Telekonferentziak hobetzeko jarri aurikularrak mesedez

Hala ere, oraindik ere jende asko ikusten eta entzuten dugu aurikularrik gabe dabilena. Buruz buruko elkarrizketetan gogaikarri xamarra izan daitekeen audio txarra, taldeko elkarrizketetan jasan ezina bihurtzen da. Hala ere, sortzen den zalapartan (hainbat pertsona batera hizketan edo inguruko beste zarata batzuek entzuten direla) ez da jakiten zerk eragiten duen halako egoera desatsegina.

Aurikularrak jartzen ez dituenak uste du ez dituela behar, berak ondo entzuten duela. Ba... ez.

Besteon soinu kalitatea hobetzeko, ZUK aurikularrak jartzea behar dugu.

Horrela da. Aurikularrak ez dira norberak hobeto entzuteko, besteok zarata gutxiago izateko baizik.

Izan ere, aurikularrik gabe zaudenean, zure bozgorailuetako soinua zure gelako hormetan erreboteak egin ondoren zure mikrofonotik sartzen da berriz, eta besteoi iristen zaie. Konferentzia horretan beste bat ere aurikularrik gabe baldin badago, errebote berdina berriz gertatzen da eta azkenean ez dago arazo hori konponduko duenik.

Bai, telekonferentzia sistema guztiek dituzte zarata gutxitzeko sistemak, eta nahikoa lan izaten dute bestela ere. Adibidez tipikoa da sistema hauek aldi bakoitzean pertsona bakar baten mikrofonoa aktibatzea (gu konturatu gabe horrela funtzionatzen dute), baina sistemak zarata hori "entzutean" zu hizketan hasi zarela iruditzen bazaio, mikrofonoa irekiko du eta besteongana iritsiko da zarata hori.

Telekonferentzien kalitatea hobetzeko beste aholku batzuk

• Erabili zure ahotik gertu dagoen mikrofono bat, aurikularrena bada, horixe onena. Bai, oso erosoa da ordenagailua edo telefonoaren "esku libreak" funtzioa erabiltzea, baina soinuak mikrofonotik sartu aurretik zure gelako horma, mahaia eta lurraren kontra hainbat buelta egingo ditu mikrofonora sartu aurretik.
• Zure mikrofonoa desaktibatu hitz egin behar ez duzun tartean. Tresna guztiek dute "mute" edo ixiltzeko botoia. Erabili mesedez.
• Zure sarearen konexioa izan daitekeen onena dela ziurtatu. Agian wifia ematen dizun routerrera gerturatu beharko duzu, agian hobe da sare kable bat konektatzea... Ahalik eta konexio onena ziurtatu!
• Zure soinuaren kalitatea frogatzeko, egin grabazio bat eta gero entzun zure burua, egin froga batzuk. Adibidez, Skypek "test" helbide bat eskaintzen du, deitu eta froga egiteko. Gogoratu, ez da zure kontua, BESTEONGAN pentsatu mesedez.
• Irudia ere erabiltzen duzun kasuetan, zaindu irudiaren kalitatea: enkuadrea (ez moztu zure burua), argitasuna (leiho bati bizkar ematen ez mesedez), zure begirada nora zuzentzen den (kamera eta pantaila toki berdinean egon daitezela)
• Ez utzi konexioa azken unerako. Zuretzat hizketaldi garrantzitsu bat bada, konektatu 5 minutu lehenago eta ziurtatu dena ondo dabilela, tokatzen den orduan arazo teknikorik izan ez dadin.
• Zer esanik ez, aholku hauek garrantzitsuak dira bi pertsonen arteko elkarrizketetan, baina kritiko bihurtzen dira 6-8 pertsonak parte hartzen dutenean. Ez gutxietsi.

Gogoratu, aurrez-aurreko bezalako komunikaziorik ez dago eta komunikatzeko ordezko hauekin jardun beharko dugunez oraindik, saiatu detaile guzti hauek zaintzen eta fokoa egon dadila pertsonen arteko komunikazioan eta ez arazo teknikoetan. Zaindu ezazu harremana eta zaindu