezinetik Ilustratzen" lelopean burutuko da tailerra Azaroaren 26tik 30era, Artelekun.

Galtzagorri Elkarteak, Artelekurekin batera, "Marraz(i)Oak" izeneko Ilustratzaile Berrien Topaketen IV. edizioa antolatu du. Aurtengo edizioa "Ilusionismoa: Aurrezinetik Ilustratzen" lelopean burutuko da. Azaroaren 26tik 30era egingo dira topaketok Artelekun, Elena Odriozola ilustratzaileak eta Gustavo Puerta irakasle eta literatur kritikariak gidatuta.

Album ilustratu bat sortzeko ilusionismoa lantzen

Ilustratzeko garaian ilustratzaileek zinearen aurretiko objektu optikoak nola erabili ditzaketen ikusi eta ikastea da aurtengo Ilustratzaile Berrientzako Topaketen helburua.

Zinea sortu baino lehenago, hainbat objektu optikoetan egiten ziren irudien errepikapenaren bitartez lortzen zen mugimendua, hiru dimentsioak eta aldaketa sotilen sentsazioa iradokitzea. Tailer honetan, begirada atzera botako da. Argitasun-iluntasun efektuak, gainposizioak, erlaitz eta behatxuloak, transparentzia eta irudien gain-jartzeekin jolasean ilusionismoaren munduan murgilduko dira parte-hartzaileak. Linterna magikoak, diafanoramak, dioramak, zootropoak, paperezko antzerkitxoak eta honelako beste tramankuluak izango dituzte abiapuntu hainbat ariketa gauzatzeko.

Hain zuzen, tresna horiek ezagutzeko, Marraz(i)Oak IV. edizio honetan parte hartzen duten ilustratzaileek Zarauzko Photomuseumera bisita bat ere egingo dute, bertako funtsa zinemaren aurreko hainbat tresnaz osatuta baitago. Zer landuko den Haur Literatura eta honen ilustrazioa ulertzeko beste modu bat arakatuko da beraz bost egunetako tailerrean, garai bateko tramankuluak probestuz. Lau lan ildo garatuko dira:

  • Egun album askotan aurkitzen diren pertsonaia lauen arazoari aurre eginez, irudi desplegableak, disko birakariak eta honelako beste tramankulu batzuk garatuko dituzte ilustratzaileek, non pertsonaiei independentzia eta autonomia emango zaien.
  • Pertsonaien korapiloak aurkitu eta horiek adierazteko modurik egokiena topatzeko ariketak egingo dituzte, diafanoramak, zootropo bandak eta linterna magikoen plakak sortuz.
  • Espazio harremanak eta atmosferen eraikuntza landuko da. Honekin guztiarekin ilustratzaileei album ilustratu bat sortzeko garaian beharrezko dituzten hainbat ezagutza emango zaizkie. Esperientzia artistiko eta ludikoak lantzearekin batera.

12 parte hartzaile, 12 emakume

Parte-hartzaileak Topaketa hauetan formazioa doan eskainiko zaie epai-mahaiak aukeratu dituen honako 12 lagunei: Amaia Araosla, Araitz Urbeltz, Aitziber Akerreta, Arri Bidasoro, Noelia Sierra, Maite Azkargorta, Josune Urritza, Ixone Ormaeche, Itziar San Vicente, Maider Sorasu, Begoña Durruty eta Saioa Burutaran. Guztiak emakumezkoak.

Hauek beka bana izango dute tailer honen formazioa jaso eta bertan sortuko diren lanak bideratu eta bistaratzeko.

Elena Odriozola eta Gustavo Puerta

Aurten ere landuko den gaian aditu diren bi profesionalek emango dute tailerra: Elena Odriozola ilustratzaileak eta Gustavo Puerta irakasle eta literatur kritikari ezagunak. Aurreko edizioetan Harkaitz Cano eta Ignasi Blanch aritu dira irakasle lanetan. Iaz, berriz, Oier Gillan idazlea, Jose Belmonte ilustratzaile eta animazio egilea eta Isabel Herguera animazio egilea.

Erantzun

Twitter ikonoa  Facebook ikonoa  Sartu