10.000 emakume euskarazko Wikipedian
Euskarazko Wikipedian emakumezkoen artikulu kopuruak 10.000 biografiaren landa gainditu du asteburu honetan. Biografiak (pertsona jakin bati buruzko artikuluak) guztira 47.873 izanik (igandeko datuak), portzentaian oraindik gutxi dira, %20.1, baina horretan ere aurrera egin du euskarazko Wikipedian, 2017ko martxoko neurketa batean %13.63 bakarrik baitziren.
Euskarazko Wikipediak badu bere barneko gobernantzan honetaz kezka, eta genero orekari buruzko atal bat dauka. Bertan azaltzen da genero arrakalaren zergatia: "Patriarkatuak emakumeei historian zehar izan dien paperak eta Entziklopedia zein liburuetan gizonek jokatutako paperari eman zaion garrantziak eragina izan du Wikipedian dauden emakume eta gizon ratioen artean." Wikipediarekin lotutako datubaseak, Wikidatak, eskaintzen dituen estatistika eguneratuei esker ikus daiteke une jakin batean zenbat biografia dauden euskaraz genero/sexuaren arabera.
Wikipedia globalean ere bada honetaz kezka, eta talde batek "Global Gender Gap" delakoa monitorizatzen du, genero arrakala hori txikitzeko estrategiak proposatzearekin batera. Tresna horrek eskaintzen duen tresna batekin konparatu dugu genero arrakala zenbait hizkuntzaren aurrean (euskara, galiziera, katalana, espainola, frantsesa, ingelesa, suediera eta finlandiera; hizkuntza hauetako wikipediak).
Ikus grafikoan kokatuta, eta gero zenbakiak. Espainolezko Wikipediak emakume portzentaia handiena du, hauen artean, eta euskarak beste batzuek baino posizio hobea du, baina Eskandinaviako wikipedien atzetik gaude.
Kopuru absolutuetan eta portzentaietan emakumeen presentzia areagotzeko proiektu interesgarri bat WikiEmakumeok ekimena da, nagusiki Marisa Barrena wikilariak bultzatzen duena.
Beste pare bat aukera dira beste hizkuntzetan orria duten baina geurean ez daukatenen zerrendak ikustea: 500 emakume (wikiproiektuetan orri gehien dituztenak, baina geurean ez) eta emakumezko 1000 idazle orriak dira pistak horretarako. Horiekin, atzerriko biografiak osatzen dira batik bat, eta Euskal Herriari begira nola egin: ba hemengo emakume gehiagoren biografiak gehituz, edo, gizonezko euskaldun bati orria sortzen badiozu, pentsa ea emakume bati ere egin diezaiokezun.
10.000 emakumeen barrera gainditu dela ospatzeko, orri bat atera du PDFan euskarazko Wikipediak, 10.000 izen horiek bertan idatzita dituena. Sustatuko emakumezko irakurle batzuk ere bazaudete hor, bai :-)
Erantzun
Sartu